High Court order: କାର୍ଯ୍ୟକାରୀ ହେଉନି ହାଇକୋର୍ଟଙ୍କ ନିର୍ଦ୍ଦେଶ: ପରିବହନ ସଚିବ, କମିସନରଙ୍କୁ ସତ୍ୟପାଠ ଦାଖଲ ନିର୍ଦ୍ଦେଶ

ଅଦାଲତ ଅବମାନନା ମାମଲାରେ ନିଜର ଆଚରଣ ସଂକ୍ରାନ୍ତରେ ଏକ ସପ୍ତାହ ଭିତରେ ସତ୍ୟପାଠ ଦାଖଲ କରିବାକୁ ବାଣିଜ୍ୟ ଓ ପରିବହନ ସଚିବ, ପରିବହନ କମିସନର, ଅର୍ଥ ସଚିବ, ଚଣ୍ଡିଖୋଲ ଆର୍‌ଟିଓ ଓ ଅନ୍ୟମାନଙ୍କୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ମୁଖ୍ୟ ବିଚାରପତି ଜଷ୍ଟିସ ହରିଶ ଟଣ୍ଡନ ଓ ଜଷ୍ଟିସ ଏମ.ଏସ.ରମଣଙ୍କୁ ନେଇ ଗଠିତ ଖଣ୍ଡପୀଠ ଗଣେଶଚନ୍ଦ୍ର ପାତ୍ରଙ୍କ ତରଫରୁ ଦାୟର ଅଦାଲତ ଅବମାନନା ମାମଲାର ଶୁଣାଣି କରି ଏପରି ନିର୍ଦ୍ଦେଶ ପ୍ରଦାନ କରିଛନ୍ତି।

ମାମଲାର ବିବରଣୀରୁ ପ୍ରକାଶ ଯେ, ପରିବହନ ବିଭାଗ ଅଧୀନରେ ଯାଜପୁର ଜିଲ୍ଲାରେ ୧୯୯୭ରୁ ଅସ୍ଥାୟୀ ଭାବେ କାର୍ଯ୍ୟ କରି ଆସୁଥିବା ଗଣେଶ ଚନ୍ଦ୍ର ପାତ୍ରଙ୍କୁ ୨୦୧୯ରେ କାର୍ଯ୍ୟରୁ ଅନ୍ତର କରାଯାଇଥିଲା। ହାଇକୋର୍ଟ ୨୦୨୫, ମେ ୧୩ରେ ଆବେଦନକାରୀଙ୍କୁ ଚାକିରିରେ ପୁନର୍ବାର ଅବସ୍ଥାପିତ କରିବାକୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶ ବିରୋଧରେ ସରକାର ସୁପ୍ରିମକୋର୍ଟରେ ଦାୟର କରିଥିବା ଏସ୍‌ଏଲ୍‌ପି ୨୦୨୬, ଜାନୁଆରି ୧୬ରେ ଖାରଜ ହୋଇଥିଲା। ଅନ୍ୟପକ୍ଷରେ ୨୦୨୫ରୁ ବିଚାରାଧୀନ ଥିବା ଆବେଦନକାରୀଙ୍କ ଅଦାଲତ ଅବମାନନା ମାମଲାର ଶୁଣାଣି ସମୟରେ ପୂର୍ବ ନିର୍ଦ୍ଦେଶ କାର୍ଯ୍ୟକାରୀ ପାଇଁ ସରକାରଙ୍କ ତରଫରୁ ସମୟ ଲୋଡ଼ା ଯାଇଥିଲା। ଏସ୍‌ଏଲ୍‌ପି ଖାରଜ ହେବା ପରେ ମଧ୍ୟ ପୂର୍ବ ନିର୍ଦ୍ଦେଶ କାର୍ଯ୍ୟକାରୀ କ୍ଷେତ୍ରରେ ଏଭଳି ବିଳମ୍ବ ଓ ବାରମ୍ବାର ସମୟ ଲୋଡ଼ାଯିବା ଘଟଣାକୁ ନେଇ ହାଇକୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି।