ଭଞ୍ଜନଗର, ୬।୬ (ବାବୁଲା ପ୍ରଧାନ): ଗଞ୍ଜାମ ଜିଲାର ଭଞ୍ଜନଗର ଅଞ୍ଚଳର ଜଣାଶୁଣା ରକ୍ତଦାତା ତଥା ସାମାଜିକ କର୍ମୀ ଜୟକୃଷ୍ଣ ପଟ୍ଟନାୟକ ୭୯ ଥର ରକ୍ତଦାନ କରି ଭଞ୍ଜନଗର ଅଞ୍ଚଳରେ ଏକ ଉଲ୍ଲେଖନୀୟ ରେକର୍ଡ ସୃଷ୍ଟି କରିଛନ୍ତି। ଜୟକୃଷ୍ଣଙ୍କ ଏହି ସ୍ୱେଚ୍ଛାକୃତ ରକ୍ତଦାନ କାର୍ଯ୍ୟକୁ ନେଇ ବିଭିନ୍ନ ମହଲରୁ ତାଙ୍କ ପ୍ରତି ଶୁଭେଚ୍ଛା ଓ ପ୍ରଶଂସାର ସୁଅ ଛୁଟିଛି।ଶୁକ୍ରବାର ଜୟକୃଷ୍ଣଙ୍କ ଜନ୍ମଦିନ ଥିବାବେଳେ ସେ ଭଞ୍ଜନଗର ମେଡିକାଲରେ ଚିକିତ୍ସାଧୀନ ଥିବା ଜଣେ ଶିଶୁଙ୍କୁ ରକ୍ତଦାନ କରି ତାଙ୍କ ଜୀବନ ବଞ୍ଚାଇଥିଲେ।
ସୂଚନାଯୋଗ୍ୟ ଯେ, ବର୍ତ୍ତମାନ ଗ୍ରୀଷ୍ମ ପ୍ରବାହ ଚାଲିଥିବାରୁ ଅନେକ ଲୋକ ରକ୍ତଦାନ କରିବାକୁ ଅନାଗ୍ରହ ପ୍ରକାଶ କରୁଛନ୍ତି। ଫଳରେ ଭଞ୍ଜନଗର ବ୍ଲଡ୍ ବ୍ୟାଙ୍କରେ ରକ୍ତର ପର୍ଯ୍ୟାପ୍ତ ମହଜୁଦ ନାହିଁ। ଏହା ଯୋଗୁ ଅନେକ ରୋଗୀଙ୍କୁ ଆବଶ୍ୟକ ସମୟରେ ରକ୍ତ ଯୋଗାଇବା କଷ୍ଟକର ହୋଇପଡ଼ୁଛି।
ଏପରି ପରିସ୍ଥିତିରେ ଜଗନ୍ନାଥପ୍ରସାଦ ବ୍ଲକର ପଟାଙ୍ଗି ଗ୍ରାମର ହରିବନ୍ଧୁ ଖିଲାରଙ୍କ ଝିଅ ଭଞ୍ଜନଗର ମେଡିକାଲରେ ରକ୍ତ ଶିକୁଳି (ସିକେଲ ସେଲ) ରୋଗରେ ଆକ୍ରାନ୍ତ ହୋଇ ଚିକିତ୍ସାଧୀନ ଥିଲେ। ତାଙ୍କ ପାଇଁ ଏକ ୟୁନିଟ୍ ରକ୍ତ ଅତ୍ୟନ୍ତ ଆବଶ୍ୟକ ଥିଲା। କିନ୍ତୁ ବ୍ଲଡ୍ ବ୍ୟାଙ୍କରେ ରକ୍ତ ମହଜୁଦ ନଥିବାରୁ ହରିବନ୍ଧୁ ଏକ ୟୁନିଟ୍ ରକ୍ତ ଯୋଗାଡ଼ କରିବା ପାଇଁ ବିଭିନ୍ନ ସ୍ଥାନରେ ଖୋଜାଖୋଜି କରୁଥିଲେ।
ଏହି ସମୟରେ ସେ ଜୟକୃଷ୍ଣ ପଟ୍ଟନାୟକଙ୍କ ସହ ଯୋଗାଯୋଗ କରି ସହାୟତା ଲୋଡ଼ିଥିଲେ। ଏହାପରେ ଜୟକୃଷ୍ଣ ନିଜ ଜନ୍ମଦିନରେ ୭୯ତମ ଥର ପାଇଁ ରକ୍ତଦାନ କରି ଶିଶୁଟିର ଜୀବନ ବଞ୍ଚାଇଥିଲେ। ତାଙ୍କର ଏହି ମାନବିକତା ଓ ସେବାଭାବକୁ ନେଇ ସାଧାରଣରେ ପ୍ରଶଂସା କରାଯାଉଛି।
ସୌଜନ୍ୟ ଧରିତ୍ରୀ
