ଭୁବନେଶ୍ବର: ରାଜଧାନୀ ଏବେ ବିଳମ୍ବିତ ରାତିଯାଏ ରଙ୍ଗିନ ହେଉଛି। ବାର୍ରେ ଭୋର୍ଯାଏ ଜମୁଛି ମଦ ଆସର। ଡିଜେ ତାଳେ ତାଳେ ବାର୍ଗାର୍ଲଙ୍କ ନାଚ ସାଙ୍ଗକୁ ମତୁଆଲା ହେଉଛନ୍ତି ନିଶାସକ୍ତ ଯୁବକଯୁବତୀ। ମସ୍ଗୁଲ୍ ଗରାଖ ବଣ୍ଡଲ୍ ବଣ୍ଡଲ୍ ଟଙ୍କା ଉଡ଼ାଉଛନ୍ତି। କଳ୍ପନା ରୋଡ୍ରେ ଥିବା ଆଲିସାନ୍ ତଥା ରିଭର୍ ନୋ ଲିମିଟ୍ ବାର୍ରେ ଏଭଳି ଖୁଲମ୍ଖୁଲା ନିୟମ ଉଲ୍ଲଂଘନ ଖବର ପାଇ ଅବକାରୀ ବିଭାଗ ଚଢ଼ଉ କରିଛି। ବାର୍କୁ ସିଲ୍ କରିବା ସହ କର୍ମଚାରୀଙ୍କୁ ଅଟକ ରଖି ପଚରାଉଚରା ପରେ ନୋଟିସ୍ ଦେଇ ଛାଡ଼ିଦେଇଛି। ଏମିତି କେବଳ ଗୋଟିଏ ଦୁଇଟି ଘଟଣାରେ ଅବକାରୀ ବିଭାଗ ଚେଇଁଉଠୁଛି। ହେଲେ କେବଳ ଆଲିସାନ୍ ନୁହେଁ, ସହରରେ ୭୬ଟି ବାର୍ ଆଣ୍ଡ୍ ରେସ୍ତୋରାଁ ଓ ୨୨ଟି ହୋଟେଲକୁ ମଧ୍ୟ ବାର୍ ଲାଇସେନସ୍ ମିଳିଛି। ଏଥିରୁ ମଧ୍ୟ ଅଧିକାଂଶ ବାର୍ ଓ କ୍ଲବ୍ ନିୟମ ଉଲ୍ଲଂଘନ ନେଇ ଅଭିଯୋଗ ଆସିଛି।
