ଭୁବନେଶ୍ବର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗୁଜରାଟରୁ ୪୩,୩୩୦ କୋଟି ଟଙ୍କାର ନିବେଶ ପ୍ରସ୍ତାବ ନେଇ ଫେରିବାର କିଛି ଦିନ ଭିତରେ ପ୍ରକଳ୍ପଗୁଡ଼ିକୁ ଶୀଘ୍ର କାର୍ଯ୍ୟକାରୀ କରିବା ଉଦ୍ୟମ ଆରମ୍ଭ ହୋଇଛି। ମୁଖ୍ୟ ସଚିବ ଅନୁ ଗର୍ଗଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ନିବେଶ ପ୍ରସ୍ତାବଗୁଡ଼ିକ ସମ୍ପର୍କରେ ବ୍ୟାପକ ଆଲୋଚନା ହୋଇଥିଲା। ବୈଠକରୁ ଜଣାପଡ଼ିିଛି ଯେ ରାଜ୍ୟ ସରକାର ଭଦ୍ରକର ଧାମରା ଅଞ୍ଚଳରେ ବନ୍ଦରଭିତ୍ତିକ ଓ ଆନୁଷଙ୍ଗିକ ଶିଳ୍ପ ବିକାଶ କରିବାକୁ ଚାହୁଛନ୍ତି। ସେଥିପାଇଁ ଆସିଥିବା ନିବେଶ ପ୍ରସ୍ତାବଗୁଡ଼ିକୁ କାର୍ଯ୍ୟକାରୀ କରିବା ନିମନ୍ତେ ନିବେଶକମାନଙ୍କୁ ସୁବିଧାସୁଯୋଗ ଯୋଗାଇ ଦେବାକୁ ସରକାର ବିଚାର କରୁଛନ୍ତି। ଏଥି ସହିତ ଗୁଜରାଟ ଗସ୍ତରୁ ଲ୍ୟାବ୍ ଗ୍ରୋନ୍ ଡାଇମଣ୍ଡ୍ କ୍ଷେତ୍ରର କିଛି ନିବେଶ ପ୍ରସ୍ତାବ ଆସିଛି। ସେଗୁଡ଼ିକ ନିମନ୍ତେ ସ୍ଥାନ ନିରୂପଣ ଓ ଜମି ଚିହ୍ନଟ କରିବା ପ୍ରକ୍ରିୟା ତ୍ବରାନ୍ବିତ କରିବାକୁ ମୁଖ୍ୟ ସଚିବ ଶ୍ରୀମତୀ ଗର୍ଗ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
ରାଜ୍ୟରେ ‘ଲ୍ୟାବ୍ ଗ୍ରୋନ୍ ହୀରା’ ତିଆରି କରାଯିବ
ଶିଳ୍ପ ପାଇଁ ଶୀଘ୍ର ଜମି ଚିହ୍ନଟ
ସେଥିପାଇଁ ଉତ୍ସର୍ଗୀକୃତ ସ୍ଥାନ ଚିହ୍ନଟ କରାଯିବ ଯେଉଁଠାରେ ଲ୍ୟାବ୍ ଗ୍ରୋନ୍ ଡାଇମଣ୍ଡ୍ ଓ ସେହି କ୍ଷେତ୍ର ସହ ସମ୍ପର୍କିତ ଶିଳ୍ପ ସ୍ଥାପନ କରିବାକୁ ଗୁରୁତ୍ବ ପ୍ରଦାନ କରାଯିବ। ମୁଖ୍ୟମନ୍ତ୍ରୀଙ୍କ ଗୁଜରାଟ ଗସ୍ତରୁ ୪୮,୩୩୦ କୋଟି ଟଙ୍କାର ୭୧ଟି ନିବେଶ ପ୍ରସ୍ତାବ ଆସିଥିଲା ଯାହା କାର୍ଯ୍ୟକାରୀ ହେଲେ ରାଜ୍ୟରେ ୬୭,୮୩୮ ନିଯୁକ୍ତି ସୁଯୋଗ ସୃଷ୍ଟି ହେବ। ଏହି ଗସ୍ତ ସମୟରେ ୧୧,୩୦୦ କୋଟି ଟଙ୍କାର ୮ଟି ବୁଝାମଣାପତ୍ର ସ୍ବାକ୍ଷର ହୋଇଥିଲା ଓ ୩୭,୦୩୦ କୋଟି ଟଙ୍କାର ୬୩ଟି ନିବେଶ ଉଦ୍ଦେଶ୍ୟ ଫର୍ମ ମିଳିଥିଲା। ମୁଖ୍ୟମନ୍ତ୍ରୀ ଶ୍ରୀ ମାଝୀ ଅହମଦାବାଦ, ମୁନ୍ଦ୍ରା ବନ୍ଦର ଓ ବଡ଼ୋଦରାରେ ନିବେଶକମାନଙ୍କୁ ଭେଟି ପ୍ରତ୍ୟକ୍ଷ ଆଲୋଚନା କରିଥିଲେ। ମୁନ୍ଦ୍ରା ବନ୍ଦର ଗସ୍ତ ବେଳେ ସେ ଓଡ଼ିଶାରେ ବନ୍ଦରଭିତ୍ତିକ ଶିଳ୍ପ ପ୍ରତିଷ୍ଠାକୁ ଗୁରୁତ୍ବ ଦିଆଯାଉଥିବା କହିଥିଲେ।
ଗୁଜରାଟରୁ ଆସିଥିବା ନିବେଶ ପ୍ରସ୍ତାବ ସମ୍ପର୍କରେ ରୋଡ୍ମ୍ୟାପ୍ ପ୍ରସ୍ତୁତ କରିବାକୁ ବୈଠକରେ ଇପିକଲ୍ ଓ ଇଡ୍କୋ କର୍ତ୍ତୃପକ୍ଷଙ୍କ ସହ ଆଲୋଚନା ହୋଇଥିଲା। ନିବେଶ ପ୍ରସ୍ତାବଗୁଡ଼ିକୁ ନିର୍ଦ୍ଧାରିତ ସମୟ ଭିତରେ ରାଜ୍ୟସ୍ତରୀୟ ସିଙ୍ଗଲ ୱିଣ୍ଡୋ କର୍ତ୍ତୃପକ୍ଷଙ୍କ ବୈଠକରେ ମଞ୍ଜୁର କରିବାକୁ କୁହାଯାଇଥିଲା। ଏହା ବ୍ୟତୀତ ଅନ୍ୟାନ୍ୟ ପ୍ରସ୍ତାବିତ କ୍ଷେତ୍ର ଓ ପ୍ରକଳ୍ପ କାର୍ଯ୍ୟକାରିତା ସମ୍ପର୍କରେ ବିସ୍ତୃତ ଆଲୋଚନା ହୋଇଥିଲା। ବୈଠକରେ ଶିଳ୍ପ ବିଭାଗର ଅତିରିକ୍ତ ମୁଖ୍ୟ ସଚିବ ହେମନ୍ତ ଶର୍ମା, ହସ୍ତତନ୍ତ ଓ ବୟନ, ଇଲେକ୍ଟ୍ରୋନିକ୍ସ ଓ ଆଇଟି, ଇଡ୍କୋ ଓ ଇପିକଲ୍ର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ସୌଜନ୍ୟ ସମ୍ବାଦ
