ନୂଆଦିଲ୍ଲୀ: ଜଷ୍ଟିସ୍ ଯଶୱନ୍ତ ବର୍ମାଙ୍କ ବିରୋଧରେ ଆସିଥିବା ଅଭିଯୋଗର ତଦନ୍ତ କରୁଥିବା କମିଟି ଲୋକସଭା ବାଚସ୍ପତି ଓମ୍ ବିର୍ଲାଙ୍କ ନିକଟରେ ରିପୋର୍ଟ ଦାଖଲ କରିଛି। ଜଜ୍ (ତଦନ୍ତ) ଅଧିନିୟମ, ୧୯୬୮ ଅନୁଯାୟୀ ସୋମବାର ଏହି ରିପୋର୍ଟ ଉପସ୍ଥାପିତ ହୋଇଛି ଏବଂ ଏହା ଠିକ୍ ସମୟରେ ସଂସଦର ଉଭୟ ଗୃହରେ ଉପସ୍ଥାପିତ ହେବ ବୋଲି ଲୋକସଭା ସଚିବାଳୟ କହିଛି। ବର୍ତ୍ତମାନ ସଂସଦର ଅଧିବେଶନ ଚାଲୁ ନ ଥିବାରୁ ଜୁଲାଇ ତୃତୀୟ ସପ୍ତାହରେ ହେବାକୁ ଥିବା ମୌସୁମୀ ଅଧିବେଶନରେ ଏହି ରିପୋର୍ଟ ଉପସ୍ଥାପନ ହୋଇପାରେ।
ମାର୍ଚ୍ଚ ୧୪, ୨୦୨୫ ରାତିରେ ଜଷ୍ଟିସ୍ ବର୍ମାଙ୍କ ସରକାରୀ ଦିଲ୍ଲୀ ବାସଭବନରେ ଅଗ୍ନିକାଣ୍ଡ ଘଟିବା ପରେ ତାଙ୍କ ଘରୁ କୋଟି କୋଟି ଟଙ୍କାର ଦରପୋଡ଼ା ନଗଦ ରାଶି ମିଳିଥିଲା। ନଗଦ ଟଙ୍କା ମିଳିବା ସମୟରେ ବର୍ମା ଦିଲ୍ଲୀ ହାଇକୋର୍ଟର ବିଚାରପତି ଭାବେ କାର୍ଯ୍ୟ କରୁଥିଲେ। ତତ୍କାଳୀନ ପ୍ରଧାନ ବିଚାରପତି ସଞ୍ଜୀବ ଖାନ୍ନାଙ୍କ ଦ୍ୱାରା ଗଠିତ ଏକ ଆଭ୍ୟନ୍ତରୀଣ କମିଟି ଦର୍ଶାଇଥିଲା ଯେ ଏହି ନଗଦ ଟଙ୍କା ଲୁଚାଇ ରଖାଯାଇଥିବା ଷ୍ଟୋର ରୁମ୍ ଉପରେ ଜଷ୍ଟିସ୍ ବର୍ମା ଓ ତାଙ୍କ ପରିବାରର ନିୟନ୍ତ୍ରଣ ଥିଲା। ଜୁଲାଇ ୨୦୨୫ରେ ୨୦୦ରୁ ଅଧିକ ସାଂସଦ ତାଙ୍କୁ ହଟାଇବା ପାଇଁ ଏକ ପ୍ରସ୍ତାବରେ ଦସ୍ତଖତ କରିବା ପରେ ବର୍ମାଙ୍କ ବିରୋଧରେ ବାଚସ୍ପତି ବିର୍ଲା ଅଗଷ୍ଟ ୧୨, ୨୦୨୫ରେ ତିନିଜଣିଆ ତଦନ୍ତ କମିଟି ଗଠନ କରିଥିଲେ। ବିଚାରପତି (ତଦନ୍ତ) ଅଧିନିୟମ ଅନୁଯାୟୀ, ସୁପ୍ରିମ୍କୋର୍ଟ କିମ୍ବା ହାଇକୋର୍ଟର ବିଚାରପତି ତଥା ମୁଖ୍ୟ ନିର୍ବାଚନ କମିସନରଙ୍କୁ ହଟାଇବାର ଅଧିକାର କେବଳ ସଂସଦର ଅଛି।
ତେବେ ଜଷ୍ଟିସ୍ ବର୍ମା ନିକଟରେ ଆହ୍ଲାବାଦ ହାଇକୋର୍ଟରୁ ଇସ୍ତଫା ଦେଇଥିଲେ। ନ୍ୟାୟିକ ନିଯୁକ୍ତି ଓ ଅପସାରଣ ପ୍ରକ୍ରିୟା ସହିତ ପରିଚିତ ବ୍ୟକ୍ତିମାନେ କହିଛନ୍ତି ଯେ, ସୁପ୍ରିମ୍କୋର୍ଟଙ୍କ ରାୟ ଅନୁଯାୟୀ, ଜଣେ ବିଚାରପତି ରାଷ୍ଟ୍ରପତିଙ୍କ ନିକଟରେ ଇସ୍ତଫା ଦାଖଲ କରିବା ଓ ଏହାର ନକଲ ସାର୍ବଜନୀନ କରିବା ପରେ ଇସ୍ତଫା ଦେଇଥିବା ଧରି ନିଆଯାଏ। ଏହା ପରେ ରାଷ୍ଟ୍ରପତି ଆନୁଷ୍ଠାନିକ ଭାବେ ଇସ୍ତଫା ଗ୍ରହଣ କରନ୍ତି, ଯାହା ପରେ ଆଇନ ମନ୍ତ୍ରାଳୟର ନ୍ୟାୟ ବିଭାଗ ଏକ ବିଜ୍ଞପ୍ତି ଜାରି କରେ। ଯଦିଓ ଜଷ୍ଟିସ୍ ବର୍ମାଙ୍କ ନାମ ଆହ୍ଲାବାଦ ହାଇକୋର୍ଟର ୱେବ୍ସାଇଟ୍ରେ କାର୍ଯ୍ୟରତ ବିଚାରପତି ଭାବରେ ଦେଖାଯାଉଛି, ତଥାପି ଆଇନ ଅନୁସାରେ ସେ ବର୍ତ୍ତମାନ ଜଣେ ସାଧାରଣ ନାଗରିକ। ଏହାପରେ ଜଣେ ପୂର୍ବତନ ବିଚାରପତିଙ୍କୁ ସଂସଦ ଦ୍ୱାରା ହଟାଇ ଦିଆଯାଇପାରିବ ନାହିଁ। ଅନ୍ୟପକ୍ଷରେ ଜଷ୍ଟିସ୍ ବର୍ମା ୬୨ ବର୍ଷ ବୟସରେ ପହଞ୍ଚିବା ପରେ ୨୦୩୧ ଜାନୁଆରି ୫ ତାରିଖରେ ଅବସର ନେବାର ଥିଲା। ସେ ବିଚାରପତି ଥିବା ସମୟରେ ପ୍ରକ୍ରିୟା ଆରମ୍ଭ ହୋଇଥିବାରୁ ତାଙ୍କ ଇସ୍ତଫା ସତ୍ତ୍ବେ କମିଟି ଏହାର ତଦନ୍ତ ଜାରି ରଖିଥିଲା। ରିପୋର୍ଟ ମିଳିବା ପରେ ସଂସଦ ପରବର୍ତ୍ତୀ କାର୍ଯ୍ୟପନ୍ଥା ସ୍ଥିର କରିବ ବୋଲି କୁହାଯାଉଛି।
ସୌଜନ୍ୟ ସମ୍ବାଦ