ମାଆ ହେବା ପରେ ବଦଳିଛି ରୁଚି

କେବଳ କାହାଣୀ ପସନ୍ଦ ହୋଇଯିବା ପରେ ସିନେମା ଦସ୍ତଖତ କରୁନାହାନ୍ତି କାଜଲ। ସିନେମାଟି ଭବିଷ୍ୟତରେ ତାଙ୍କ ପିଲା ଉପରେ କିଭଳି ପ୍ରଭାବ ପକାଇବ, ତାହା ଚିନ୍ତା କରି ହିଁ ସେ ଅଫର୍‌ ଗ୍ରହଣ କରୁଛନ୍ତି। ଏବେ ସେ ଏମିତି କାମ କରିବାକୁ ଚାହାନ୍ତି, ଯାହାକୁ ନେଇ ଭବିଷ୍ୟତରେ ତାଙ୍କ ପୁଅ ଗର୍ବ ଅନୁଭବ କରିପାରିବ। ଏହି ଚିନ୍ତାଧାରା ଏବେ ତାଙ୍କ କ୍ୟାରିୟର ସଂପର୍କିତ ନିଷ୍ପତ୍ତିର ଏକ ମୁଖ୍ୟ ନିର୍ଣ୍ଣାୟକ ପାଲଟିଛି। କାଜଲ ୨୦୨୦ ମସିହାରେ ବିବାହ କରିଥିବା ବେଳେ ୨୦୨୨ ମସିହାରେ ମାତୃତ୍ବ ଲାଭ କରିଥିଲେ।

ବିବାହ ଓ ମାତୃତ୍ୱ ପରେ ଦାୟିତ୍ୱ ବଢ଼ିଥିବା କଥା ସ୍ବୀକାର କରିଛନ୍ତି କାଜଲ। ତେଣୁ ଏବେ ସେ ଏଭଳି କାହାଣୀକୁ ଗୁରୁତ୍ୱ ଦେଉଛନ୍ତି; ଯେଉଁଥିରେ ଭଲ ବିଷୟବସ୍ତୁ ସହିତ  ସକାରାତ୍ମକ ଭାବନା ଓ ମନେରଖିବା ଭଳି ଚରିତ୍ର ଥିବ। କେବଳ ବ୍ୟାବସାୟିକ ସଫଳତା ନୁହେଁ, ଅର୍ଥପୂର୍ଣ୍ଣ ସିନେମାର ଅଂଶ ହେବାକୁ ସେ ଚାହୁଛନ୍ତି।
ଉଲ୍ଲେଖଯୋଗ୍ୟ, କାଜଲ ଆଗାମୀ ଦିନରେ ନୀତେଶ ତିୱାରିଙ୍କ ନିର୍ଦ୍ଦେଶିତ ‘ରାମାୟଣ’ରେ ନଜର ଆସିବେ। ସେଥିରେ ସେ ଲଙ୍କେଶ ରାବଣଙ୍କ ପତ୍ନୀ ମନ୍ଦୋଦରୀଙ୍କ ଭୂମିକା ନିଭାଇବେ।

ସୌଜନ୍ୟ ସମ୍ବାଦ