Cooking Oil: ପକୋଡ଼ା କିମ୍ବା ପିଠା ଛାଣିବା ପରେ ବଳକା ତେଲକୁ ଏପରି କରନ୍ତୁ ପୁନଃବ୍ୟବହାର

ଭୁବନେଶ୍ୱର: ଘରେ ପକୋଡ଼ା, ପୁରି କିମ୍ବା ଅନ୍ୟ କିଛି ଜିନିଷ ଛାଣିବା ପରେ କଡ଼େଇରେ ଅନେକ ସମୟରେ ତେଲ ବଳିଯାଏ। ଏହି ବଳକା ତେଲକୁ ଅନେକେ ଫିଙ୍ଗି ଦିଅନ୍ତି। ତେବେ ଠିକ୍‌ ଭାବେ ସଂରକ୍ଷଣ କଲେ ଏହି ତେଲକୁ କିଛି କାମରେ ପୁଣି ବ୍ୟବହାର କରାଯାଇପାରିବ। ତେବେ ସମସ୍ତ ବଳକା ତେଲ ପୁନଃବ୍ୟବହାର ଯୋଗ୍ୟ ନୁହେଁ। ତେଲର ଅବସ୍ଥା ଦେଖି ଏହାକୁ ବ୍ୟବହାର କରିବା ଜରୁରୀ।

ପ୍ରଥମେ ତେଲକୁ ଭଲ ଭାବେ ଛାଣନ୍ତୁ

ପକୋଡ଼ା କିମ୍ବା ପୁରୀ ଛାଣିବା ପରେ ତେଲରେ ବେସନ, ମଇଦା କିମ୍ବା ଖାଦ୍ୟର ଛୋଟ ଛୋଟ କଣିକା ରହିଯାଏ। ଏହି କଣିକା ତେଲକୁ ଶୀଘ୍ର ନଷ୍ଟ କରିପାରେ। ତେଣୁ ତେଲକୁ ପ୍ରଥମେ ସମ୍ପୂର୍ଣ୍ଣ ଥଣ୍ଡା କରି ସୂକ୍ଷ୍ମ ଛଣା କିମ୍ବା ସଫା କପଡ଼ାରେ ଛାଣି ନିଅନ୍ତୁ। ପରେ ଏହାକୁ ସଫା ଓ ଶୁଖିଲା ପାତ୍ରରେ ରଖନ୍ତୁ।
୧. ଡାଲି ଓ ତରକାରୀରେ ଛୁଙ୍କ 
ବଳକା ତେଲକୁ ପୁଣି ଛାଣିବା ପାଇଁ ବ୍ୟବହାର ନକରି ଡାଲି, ତରକାରୀରେ ଛୁଙ୍କ ଦେବା ପାଇଁ ବ୍ୟବହାର କରିପାରିବେ। ଭଜା ତେଲରେ ଥିବା ସୁଗନ୍ଧ ଖାଦ୍ୟର ସ୍ୱାଦକୁ ମଧ୍ୟ ବଢ଼ାଇପାରେ।
୨. ଶୁଖିଲା ତରକାରୀରେ ବ୍ୟବହାର
ଆଳୁ, ଭେଣ୍ଡି, ବନ୍ଧାକୋବି ଭଳି ଶୁଖିଲା ତରକାରୀ ରାନ୍ଧିବା ସମୟରେ ଅଳ୍ପ ପରିମାଣର ବଳକା ତେଲ ବ୍ୟବହାର କରିପାରିବେ। ତେବେ ତେଲରେ ପୋଡ଼ା ଗନ୍ଧ ନଥିବା ଜରୁରୀ।
୩.ସ୍ନାକ୍ସ ତିଆରିରେ ବ୍ୟବହାର 
ବଳକା ତେଲ ଯଦି ଅଧିକ ଗାଢ଼ ହୋଇନଥାଏ କିମ୍ବା ପୋଡ଼ା ଗନ୍ଧ ନଥାଏ, ତେବେ ପରଟା କିମ୍ବା ନମକିନ୍‌ ତିଆରି ସମୟରେ ମଇଦାରେ ଅଳ୍ପ ପରିମାଣର ତେଲ ମିଶାଇପାରିବେ। ଏହା ଖାଦ୍ୟକୁ କ୍ରିସ୍ପି କରିବାରେ ସହାୟକ ହୋଇପାରେ।
୪. ଆଚାର କିମ୍ବା ସସ୍‌ରେ ବ୍ୟବହାର
ସଫା ଓ ଦୁର୍ଗନ୍ଧମୁକ୍ତ ବଳକା ତେଲକୁ ଘରୋଇ ଆଚାର ଉପରେ ଅଳ୍ପ ପରିମାଣରେ ବ୍ୟବହାର କରାଯାଇପାରେ। ତେବେ ଏଥିପାଇଁ ତେଲ ସଫା ଓ ଖାଦ୍ୟଯୋଗ୍ୟ ଅବସ୍ଥାରେ ଥିବା ଆବଶ୍ୟକ।

୫. ଘରର ଅନ୍ୟ କାମରେ ବ୍ୟବହାର
ଖାଦ୍ୟରେ ବ୍ୟବହାର କରିବାକୁ ଇଚ୍ଛା ନଥିଲେ ବଳକା ତେଲକୁ କିଛି ଘରୋଇ କାମରେ ବ୍ୟବହାର କରିହେବ। କବାଟର କବଜାରେ ଅଳ୍ପ ତେଲ ଲଗାଇଲେ କର୍କଶ ଶବ୍ଦ କମିପାରେ। ଧାତୁର କିଛି ଜିନିଷରେ ତେଲ ଲଗାଇଲେ ଆର୍ଦ୍ରତାରୁ ସୁରକ୍ଷା ମିଳିପାରେ।
୬. କାଠ ଆସବାବପତ୍ରରେ ବ୍ୟବହାର
କିଛି ଲୋକ ପୁରୁଣା କାଠ ଆସବାବପତ୍ରରେ ଅଳ୍ପ ତେଲ ଲଗାଇ ପଲିସ୍‌ ଭଳି ବ୍ୟବହାର କରନ୍ତି। କିନ୍ତୁ କୌଣସି ମୂଲ୍ୟବାନ କିମ୍ବା ନୂଆ ଫର୍ଣ୍ଣିଚରରେ ଲଗାଇବା ପୂର୍ବରୁ ଛୋଟ ଅଂଶରେ ପରୀକ୍ଷା କରିବା ଭଲ।
୭. ବଗିଚାରେ ସାବଧାନତାର ସହ ବ୍ୟବହାର
ବଳକା ରନ୍ଧଣ ତେଲକୁ ସିଧାସଳଖ ଗଛର ମାଟିରେ ଢାଳିବା ଉଚିତ୍‌ ନୁହେଁ। ଏହା ମାଟିର ଗୁଣ ଓ ଗଛର ମୂଳକୁ କ୍ଷତି କରିପାରେ। ତେଣୁ ବଗିଚାରେ ବ୍ୟବହାର କରିବାକୁ ହେଲେ ଉପଯୁକ୍ତ ଉଦ୍ଭିଦ-ସୁରକ୍ଷା ପଦ୍ଧତି ବିଷୟରେ ନିଶ୍ଚିତ ହୋଇ ତାହା ପରେ ବ୍ୟବହାର କରନ୍ତୁ।

ସୌଜନ୍ୟ ସମ୍ବାଦ