ୱାସିଂଟନ: ଇରାନ ଯୁଦ୍ଧ ମଧ୍ୟରେ ସାରା ବିଶ୍ୱରେ ତୈଳମୂଲ୍ୟ ଆକାଶଛୁଆଁ ହେଉଥିବାବେଳେ ପ୍ରବଳ ଚାପକୁ ଦୃଷ୍ଟିରେ ରଖି ଆମେରିକା ଏକ ବଡ଼ ନିଷ୍ପତ୍ତି ନେଇଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ପୁଣିଥରେ ସମସ୍ତଙ୍କୁ ରୁଷତୈଳ କିଣିବା ଉପରେ ଅସ୍ଥାୟୀ ଛାଡ଼ ପ୍ରଦାନ କରିଛନ୍ତି। ଆମେରିକା-ରୁଷ ତୈଳ ଛାଡ଼ ପୂର୍ବରୁ ଏପ୍ରିଲ ୧୧ ପରେ ବୃଦ୍ଧି କରିବାକୁ ସମ୍ପୂର୍ଣ୍ଣ ମନା କରାଯାଇଥିଲା। କିନ୍ତୁ ଏବେ, ଏକ ନୂତନ ବିଜ୍ଞପ୍ତି ପରେ, ଏହି ସ୍ୱତନ୍ତ୍ର ଛାଡ଼କୁ ମେ ୧୬ ପର୍ଯ୍ୟନ୍ତ ବୃଦ୍ଧି କରାଯାଇଛି। ଇରାନ ସହିତ ଚାଲିଥିବା ଯୁଦ୍ଧ ଏବଂ ହର୍ମୁଜ୍ ପ୍ରଣାଳୀରେ ଉତ୍ତେଜନା ବିଶ୍ୱ ତୈଳ ଯୋଗାଣକୁ ଗୁରୁତର ଭାବରେ ପ୍ରଭାବିତ କରିଛି। ବିଶ୍ୱର ପ୍ରାୟ ୨୦% ତୈଳ ଏବଂ ଗ୍ୟାସ ଯୋଗାଣ ଏହି ରାସ୍ତା ଦେଇ ଗତି କରେ, ଏବଂ ସେଠାରେ ଉପୁଜିଥିବା ବିପଦ ଗୁରୁତ୍ୱପୂର୍ଣ୍ଣ ହୋଇପଡ଼ିଛି। ତୈଳ ମୂଲ୍ୟ ଦ୍ରୁତ ଗତିରେ ବୃଦ୍ଧି ପାଇବା ସହିତ, ବଜାରରେ ଯୋଗାଣ ବଜାୟ ରଖିବା ପାଇଁ ଆମେରିକାକୁ ଏହି ଅସ୍ଥାୟୀ ଆଶ୍ୱସ୍ତି ପ୍ରଦାନ କରିବାକୁ ପଡିଛି। ବିଶ୍ବର ଆର୍ଥିକ ସ୍ଥିତିକୁ ଦୃଷ୍ଟିରେ ରଖି ଆମେରିକା କାହିଁକି ୟୁ-ଟର୍ଣ୍ଣ ନେଇଥିବା କୁହାଯାଉଛି।
ତେଲ ବଜାର ପାଇଁ ଆଶ୍ୱସ୍ତି ଆଣିଛି
ଏହି ଗୁରୁତ୍ୱପୂର୍ଣ୍ଣ ଘୋଷଣା ତେଲ ବଜାର ପାଇଁ ଆଶ୍ୱସ୍ତି ଆଣିଛି ଏବଂ ବ୍ରେଣ୍ଟ ଅଶୋଧିତ ତୈଳର ମୂଲ୍ୟ ଦ୍ରୁତ ଗତିରେ ହ୍ରାସ ପାଇବାରେ ଳାଗିଛି। ବ୍ରେଣ୍ଟ ଅଶୋଧିତ ତୈଳର ମୂଲ୍ୟ ପ୍ରାୟ ୯% ହ୍ରାସ ପାଇ ବ୍ୟାରେଲ ପ୍ରତି ୯୦ ଡଲାରରେ ପହଞ୍ଚିଛି। ଯାହା ଏକ ମାସ ମଧ୍ୟରେ ଏହାର ସର୍ବନିମ୍ନ ସ୍ତର। ଏହି ହ୍ରାସର ଏକ କାରଣ ହେଉଛି ଅସ୍ତ୍ରବିରତି ସମୟରେ ବାଣିଜ୍ୟିକ ଜାହାଜ ପାଇଁ ଇରାନ ଦ୍ୱାରା ହର୍ମୁଜ୍ ପ୍ରଣାଳୀ ଖୋଲିବା ଲାଗି ଗ୍ରହଣ କରାଯାଇଥିବା ଗୁରୁତ୍ବପୂର୍ଣ୍ଣ ପଦକ୍ଷେପ। ଆମେରିକାର ଟ୍ରେଜେରୀ ବିଭାଗ ଏପ୍ରିଲ ୧୭ ତାରିଖରୁ ଛାଡ଼ ପ୍ରଦାନ କରୁଥିବା ଏକ ନୂତନ ବିଜ୍ଞପ୍ତି ଜାରି କରି ଦେଶଗୁଡ଼ିକୁ ଗୁରୁତ୍ୱପୂର୍ଣ୍ଣ ଅନୁମତି ପ୍ରଦାନ କରିଛି। ଏହି ବିଜ୍ଞପ୍ତି ଅନୁଯାୟୀ, ଦେଶଗୁଡ଼ିକୁ ଏବେ ମେ ୧୬ ତାରିଖ ପର୍ଯ୍ୟନ୍ତ ରୁଷୀୟ ତୈଳ ଏବଂ ପେଟ୍ରୋଲିୟମ ଉତ୍ପାଦ କ୍ରୟ କରିବାକୁ ଅନୁମତି ଦିଆଯାଇଛି। ଏହାର ଅର୍ଥ ହେଉଛି ପ୍ରାୟ ଗୋଟିଏ ମାସ ପାଇଁ, ସମୁଦ୍ରରେ ଲୋଡ୍ ହେଉଥିବା ରୁଷୀୟ ତୈଳ କ୍ରୟ ଉପରେ କୌଣସି ଆମେରିକାର କଟକଣା ଲାଗୁ ହେବ ନାହିଁ।
ସୌଜନ୍ୟ ସମ୍ବାଦ