Deepak Dhar Dirac Medal: ପଦାର୍ଥ ବିଜ୍ଞାନରେ ଭାରତର ବଡ଼ ସଫଳତା, ପ୍ରଫେସର ଦୀପକ ଧରଙ୍କୁ ‘ଡିରାକ ମେଡାଲ’
ନୂଆଦିଲ୍ଲୀ ୧୦/୦୮: ପ୍ରସିଦ୍ଧ ଭାରତୀୟ ପଦାର୍ଥ ବିଜ୍ଞାନୀ ଦୀପକ ଧରଙ୍କୁ ଷ୍ଟାଟିଷ୍ଟିକାଲ୍ ମେକାନିକ୍ସ କ୍ଷେତ୍ରରେ ଉଲ୍ଲେଖନୀୟ ଯୋଗଦାନ ପାଇଁ ଚଳିତବର୍ଷର ସମ୍ମାନଜନକ ‘ଡିରାକ ମେଡାଲ’ ଦିଆଯିବା ଲାଗି ଘୋଷଣା ହୋଇଛି । ଏହି ପୁରସ୍କାର ଇଣ୍ଟରନ୍ୟାସନାଲ ସେଣ୍ଟର ଫର ଥିଓରେଟିକାଲ ଫିଜିକ୍ସ (ଆଇସିଟିପି)ପକ୍ଷରୁ ପ୍ରଦାନ କରାଯାଇଥାଏ । ଦ୍ୱିତୀୟ ଭାରତୀୟ ପଦାର୍ଥ ବିଜ୍ଞାନୀ ଭାବେ ଦୀପକ ଏହି ପୁରସ୍କାର ପାଇଛନ୍ତି । ଏଥିସହ “ଡିରାକ୍ ମେଡାଲ’ ପାଇଥିବା ଷ୍ଟିଫେନ୍ ହକିଂଙ୍କ ଭଳି ପ୍ରସିଦ୍ଧ ପଦାର୍ଥ ବିଜ୍ଞାନୀଙ୍କ ତାଲିକାରେ ତାଙ୍କର ନାମ ସାମିଲ ହୋଇଛି ।
ଉତ୍ତରପ୍ରଦେଶ ପ୍ରତାପଗଡ଼ର ବାସିନ୍ଦା ଦୀପକ ଆଇଏଏସ୍ ହୁଅନ୍ତୁ ବୋଲି ମା’ ଚାହୁଁଥିଲେ । କିନ୍ତୁ ବାପା ତାଙ୍କ ମନରେ ସବୁବେଳେ ବିଜ୍ଞାନ ପ୍ରତି ଆକର୍ଷଣ ସୃଷ୍ଟି କରିବାକୁ ଉଦ୍ୟମ କରୁଥିଲେ । ଘରକୁ ସେ ସବୁବେଳେ ବିଜ୍ଞାନ ଭିତ୍ତିକ ପତ୍ରିକା ଆଣୁଥିଲେ । ଧୀରେ ଧୀରେ ଦୀପକଙ୍କ ମନରେ ବିଜ୍ଞାନ ପ୍ରତି ଆଗ୍ରହ ବୃଦ୍ଧି ପାଇଲା । ୧୯୭୦ ମସିହାରେ ଆହ୍ଲାବାଦ ୟୁନିଭରସିଟିରୁ ବିଜ୍ଞାନରେ ସ୍ନାତକ ଶିକ୍ଷା ଶେଷ କରିବା ପରେ ସେ ଆଇଆଇଟି କାନପୁରରେ ଏମ୍ଏସ୍ସି ପଢ଼ିଥିଲେ । ୧୯୭୮ରେ ଆମେରିକାର କାଲିଫର୍ଣ୍ଣିଆ ଇନ୍ଷ୍ଟିଚ୍ୟୁଟ୍ ଅଫ ଟେକ୍ନୋଲୋଜିରୁ ପିଏଚ୍ଡି ଡିଗ୍ରୀ ହାସଲ କରିଥିଲେ । ସେଠାରେ ସେ ପ୍ରସିଦ୍ଧ ପଦାର୍ଥ ବିଜ୍ଞାନୀ ରିଚାର୍ଡ ଫେନମ୍ୟାନଙ୍କ ଅଧୀନରେ ରିସର୍ଚ୍ଚ ଆସିଷ୍ଟାଣ୍ଟ ଭାବେ କାମ କରିଥିଲେ ।
ସୌଜନ୍ୟ ପ୍ରମେୟ
