Ram Mandir: ‘ବଡ଼ ପଦାଧିକାରୀଙ୍କୁ ସୁରକ୍ଷା ଦେବା ପାଇଁ ମୋ ଭାଇକୁ ଫସାଇ ଦିଆଯାଇଛି’

ଅଯୋଧ୍ୟା: ରାମମନ୍ଦିର ଦାନ ଚୋରି ମାମଲା ଆଜି ଏକ ନୂଆ ମୋଡ଼ ନେଇଛି। ମାମଲାରେ ଗିରଫ ହୋଇଥିବା ଜଣେ ଅଭିଯୁକ୍ତ ରାମଶଙ୍କର ଯାଦବ ଓରଫ ଟିନ୍ନୁ ଯାଦବଙ୍କ ଭାଇ ଦିନେଶ ଯାଦବ ଦାବି କରିଛନ୍ତି ଯେ, ତାଙ୍କ ଭାଇଙ୍କୁ ଏହି ମାମଲାରେ ଫସାଇ ଦିଆଯାଇଛି।

ବଡ଼ ପଦାଧିକାରୀଙ୍କୁ ସୁରକ୍ଷା ଦିଆଯାଉଛି ବୋଲି ସେ କହିଛନ୍ତି। ସେ ସିଧାସଳଖ ଭାବେ ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟ କାର୍ଯ୍ୟକର୍ତ୍ତା ଚମ୍ପତ ରାୟ ଓ ଅନିଲ ମିଶ୍ରଙ୍କୁ ଦାୟୀ କରିଛନ୍ତି। ଟିନ୍ନୁ ଯାଦବଙ୍କ ଗିରଫ ପରେ ପ୍ରଥମ ଥର ଏକ ଟେଲିଭିଜନ ସାକ୍ଷାତ୍‌କାର ଦେଇ ଦିନେଶ କହିଛନ୍ତି, ତାଙ୍କ ଭାଇଙ୍କର ଦାଗହୀନ ରେକର୍ଡ ରହିଛି ଏବଂ ସେ ଦୁଇ ଦଶନ୍ଧି ଧରି ଚମ୍ପତ ରାୟଙ୍କ ସହ କାମ କରିଛନ୍ତି। ଏବେ ତାଙ୍କୁ ଏହି ମାମଲାରେ ଫସାଇ ଦିଆଯାଇଛି। ବଡ଼ ଲୋକମାନଙ୍କୁ ସୁରକ୍ଷା ଦେବାପାଇଁ ଏଭଳି କରାଯାଇଛି। ତାଙ୍କ ଭାଇଙ୍କ ବିରୋଧରେ ହୋଇଥିବା ଅଭିଯୋଗକୁ ପ୍ରତ୍ୟାଖ୍ୟାନ କରି ସେ କହିଛନ୍ତି, ଏହା ସମ୍ପୂର୍ଣ୍ଣ ମିଥ୍ୟା ଓ ଭିତ୍ତିହୀନ।

ପ୍ରଭାବଶାଳୀ ଲୋକମାନେ ଟିନ୍ନୁ ଯାଦବଙ୍କୁ ଫସାଇ ନିଜକୁ ସୁରକ୍ଷା ଦେବାକୁ ଚେଷ୍ଟା କରୁଛନ୍ତି ବୋଲି ସେ କହିଛନ୍ତି। ସେମାନେ ତାଙ୍କୁ ବଡ଼ ଦୋଷୀ ସଜାଇ ଦେଇଛନ୍ତି। କିନ୍ତୁ ସେ ପ୍ରକୃତରେ ପାଇଛନ୍ତି କ’ଣ? କେବଳ ୧ ଲକ୍ଷ ଟଙ୍କା। ୧୮-୨୦ ଲକ୍ଷ ଟଙ୍କାର ଦୁର୍ନୀତିରେ ଟିନ୍ନୁ ସମ୍ପୃକ୍ତ ନାହାନ୍ତି ବୋଲି ସେ କହିଛନ୍ତି।

ସୌଜନ୍ୟ ସମ୍ବାଦ