Shiv Sena MLA: ‘ପଶୁମାନେ ଶବ ଖାଇଲେ ସେମାନେ ଶିକ୍ଷା ପାଇବେ’ : ଚାଷୀଙ୍କ ଆତ୍ମହତ୍ୟା ଉପରେ ଶିବସେନା ବିଧାୟକଙ୍କ ବିବାଦୀୟ ମନ୍ତବ୍ୟ

ମୁମ୍ବାଇ: ଚାଷୀଙ୍କ ଆତ୍ମହତ୍ୟାକୁ ନେଇ ମହାରାଷ୍ଟ୍ରର ଶିବସେନା ବିଧାୟକ ସଞ୍ଜୟ ଗାଏକୱାଡ ଦେଇଥିବା ଏକ ବିବାଦୀୟ ମନ୍ତବ୍ୟକୁ ନେଇ ଚର୍ଚ୍ଚା ଜୋର ଧରିଛି। ଆତ୍ମହତ୍ୟା କରୁଥିବା ଚାଷୀଙ୍କ ଶେଷକୃତ୍ୟରେ କେହି ଯୋଗ ନଦେବା ଉଚିତ ବୋଲି ସେ କହିଛନ୍ତି। ଯାହା ଦ୍ଵାରା ସେମାନଙ୍କ ଆତ୍ମା ​​ଶାନ୍ତି ପାଇବ ନାହିଁ। ସେ କହିଛନ୍ତି, ଆତ୍ମହତ୍ୟା କରୁଥିବା ଚାଷୀଙ୍କ ଶବକୁ ପଶୁମାନେ ଖାଇଲେ ଯାଇ ସେମାନେ ଶିକ୍ଷା ପାଇବେ। ଏପରି କଲେ ଅନ୍ୟ ଚାଷୀମାନେ ଆତ୍ମହତ୍ୟା କରିବାରୁ ନିବୃତ ହେବେ ବୋଲି ତାଙ୍କ ଯୁକ୍ତି।

ମହାରାଷ୍ଟ୍ରର ବୁଲଢାଣା ଅଞ୍ଚଳର ବିଧାୟକ ଗାଏକୱାଡ କହିଛନ୍ତି, ଆର୍ଥିକ ସମସ୍ୟା କିମ୍ବା ଅନ୍ୟ କୌଣସି ସଙ୍କଟରେ ପଡ଼ିଲେ ଚାଷୀମାନେ ନିଜ ଜୀବନ ହାରିବା ପରିବର୍ତ୍ତେ ସରକାର, ବିଧାୟକ କିମ୍ବା ସାଂସଦଙ୍କ ନିକଟରେ ସମସ୍ୟା ଜଣାଇବା ଉଚିତ। ସେମାନଙ୍କୁ ସହାୟତା ଯୋଗାଇ ଦେବା ପାଇଁ ଉଦ୍ୟମ କରାଯାଇପାରିବ। ଚାଷୀଙ୍କ ଆତ୍ମହତ୍ୟା ତାଙ୍କ ପତ୍ନୀ ଓ ପିଲାମାନଙ୍କୁ ଅସହାୟ ଅବସ୍ଥାରେ ଛାଡ଼ିଦିଏ ବୋଲି ସେ ମତ ଦେଇଛନ୍ତି। ମୃତଦେହକୁ ଜଙ୍ଗଲୀ ଜନ୍ତୁ ଖାଇବା ପରିସ୍ଥିତି ଅନ୍ୟମାନଙ୍କୁ ଏପରି ପଦକ୍ଷେପରୁ ଦୂରେଇ ରଖିବ ବୋଲି ମଧ୍ୟ ସେ କହିଛନ୍ତି।

ବିଧାୟକଙ୍କ ମନ୍ତବ୍ୟକୁ ବିଭିନ୍ନ ମହଲରୁ ନିନ୍ଦା

ଅନ୍ୟପକ୍ଷରେ ବିଧାୟକଙ୍କ ମନ୍ତବ୍ୟକୁ ବିଭିନ୍ନ ମହଲରୁ ନିନ୍ଦା କରାଯାଇଛି। ଚାଷୀଙ୍କ ସମସ୍ୟାକୁ ନେଇ ଏପରି ମନ୍ତବ୍ୟ ଦେବା ପରିବର୍ତ୍ତେ ଜନପ୍ରତିନିଧିମାନେ ସେମାନଙ୍କ ପ୍ରତି ସମ୍ବେଦନଶୀଳ ହେବା ଆବଶ୍ୟକ ବୋଲି ଶିବସେନା ମୁଖପାତ୍ର ସଞ୍ଜୟ ନିରୁପମ କହିଛନ୍ତି। ଚାଷୀ ସଂଗଠନର ନେତାମାନେ ମଧ୍ୟ ବିଧାୟକଙ୍କ ମନ୍ତବ୍ୟକୁ ସମାଲୋଚନା କରିଛନ୍ତି। ଫସଲ ନଷ୍ଟ, ଆର୍ଥିକ ଅଭାବ ଓ ଋଣଭାର ଭଳି ସମସ୍ୟା ଚାଷୀଙ୍କ ଜୀବନକୁ ପ୍ରଭାବିତ କରୁଥିବାବେଳେ ଏହି ଘଟଣା ଚାଷୀଙ୍କ ଦୁର୍ଦ୍ଦଶା ଓ ସେମାନଙ୍କୁ ଆବଶ୍ୟକ ସହାୟତା ଯୋଗାଇବା ପ୍ରସଙ୍ଗକୁ ପୁଣିଥରେ ସାମ୍ନାକୁ ଆଣିଛି।

ସୌଜନ୍ୟ ସମ୍ବାଦ