NEET: ନିଟ୍-ୟୁଜି ପୁନଃପରୀକ୍ଷା ଦେଲେନି ୨ ଲକ୍ଷରୁ ଅଧିକ ପରୀକ୍ଷାର୍ଥୀ: ପେପର ଲିକ୍ ପରେ ମାନସିକ ଆଘାତ ଓ ଅବିଶ୍ୱାସକୁ ଦାୟୀ କଲେ ବିଶେଷଜ୍ଞ

ନୂଆଦିଲ୍ଲୀ: ପେପର ଲିକ୍ ଅଭିଯୋଗ ପରେ ବାତିଲ ହୋଇଥିବା ନିଟ୍-ୟୁଜି ୨୦୨୬ ପରୀକ୍ଷାର ପୁନଃପରୀକ୍ଷାରେ ୨ ଲକ୍ଷରୁ ଅଧିକ ପରୀକ୍ଷାର୍ଥୀ ଅନୁପସ୍ଥିତ ଥିଲେ। ଜାତୀୟ ପରୀକ୍ଷା ଏଜେନ୍ସି (ଏନ୍‌ଟିଏ)ର ପ୍ରାରମ୍ଭିକ ଆକଳନ ଅନୁସାରେ, ମେ ୩ରେ ହୋଇଥିବା ପ୍ରଥମ ନିଟ୍-ୟୁଜି ପରୀକ୍ଷାରେ ୨୨,୦୫,୦୩୫ ପରୀକ୍ଷାର୍ଥୀ ଯୋଗ ଦେଇଥିଲେ। କିନ୍ତୁ ଜୁନ୍ ୨୧ରେ ଅନୁଷ୍ଠିତ ପୁନଃପରୀକ୍ଷାରେ ପ୍ରାୟ ୨୦ ଲକ୍ଷ ପରୀକ୍ଷାର୍ଥୀ ଅଂଶଗ୍ରହଣ କରିଥିଲେ। ଅର୍ଥାତ୍ ପ୍ରାୟ ୯ ପ୍ରତିଶତ କିମ୍ବା ୨ ଲକ୍ଷରୁ ଅଧିକ ପରୀକ୍ଷାର୍ଥୀ ପୁନଃପରୀକ୍ଷାରେ ବସିନଥିଲେ।

ଶିକ୍ଷା ବିଶେଷଜ୍ଞମାନଙ୍କ ମତରେ, ପେପର ଲିକ୍ ଘଟଣା ପରୀକ୍ଷାର୍ଥୀଙ୍କ ମନରେ ଗଭୀର ମାନସିକ ଆଘାତ ସୃଷ୍ଟି କରିଥିଲା। ଏହା ସହ ପରୀକ୍ଷା ବ୍ୟବସ୍ଥା ଉପରେ ବିଶ୍ୱାସ କମିଯିବା ମଧ୍ୟ ବହୁ ପରୀକ୍ଷାର୍ଥୀଙ୍କୁ ପୁନଃପରୀକ୍ଷାରୁ ଦୂରେଇ ରଖିଥିବା ସେମାନେ କହିଛନ୍ତି। ମେ ୩ର ପ୍ରଥମ ପରୀକ୍ଷା ଓ ଜୁନ୍ ୨୧ର ପୁନଃପରୀକ୍ଷା ମଧ୍ୟବର୍ତ୍ତୀ ସମୟରେ ଅତି କମରେ ୨୧ ଜଣ ନିଟ୍ ଆଶାୟୀ ଆତ୍ମହତ୍ୟା କରିଥିବା ଖବର ମଧ୍ୟ ଚିନ୍ତା ବଢ଼ାଇଛି। ବିଶେଷଜ୍ଞମାନଙ୍କ ମତରେ, ଏହି ଘଟଣାଗୁଡ଼ିକ ପରୀକ୍ଷାର୍ଥୀଙ୍କ ଉପରେ ପଡ଼ିଥିବା ମାନସିକ ଚାପକୁ ସ୍ପଷ୍ଟ କରୁଛି।

ଅନ୍ୟପକ୍ଷରେ, ଏନ୍‌ଟିଏ ସୂତ୍ର ଅନୁସାରେ, ସମସ୍ତ ଅନୁପସ୍ଥିତିର କାରଣ ପେପର ଲିକ୍ ନୁହେଁ। ଅନେକ ପରୀକ୍ଷାର୍ଥୀ ଏହି ସମୟରେ ଜେଇଇ ମେନ୍ ଓ ଜେଇଇ ଆଡଭାନ୍ସଡ୍‌ରେ ଭଲ ଫଳ ପାଇବା ପରେ ଇଞ୍ଜିନିୟରିଂ କ୍ଷେତ୍ରକୁ ବାଛି ନେଇଥାଇପାରନ୍ତି। ଫଳରେ ସେମାନେ ଡାକ୍ତରୀ ପାଠ୍ୟକ୍ରମରେ ଭର୍ତ୍ତି ପାଇଁ ଆଉ ଆଗ୍ରହୀ ନଥିଲେ। କେତେକ ପରୀକ୍ଷାର୍ଥୀ ବିଦେଶରେ ଉଚ୍ଚଶିକ୍ଷା ପାଇଁ ଆବେଦନ କରିଥିବାରୁ ମଧ୍ୟ ପୁନଃପରୀକ୍ଷାରେ ଯୋଗ ଦେଇନଥିବା ସମ୍ଭାବନା ରହିଛି।

ଏନ୍‌ଟିଏର ଆଉ ଏକ ସୂତ୍ର କହିଛି, ମେ ୬ରେ ପ୍ରଥମ ପରୀକ୍ଷାର ଉତ୍ତରସୂଚୀ ପ୍ରକାଶ ପାଇବା ପରେ କେତେକ ପରୀକ୍ଷାର୍ଥୀ ନିଜ ପ୍ରଦର୍ଶନକୁ ଆକଳନ କରିଥିଲେ। ସେମାନଙ୍କ ମଧ୍ୟରୁ କେତେକ ଏହି କଠିନ ପ୍ରତିଯୋଗିତାମୂଳକ ପରୀକ୍ଷା ପାଇଁ ନିଜକୁ ଯୋଗ୍ୟ ମନେ କରିନଥିବାରୁ ପୁନଃପରୀକ୍ଷାରେ ବସିବାକୁ ଚାହି ନଥିଲେ। ତେବେ ବିଶେଷଜ୍ଞମାନଙ୍କ ମତରେ, ପେପର ଲିକ୍ ପରେ ସୃଷ୍ଟି ହୋଇଥିବା ଅନିଶ୍ଚିତତା, ମାନସିକ ଚାପ ଓ ପରୀକ୍ଷା ବ୍ୟବସ୍ଥା ଉପରେ ଅବିଶ୍ୱାସ ହିଁ ପୁନଃପରୀକ୍ଷାରେ ଉପସ୍ଥିତି କମିବାର ସବୁଠାରୁ ବଡ଼ କାରଣ ବୋଲି ସେମାନେ ମନେ କରୁଛନ୍ତି।

ସୌଜନ୍ୟ ସମ୍ବାଦ