GST New Rule: ଜିଏସ୍ଟି ନିୟମରେ ହେବ ସଂଶୋଧନ, ଅଧିକାରୀଙ୍କ ନିକଟରେ ରହିବନି ଗିରଫ କ୍ଷମତା, କୋର୍ଟଙ୍କ ଆଦେଶ ବାଧ୍ୟତାମୂଳକ
ନୂଆଦିଲ୍ଲୀ, ୦୫/୧୦: ସାମଗ୍ରୀ ଓ ସେବା ଟିକସ (ଜିଏସ୍ଟି) ପରିଷଦ ପରୋକ୍ଷ ଟିକସ ବ୍ୟବସ୍ଥାରେ ବଡ଼ ପରିବର୍ତ୍ତନ ଆଣିବାକୁ ଯାଉଛି । ପ୍ରସ୍ତାବିତ ଜିଏସ୍ଟି ୨.୦ ଅଧିନରେ ଟିକସ ଅଧିକାରୀଙ୍କ ନିକଟରେ ସିଧାସଳଖ ଗିରଫ କ୍ଷମତାକୁ ପ୍ରତ୍ୟାହାର କରାଯିବାର ସମ୍ଭାବନା ରହିଛି । ଏହା ପରିବର୍ତ୍ତେ କୌଣସି ବ୍ୟକ୍ତିଙ୍କୁ ଗିରଫ କରିବାକୁ ହେଲେ ଅଦାଲତଙ୍କ ଆଦେଶକୁ ବାଧ୍ୟତାମୂଳକ କରିବା ଜିଏସ୍ଟି ପରିଷଦ ବିଚାର କରୁଛି । ଏହା ସହ କ୍ରିମିନାଲ ପ୍ରସେକ୍ୟୁସନ ବା ଆପରାଧିକ ମାମଲା ରୁଜୁ କରିବାକୁ ୫ କୋଟି ଟଙ୍କାର କାରବାର ସୀମା ନିର୍ଦ୍ଧାରଣ କରିବାକୁ ପ୍ରସ୍ତାବ ରହିଥିବା ପ୍ରକ୍ରିୟା ସହ ଜଡିତ ୨ ଜଣ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।
ବର୍ତ୍ତମାନ ଜିଏସ୍ଟି ଅଧିକାରୀମାନେ ଟିକସ ଚୋରୀ ଅଭିଯୋଗରେ ନିଜସ୍ୱ ନିଷ୍ପତ୍ତି ଆଧାରରେ କୌଣସି ବ୍ୟକ୍ତି ବିଶେଷଙ୍କୁ ସିଧାସଳଖ ଗିରଫ କରିପାରୁଛନ୍ତି । କିନ୍ତୁ ନୂଆ ପ୍ରସ୍ତାବ ଅନୁଯାୟୀ ଅଧିକାରୀମାନେ ଆଉ ସିଧାସଳଖ କୌଣସି ଟିକସଦାତାଙ୍କୁ ଗିରଫ କରିପାରିବେ ନାହିଁ । ଯଦି କୌଣସି ଗୁରୁତର ମାମଲା ସାମ୍ନାକୁ ଆସେ ତେବେ ବ୍ୟକ୍ତିଙ୍କୁ ଗିରଫଦାରୀ ପାଇଁ ଅଧିକାରୀମାନଙ୍କୁ ନ୍ୟାୟାଳୟରୁ ଆନୁଷ୍ଠାନିକ ଆଦେଶ କିମ୍ବା ୱାରେଣ୍ଟ ହାସଲ କରିବାକୁ ହେବ । ଏହାଦ୍ୱାରା ଅଧିକାରୀଙ୍କ ସ୍ୱେଚ୍ଛାଚାରୀ କାମ ଉପରେ ରୋକ ଲଗାଯାଇପାରିବ । ଆଗକୁ କେବଳ ସେହିସବୁ ମାମଲାରେ କୋର୍ଟରେ ମାମଲା ରୁଜୁ ହେବ ଯାହାର ଟିକସ ଫାଙ୍କି କିମ୍ବା ଅନିୟମିତତା ୫ କୋଟି ଟଙ୍କାରୁ ଊଦ୍ଧ୍ୱର୍ ହୋଇଥିବ । ୫ କୋଟି ଟଙ୍କାରୁ କମ୍ ରାଶି ଉପରେ ମାମଲା ଗୁଡିକୁ ଆପରାଧିକ କୋର୍ଟ ମାମଲା ପରିସର ବାହାରେ ରଖାଯିବ । ଅନେକ ସମୟରେ ଜିଏସ୍ଟି ଆଇନରେ ବ୍ୟାଖ୍ୟା, ଟିକସ ଗଣନା କିମ୍ବା ନିୟମ ସମ୍ପର୍କିତ ମତଭେଦ ଯୋଗୁ ଟିକସଦାତା ଏବଂ ଅଧିକାରୀଙ୍କ ମଧ୍ୟରେ ବିବାଦ ଦେଖାଯାଇଥାଏ ।
ଏଭଳି ସାଧାରଣ ଟିକସ ବିବାଦଗୁଡିକ ପାଇଁ ଆଉ କ୍ରିମିନାଲ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ । ଏସବୁକୁ ସିଭିଲ ପେନାଲ୍ଟି ବା ଦେୱାନି ଜରିମାନା ଏବଂ ପ୍ରଶାସନିକ ନିୟମାବଳୀ ଜରିଆରେ ସମାଧାନ କରାଯିବ । ଏହି ନୂଆ ନିୟମର ଉଦ୍ଦେଶ୍ୟ ହେଉଛି ଦେଶରେ ଟିକସଦାତାଙ୍କ ଅଧିକାର ସୁରକ୍ଷା ଏବଂ ଇଜ୍ ଅଫ୍ ଡୁଇଁ ବିଜ୍ନେସ ବା ବାଣିଜ୍ୟିକ ବାତାବରଣକୁ ଉନ୍ନତ କରିବା । ଅନେକ ସମୟରେ ସାଧାରଣ ଭୂଲ କିମ୍ବା ବ୍ୟାଖ୍ୟାଗତ ପାର୍ଥକ୍ୟ ଲାଗି ଟିକସଦାତାଙ୍କ ମଧ୍ୟରେ ଗିରଫଦାରୀ କିମ୍ବା ଆପରାଧିକ କାର୍ଯ୍ୟାନୁଷ୍ଠାନ ଭୟ ରହୁଥିଲା । ଏହି ନୂଆ ସଂସ୍କାର ଦ୍ୱାରା ଟିକସଦାତା ମାନେ ଆବଶ୍ୟକୀୟ ଅଦାଲତି ମାମଲା ଏବଂ ଗିରଫଦାରୀରୁ ରକ୍ଷା ପାଇବେ । ଏହା ଦେଶରେ ଇଜ୍ ଅଫ୍ ଡୁଇଁ ବିଜ୍ନେସକୁ ପ୍ରୋତ୍ସାହିତ କରିବ ।
ସୌଜନ୍ୟ ପ୍ରମେୟ
