‘Fashionista’ Bike Thief ଧରାପଡ଼ିଲା ’ଫେସନିଷ୍ଟାକ୍’ ବାଇକ୍‌ ଚୋର, ବାର ଅନୁସାରେ ବଦଳାଉଥିଲା ପୋଷାକ

ଆଜି କଟକ-ଭୁବନେଶ୍ବର କମିସନରେଟ୍‌ ପୁଲିସ ମାନସ ରଞ୍ଜନ ପାଲ୍‌କୁ ଧରିଛି। ମାନସ କେବଳ କଟକ କିମ୍ବା ଭୁବନେଶ୍ବର ନୁହେଁ ୪-୫ ଜିଲ୍ଲାରେ ବାଇକ୍‌ ଚୋରିର ଏକ ବଡ଼ ନେଟ୍‌ୱାର୍କ ନିର୍ମାଣ କରିଥିଲା। ଗିରଫ ପରେ ପଚରାଉଚରାରେ ଚୋରିର ଅନେକ ଚମତ୍କାର କଥା ପଦାରେ ପଡ଼ିଛି। ଏହା ସହ ଗାଡ଼ିର ଅଂଶ କିଣୁଥିବା କବାଡ଼ିଆ ପୀତାମ୍ବର ବେହେରା ମଧ୍ୟ ଧରାପଡ଼ିଛି। ମାନସର ଘର ଯାଜପୁର ଜିଲ୍ଲା। ସେ ଗାଡ଼ି ଚୋରାଇବାକୁ କଟକ ଆସୁଥିଲା। ତା’ର ଟାର୍ଗେଟ୍‌ରେ ଭିଡ଼ ଅଞ୍ଚଳ ରହୁଥିଲା। ପ୍ରମୁଖ ଭାବେ ସେ କଟକର ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ୍‌ କଲେଜ ହସ୍‌ପିଟାଲ୍‌ରେ ପହଞ୍ଚୁଥିଲା। ଏଥିପାଇଁ ସେ ମାଷ୍ଟର କି ବ୍ୟବହାର କରୁଥିଲା। ଗାଡ଼ି ଚୋରି କରିବା ପରେ ଉକ୍ତ ଗାଡ଼ିର ନମ୍ବର ପ୍ଲେଟ୍‌କୁ ବଦଳାଇ ନିଜ ନାମରେ ଥିବା ଗାଡ଼ିର ନମ୍ବର ପ୍ଲେଟ୍‌ ଲେଖୁଥିଲା। କେବଳ ଏହାନୁହେଁ, ବାଇକ୍‌‌ ଚୋରାଇବାକୁ ଯିବା ବେଳେ ବାର ଅନୁସାରେ ସେ ନିଜର ପୋଷାକ ବଦଳାଉଥିଲା। ‌ଚୋରିଗାଡ଼ିକୁ କବାଡ଼ିଆକୁ ୬ରୁ ୧୦ ହଜାର ଟଙ୍କାରେ ବିକ୍ରି କରୁଥିଲା।