War: ୟୁକ୍ରେନ ଶାନ୍ତି ଚୁକ୍ତି ପାଇଁ ମୋଦୀଙ୍କ ପାଖରେ ଅଛି ସମାଧାନର ସୂତ୍ର: ପୁଟିନ
ୟୁକ୍ରେନ୍ ସଂକଟର ଏକ ଗ୍ରହଣୀୟ ସମାଧାନ ବାହାର କରିବା ପାଇଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପାଖରେ ସର୍ବୋତ୍ତମ ପ୍ରସ୍ତାବ ରହିଛି ଏବଂ ପ୍ରତ୍ୟେକ ଦ୍ବିପାକ୍ଷିକ ବୈଠକରେ ସେ ଏହି ପ୍ରସଙ୍ଗ ଉଠାଉଛନ୍ତି ବୋଲି ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି।
ମସ୍କୋ: ୟୁକ୍ରେନ୍ ସଂକଟର ଏକ ଗ୍ରହଣୀୟ ସମାଧାନ ବାହାର କରିବା ପାଇଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପାଖରେ ସର୍ବୋତ୍ତମ ପ୍ରସ୍ତାବ ରହିଛି ଏବଂ ପ୍ରତ୍ୟେକ ଦ୍ବିପାକ୍ଷିକ ବୈଠକରେ ସେ ଏହି ପ୍ରସଙ୍ଗ ଉଠାଉଛନ୍ତି ବୋଲି ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି। ସରକାରୀ ସମ୍ବାଦ ସଂସ୍ଥା ‘ଟାସ୍’ ଅନୁଯାୟୀ, ଗୁରୁବାର ଭାଲଡାଇ ଅନ୍ତର୍ଜାତୀୟ ଆଲୋଚନା କ୍ଲବ୍ର ବାର୍ଷିକ ବୈଠକକୁ ସମ୍ବୋଧିତ କରି ପୁଟିନ ଏହି ବକ୍ତବ୍ୟ ଦେଇଛନ୍ତି।
ଯୁଦ୍ଧ ସମାପ୍ତ କରିବା ନେଇ ପ୍ରଧାନମନ୍ତ୍ରୀ ମୋଦୀଙ୍କ ଆଭିମୁଖ୍ୟ ସମ୍ପର୍କରେ ପୁଟିନ କହିଛନ୍ତି ଯେ, ଆମର ସୁଦୃଢ଼ ଦ୍ବିପାକ୍ଷିକ ସଂପର୍କ ତଥା ବ୍ୟକ୍ତିଗତ ସ୍ତରରେ ବନ୍ଧୁତାପୂର୍ଣ୍ଣ ସମ୍ପର୍କ ସତ୍ତ୍ୱେ ସେ ଏପରି ଜଣେ ବିଶ୍ୱ ନେତା, ଯିଏ କ୍ରମାଗତ ଭାବେ ଏହି ପ୍ରସଙ୍ଗ ଉଠାଉଛନ୍ତି। ୟୁକ୍ରେନ ସଂଘର୍ଷର ଅନ୍ତ ଘଟାଇବା ପାଇଁ ସେ ନିରନ୍ତର ପ୍ରଶ୍ନ ପଚାରୁଛନ୍ତି।
ରୁଷ୍ ରାଷ୍ଟ୍ରପତି କହିଛନ୍ତି ଯେ ଆମର ପ୍ରତ୍ୟେକ ବୈଠକରେ ମୋଦୀ ଏହି ବିଷୟଗୁଡ଼ିକୁ ଆଲୋଚନାକୁ ଆଣନ୍ତି ଏବଂ ଏଥିରେ ଗଭୀର ଆଗ୍ରହ ପ୍ରକାଶ କରନ୍ତି। ଉଭୟ ପକ୍ଷ ପାଇଁ ଗ୍ରହଣୀୟ ସମାଧାନ ଖୋଜିବା ନିମନ୍ତେ ସେ ବହୁତ ଭଲ ବିଚାର ପ୍ରଦାନ କରିଛନ୍ତି ବୋଲି ପୁଟିନ ସ୍ପଷ୍ଟ କରିଛନ୍ତି।
ଗତ ମାସରେ ନୂଆଦିଲ୍ଲୀରେ ଅନୁଷ୍ଠିତ ବ୍ରିକ୍ସ ସମ୍ମିଳନୀ ଅବସରରେ ପୁଟିନ୍ ଓ ମୋଦୀଙ୍କ ମଧ୍ୟରେ ଆଲୋଚନା ହେବାର କିଛି ଦିନ ପରେ ଏହି ବକ୍ତବ୍ୟ ଆସିଛି। ଏହି ବୈଠକ ସମୟରେ ପୁଟିନ ପ୍ରଧାନମନ୍ତ୍ରୀ ମୋଦୀଙ୍କୁ ୟୁକ୍ରେନର ସ୍ଥିତି ଏବଂ ଚାଲିଥିବା ଶାନ୍ତି ପ୍ରକ୍ରିୟା ସମ୍ପର୍କରେ ଅବଗତ କରାଇଥିଲେ।
ସୌଜନ୍ୟ ସମ୍ବାଦ
