IIT Campus Placements: ଆଇଆଇଟିରେ କ୍ୟାମ୍ପସରୁ ଓରାକଲ୍ ସମେତ ୨୨ କମ୍ପାନି ବାଦ; ଦୁଇଟି ପ୍ଲେସ୍ମେଣ୍ଟ୍ ଋତୁରେ ସହଯୋଗ କରିବେନି
ଆଇଆଇଟିଗୁଡ଼ିକର ପ୍ଲେସ୍ମେଣ୍ଟ୍ ଓ ଇଣ୍ଟର୍ଣ୍ଣସିପ୍ ସମ୍ପର୍କିତ ନିର୍ଦ୍ଦେଶାବଳୀର ସମନ୍ୱୟ କରୁଥିବା ଅଲ୍ ଆଇଆଇଟି ପ୍ଲେସ୍ମେଣ୍ଟ୍ କମିଟି (ଏଆଇପିସି) ଚଳିତ ମାସ ଆରମ୍ଭରେ ଆଇଆଇଟି ଗୁଆହାଟୀରେ ହୋଇଥିବା ବୈଠକରେ ଏହି ନିଷ୍ପତ୍ତି ନେଇଥିଲା । ସେପ୍ଟେମ୍ବର ୩୦ ସୁଦ୍ଧା ସମ୍ପୃକ୍ତ କମ୍ପାନିଗୁଡ଼ିକୁ ଏନେଇ ଜଣାଇବାକୁ ଯୋଜନା ରହିଛି ।
ନୂଆଦିଲ୍ଲୀ : ଆଇଆଇଟିରେ ଛାତ୍ରଛାତ୍ରୀଙ୍କୁ ନିଯୁକ୍ତି ପ୍ରସ୍ତାବ ଦେଇ ପରେ ତାହାକୁ କାର୍ଯ୍ୟକାରୀ ନ କରିବା ଘଟଣାରେ ଓରାକଲ୍ ସମେତ ୨୨ଟି କମ୍ପାନି ବିରୋଧରେ କଠୋର ପଦକ୍ଷେପ ନେବାକୁ ନିଷ୍ପତ୍ତି ହୋଇଛି । ଆସନ୍ତା ଦୁଇଟି ପ୍ଲେସ୍ମେଣ୍ଟ୍ ଋତୁରେ ଏହି କମ୍ପାନିଗୁଡ଼ିକ ସହ ଆଇଆଇଟିଗୁଡ଼ିକ ସହଯୋଗ କରିବେନି । ୨୩ଟି ଆଇଆଇଟିରେ ୨୦୨୬ରେ ଉତ୍ତୀର୍ଣ୍ଣ ଛାତ୍ରଛାତ୍ରୀଙ୍କୁ ଦିଆଯାଇଥିବା ୧୫୦ରୁ ଅଧିକ ନିଯୁକ୍ତି ପ୍ରସ୍ତାବ ପାଳନ କରାଯାଇ ନଥିବାରୁ ଏହି ନିଷ୍ପତ୍ତି ହୋଇଛି ।
ଆଇଆଇଟିଗୁଡ଼ିକର ପ୍ଲେସ୍ମେଣ୍ଟ୍ ଓ ଇଣ୍ଟର୍ଣ୍ଣସିପ୍ ସମ୍ପର୍କିତ ନିର୍ଦ୍ଦେଶାବଳୀର ସମନ୍ୱୟ କରୁଥିବା ଅଲ୍ ଆଇଆଇଟି ପ୍ଲେସ୍ମେଣ୍ଟ୍ କମିଟି (ଏଆଇପିସି) ଚଳିତ ମାସ ଆରମ୍ଭରେ ଆଇଆଇଟି ଗୁଆହାଟୀରେ ହୋଇଥିବା ବୈଠକରେ ଏହି ନିଷ୍ପତ୍ତି ନେଇଥିଲା । ସେପ୍ଟେମ୍ବର ୩୦ ସୁଦ୍ଧା ସମ୍ପୃକ୍ତ କମ୍ପାନିଗୁଡ଼ିକୁ ଏନେଇ ଜଣାଇବାକୁ ଯୋଜନା ରହିଛି । ଆଇଆଇଟିଗୁଡ଼ିକ ଏହାକୁ ‘ବ୍ଲାକ୍ଲିଷ୍ଟିଂ’ ନ କହି ‘ନନ୍-କୋଅପରେସନ୍’ ବୋଲି କହିବେ । ଅର୍ଥାତ୍ ଆସନ୍ତା ଦୁଇଟି ପ୍ଲେସ୍ମେଣ୍ଟ୍ ଋତୁରେ ଏହି କମ୍ପାନିଗୁଡ଼ିକୁ କ୍ୟାମ୍ପସ୍ ନିଯୁକ୍ତି ପାଇଁ ବିଚାର କରାଯିବନି । କେତେକ କମ୍ପାନି ୧୦ରୁ ୧୫ଟି ପର୍ଯ୍ୟନ୍ତ ନିଯୁକ୍ତି ପ୍ରସ୍ତାବ ପ୍ରତ୍ୟାହାର କରିଥିବା ଜଣାପଡ଼ିଛି । ତେବେ ଏଆଇପିସି ପକ୍ଷରୁ ଚୂଡ଼ାନ୍ତ ତାଲିକା ପ୍ରସ୍ତୁତି ପ୍ରକ୍ରିୟା ଚାଲିଛି ।
ଓରାକଲ୍ ପ୍ରାୟ ୪୦ ଜଣ ଆଇଆଇଟି ଛାତ୍ରଛାତ୍ରୀଙ୍କୁ ଦେଇଥିବା ନିଯୁକ୍ତି ପ୍ରସ୍ତାବ ପାଳନ କରିନଥିବା ରିପୋର୍ଟରେ କୁହାଯାଇଛି । ଆଇଆଇଟି ଗୌହାଟୀର ଆସୋସିଏଟ୍ ପ୍ରଫେସର ଜନ୍ ଜୋସ୍ଙ୍କ ଅନୁଯାୟୀ, ଚଳିତ ବର୍ଷ ଏପର୍ଯ୍ୟନ୍ତ ଓରାକଲ୍ ଆଇଆଇଟିଗୁଡ଼ିକରେ ନିଯୁକ୍ତି ପାଇଁ ଯୋଗାଯୋଗ କରିନାହିଁ । ଆମେରିକାର ଏହି ସଫ୍ଟୱେର୍ କମ୍ପାନି ଚଳିତ ବର୍ଷ ଭାରତ ସମେତ ବିଶ୍ୱସ୍ତରରେ ହଜାର ହଜାର ଚାକିରି କମାଇଛି । ଏହି ତାଲିକାରେ ଅନେକ ଷ୍ଟାର୍ଟଅପ୍ ମଧ୍ୟ ଥିବା ଜଣାପଡ଼ିଛି ।
ସୌଜନ୍ୟ ସମ୍ବାଦ
