Delhi: ପୁଲିସ ବସ୍ରେ ପ୍ରତିବାଦକାରୀଙ୍କ ସହ ସାମ୍ବାଦିକ, କର୍ମଚାରୀଙ୍କୁ ଉଠାଇ ନିଆଗଲା
ଦିଲ୍ଲୀରେ ଶନିବାର କକ୍ରୋଚ୍ ଜନତା ପାର୍ଟି (ସିଜେପି)ର ପ୍ରସ୍ତାବିତ ପ୍ରତିବାଦକୁ ରୋକିବା ପାଇଁ ପୁଲିସର ବ୍ୟାପକ କଟକଣା ମଧ୍ୟରେ କେବଳ ଆନ୍ଦୋଳନକାରୀ ନୁହନ୍ତି, ଖବର ସଂଗ୍ରହ କରୁଥିବା ସାମ୍ବାଦିକ ଓ ଅଫିସ୍ ଯାଉଥିବା ସାଧାରଣ କର୍ମଚାରୀ ମଧ୍ୟ ଅଟକର ଶିକାର ହୋଇଛନ୍ତି
ନୂଆଦିଲ୍ଲୀ: ଦିଲ୍ଲୀରେ ଶନିବାର କକ୍ରୋଚ୍ ଜନତା ପାର୍ଟି (ସିଜେପି)ର ପ୍ରସ୍ତାବିତ ପ୍ରତିବାଦକୁ ରୋକିବା ପାଇଁ ପୁଲିସର ବ୍ୟାପକ କଟକଣା ମଧ୍ୟରେ କେବଳ ଆନ୍ଦୋଳନକାରୀ ନୁହନ୍ତି, ଖବର ସଂଗ୍ରହ କରୁଥିବା ସାମ୍ବାଦିକ ଓ ଅଫିସ୍ ଯାଉଥିବା ସାଧାରଣ କର୍ମଚାରୀ ମଧ୍ୟ ଅଟକର ଶିକାର ହୋଇଛନ୍ତି। କେତେକ ସାମ୍ବାଦିକ ପ୍ରେସ୍ ପରିଚୟପତ୍ର ଦେଖାଇବା ସତ୍ତ୍ୱେ ସେମାନଙ୍କୁ ପୁଲିସ ବସ୍ରେ ଉଠାଇ ନିଆଯାଇଥିଲା। ଅନ୍ୟପକ୍ଷରେ, କନଟ୍ ପ୍ଲେସ୍ ଅଞ୍ଚଳରେ ନିଜ କାର୍ଯ୍ୟାଳୟକୁ ଯାଉଥିବା କର୍ମଚାରୀମାନେ ମଧ୍ୟ ଏହି କଟକଣାରୁ ବାଦ୍ ପଡ଼ିନଥିଲେ।
ଶନିବାର ଦିଲ୍ଲୀର ଯନ୍ତରମନ୍ତରଠାରେ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ସିଜେପି ପ୍ରତିବାଦ ଡାକରା ଦେଇଥିଲା। ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍ଆଇଆର୍) ପ୍ରକ୍ରିୟାକୁ ନେଇ ଦଳ ଅନିୟମିତତାର ଅଭିଯୋଗ କରିଥିଲା। ଏହି ପ୍ରତିବାଦକୁ ଅନୁମତି ମିଳିନଥିବାରୁ ପୁଲିସ କେନ୍ଦ୍ରୀୟ ଦିଲ୍ଲୀରେ ବ୍ୟାପକ ବ୍ୟାରିକେଡ୍ ଲଗାଇବା ସହ ବହୁ ସଂଖ୍ୟାରେ ସୁରକ୍ଷାକର୍ମୀ ମୁତୟନ କରିଥିଲା। ରିପୋର୍ଟ ଅନୁଯାୟୀ, ଏହି ଘଟଣାର ଖବର ସଂଗ୍ରହ କରୁଥିବା ସାମ୍ବାଦିକ ଶିବାଙ୍ଗ ଶୁକ୍ଳାଙ୍କୁ ମଧ୍ୟ ପୁଲିସ ଅଟକ ରଖିଥିଲା। ସେ କହିଛନ୍ତି ଯେ ଛାତ୍ର ସଂଗଠନର ପ୍ରତିବାଦର ଖବର ସଂଗ୍ରହ କରୁଥିବାବେଳେ ତାଙ୍କୁ ଠେଲାପେଲା କରି ପୁଲିସ ବସ୍ରେ ଚଢ଼ାଇ ଦିଆଯାଇଥିଲା। ନିଜକୁ ସାମ୍ବାଦିକ ବୋଲି କହିବା ସତ୍ତ୍ୱେ ତାଙ୍କୁ ତୁରନ୍ତ ଛଡ଼ାଯାଇ ନଥିଲା। ପରେ ସେ ପରିଚୟପତ୍ର ଦେଖାଇବା ପରେ ମୁକ୍ତ ହୋଇଥିଲେ। ଅନ୍ୟ ଦୁଇ ଜଣ ସାମ୍ବାଦିକ ମଧ୍ୟ ସମାନ ପରିସ୍ଥିତିରେ ଅଟକ ହୋଇଥିଲେ। ସେମାନଙ୍କ ମଧ୍ୟରୁ ଜଣଙ୍କୁ କନଟ୍ ପ୍ଲେସ୍ରୁ ଦୂର ମିଣ୍ଟୋ ରୋଡ୍ ନିକଟରେ ଛାଡ଼ି ଦିଆଯାଇଥିବା ବେଳେ ଅନ୍ୟ ଜଣେ ଟ୍ରାଫିକ୍ ସିଗ୍ନାଲ୍ ନିକଟରେ ପୁଲିସ ବସ୍ରୁ ଓହ୍ଲାଇ ଚାଲିଯାଇଥିଲେ। ଏପରି ଘଟଣା ଘଟିବାକୁ ନେଇ ସାମ୍ବାଦିକ ସଂଗଠନଗୁଡ଼ିକ ଉଦ୍ବେଗ ପ୍ରକାଶ କରିଛନ୍ତି।
ସୌଜନ୍ୟ ସମ୍ବାଦ
