Man Stranded in Tree ଜୀବନହାରିବାକୁ ସଲପ ପିଇ ଚଢ଼ିଥିଲେ ଗଛ, ଭାଙ୍ଗିଗଲା ଡାଳ

ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ଗାଦବାକୋତ୍ରା ପଞ୍ଚାୟତ ଅନ୍ତର୍ଗତ ଖୁଡ଼ିଗୁଡା ଗ୍ରାମର ରାମ ମୁଦୁଲି। ଆଜି (ଶୁକ୍ରବାର) ଅପରାହ୍‌ଣରେ ନିଜ ପୁଅଙ୍କୁ ମଦ ପିଇବାକୁ ଟଙ୍କା ମାଗିଥିଲେ। ତେବେ ପୁଅମାନେ ଟଙ୍କା ଦେବାକୁ ରୋକଠୋକ୍‌ ମନା କରିଦେଇଥିଲେ। ଶେଷରେ ପାଖରେ ଯାହା କିଛି ଟଙ୍କା ଥିଲା ସେଥି ସହ ଧାରଉଧାର କରି ସଲପ ମଦ ପିଇଥିଲେ। ପୁଅମାନେ ଟଙ୍କା ଦେଇନଥିବାରୁ ନିଶାଶକ୍ତ ଅବସ୍ଥାରେ ଏକ ଦଉଡ଼ି ଧରି ଏକ ଗଛ ଉପରେ ଚଢ଼ିଥିଲେ। କିନ୍ତୁ ଫାଶୀ ପାଇଁ ଗଛ ଡାଳରେ ଦଉଡ଼ି ବାନ୍ଧିବା ପୂର୍ବରୁ ଡାଳଟି ଭାଙ୍ଗିଯାଇଥିଲା ଏବଂ ସେ କଚାଡ଼ି ହୋଇ ଆଉ ଏକ ଡାଳରେ ପଡ଼ି ଯାଇଥିଲେ। ସେଠାରେ ସେ ଅନେକ ସମୟ ଝୁଲି ରହିଥିଲେ।

ପ୍ରାୟ ସନ୍ଧ୍ୟା ସମୟରେ ସେହି ରାସ୍ତା ଦେଇଯାଉଥିବା କେତେକ ଲୋକ ରାମଙ୍କୁ ଦେଖି ଅଗ୍ନିଶମ ବାହିନୀକୁ ସୂଚନା ଦେଇଥିଲେ। ପାପଡ଼ାହାଣ୍ଡି ଅଗ୍ନିଶମ ବାହିନୀ ପହଞ୍ଚି ସୁରକ୍ଷିତ ଭାବେ ରାମଙ୍କୁ ଗଛ ଉପରୁ ତଳକୁ ଓହ୍ଲାଇ ଆଣି ଘରେ ପହଞ୍ଚାଇଥିଲା।