ପାରାଦୀପ,୨୬।୯(ଶରତ ରାଉତ): ଭାରତ ସରକାର ଶୁକ୍ରବାର ଦେଶର ୪ଟି ପ୍ରମୁଖ ବନ୍ଦରକୁ ଆନୁଷ୍ଠାନିକ ଭାବେ ମେଗା ବନ୍ଦର ମାନ୍ୟତା ଦେଇଛନ୍ତି। ସେଥିମଧ୍ୟରେ ଓଡ଼ିଶାର ପାରାଦୀପ ବନ୍ଦର ରହିଛି। ଫଳରେ ଦେଶର ପ୍ରମୁଖ ଏବଂ ରଣନୀତିକ ଦୃଷ୍ଟିକୋଣରୁ ସବୁଠାରୁ ଗୁରୁତ୍ୱପୂର୍ଣ୍ଣ ବନ୍ଦରଗୁଡ଼ିକ ମଧ୍ୟରେ ପାରାଦୀପ ବନ୍ଦର ସାମିଲ ହୋଇଛି। ଅନ୍ୟ ବନ୍ଦର ଗୁଡିକ ହେଲା ଗୁଜୁରାଟର କାଣ୍ଡଲା ଓ ମୁନ୍ଦ୍ରା, ମହାରାଷ୍ଟ୍ରର ଜବହାରଲାଲ ନେହେରୁ ବନ୍ଦର (ଜେଏନ୍ପିଟି)। ଭାରତ ସରକାରଙ୍କ ବନ୍ଦର ଆଇନ ୨୦୨୫ ଏସ୍ ଓ ୫୩୦୩(ଇ)ଧାରା ୭୩,ଉପଧାରା (୧)ଅନୁସାରେ ମେଗା ପୋର୍ଟ ମାନ୍ୟତା ଦିଆଯିବା ନେଇ ଉଲ୍ଲେଖ ଅଛି। ନିର୍ଦ୍ଧାରିତ ମାନଦଣ୍ଡର ମୂଲ୍ୟାଙ୍କନ ପରେ ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରଣାଳୟ ଉକ୍ତ ୪ ବନ୍ଦରକୁ ରାଜପତ୍ରରେ ସ୍ଥାନିତ କରିଛନ୍ତି। ଏଥିରେ ବନ୍ଦର ଜାହାଜ ଓ ଜଳପଥ ମନ୍ତ୍ରଣାଳୟ ଯୁଗ୍ମ ସଚିବ ପ୍ରବୀନ ପି.ନାୟର ଦସ୍ତଖତ କରିଛନ୍ତି। ପାରାଦୀପ ବନ୍ଦର ମେଗା ବନ୍ଦର ତାଲିକାଭୁକ୍ତ ହେବା ପରେ ରାଜ୍ୟର ସାମୁଦ୍ରିକ ଅଭିଳାଷକୁ ଅଧିକ ପ୍ରୋତ୍ସାହନ ମିଳିବ ବୋଲି ଆଶା କରାଯାଉଛି।
ସୌଜନ୍ୟ ଧରିତ୍ରୀ
