Pawan Kalyan: ଅଲଗା ହେଲେ ପୱନ କଲ୍ୟାଣ ଓ ଅନ୍ନା କୋନିଡାଲା: ୧୩ ବର୍ଷର ଦାମ୍ପତ୍ୟ ଜୀବନରେ ପୂର୍ଣ୍ଣଚ୍ଛେଦ

ଅମରାବତି: ଆନ୍ଧ୍ରପ୍ରଦେଶର ଉପମୁଖ୍ୟମନ୍ତ୍ରୀ ତଥା ପ୍ରସିଦ୍ଧ ଅଭିନେତା-ରାଜନେତା ପୱନ କଲ୍ୟାଣ ଏବଂ ତାଙ୍କ ପତ୍ନୀ ଅନ୍ନା କୋନିଡାଲା ପରସ୍ପରଠାରୁ ଅଲଗା ହୋଇଯାଇଛନ୍ତି। ଦୀର୍ଘ ୧୩ ବର୍ଷର ବୈବାହିକ ଜୀବନ ପରେ ଉଭୟ ପରସ୍ପରର ସମ୍ମତିକ୍ରମେ ଅଲଗା ହେବାକୁ ନିଷ୍ପତ୍ତି ନେଇଛନ୍ତି। ସୋମବାର ବିଳମ୍ବିତ ରାତିରେ ପୱନ କଲ୍ୟାଣଙ୍କ ଦଳ ‘ଜନସେନା‘ ପକ୍ଷରୁ ଏକ ମିଳିତ ବିବୃତି ଜାରି କରି ଏହି ସୂଚନା ଦିଆଯାଇଛି।

ବିବାହ ସମ୍ପର୍କର ଅନ୍ତ ଘଟିଛି
ଉଭୟଙ୍କ ପକ୍ଷରୁ ଜାରି ବିବୃତିରେ କୁହାଯାଇଛି ଯେ, ଜୀବନର ଏକ ଗୁରୁତ୍ୱପୂର୍ଣ୍ଣ ସମୟ ଏକାଠି ବିତାଇବା ପରେ ସେମାନେ ପରସ୍ପରର ବୁଝାମଣା ଏବଂ ସମ୍ମାନକୁ ଦୃଷ୍ଟିରେ ରଖି ଅଲଗା ହେବାକୁ ନିଷ୍ପତ୍ତି ନେଇଛନ୍ତି। ବିବାହ ସମ୍ପର୍କର ଅନ୍ତ ଘଟିଥିଲେ ମଧ୍ୟ ସେମାନେ ଭଲ ବନ୍ଧୁ ହୋଇ ରହିବେ ଏବଂ ସେମାନଙ୍କ ସନ୍ତାନମାନଙ୍କର ଲାଳନପାଳନ ଦାୟିତ୍ୱ ମିଳିତ ଭାବେ ତୁଲାଇବେ। ସନ୍ତାନମାନଙ୍କର ଖୁସି ଏବଂ ଉଜ୍ଜ୍ୱଳ ଭବିଷ୍ୟତ ସେମାନଙ୍କର ପ୍ରଥମ ପ୍ରାଥମିକତା ରହିବ ବୋଲି ସେମାନେ ସ୍ପଷ୍ଟ କରିଛନ୍ତି। ଏହି ବ୍ୟକ୍ତିଗତ ପରିବର୍ତ୍ତନ ସମୟରେ ସମସ୍ତେ ସେମାନଙ୍କର ଗୋପନୀୟତାକୁ ସମ୍ମାନ ଜଣାଇବେ ବୋଲି ସେମାନେ ଅନୁରୋଧ କରିଛନ୍ତି। ତେବେ ଏହି ନିଷ୍ପତ୍ତି ପଛର କାରଣ କିମ୍ବା ଆଇନଗତ ଛାଡ଼ପତ୍ର ପ୍ରକ୍ରିୟା ସମ୍ପର୍କରେ ବିବୃତିରେ କିଛି କୁହାଯାଇନାହିଁ।

ରୁଷିଆ ନାଗରିକ ଅନ୍ନା କୋନିଡାଲା ଏବଂ ପୱନ କଲ୍ୟାଣ ୨୦୧୩ ମସିହାରେ ବିବାହ କରିଥିଲେ। ଉଭୟଙ୍କର ଏକ ଝିଅ (ପୋଲେନା ଅଞ୍ଜନା ପୱନୋଭା) ଏବଂ ଏକ ପୁଅ (ମାର୍କ ଶଙ୍କର ପୱନୋଭିଚ୍) ଅଛନ୍ତି। ସୂଚନାଯୋଗ୍ୟ ଯେ, ଏହା ପୱନ କଲ୍ୟାଣଙ୍କ ତୃତୀୟ ବିବାହ ଥିଲା। ସେ ପ୍ରଥମେ ୧୯୯୭ରେ ନନ୍ଦିନୀଙ୍କୁ ବିବାହ କରିଥିବା ବେଳେ ୧୯୯୯ରେ ଅଲଗା ହୋଇଥିଲେ। ପରେ ୨୦୦୯ରେ ଅଭିନେତ୍ରୀ ରେଣୁ ଦେଶାଇଙ୍କୁ ବିବାହ କରିଥିଲେ, ଯାହାଙ୍କର ଦୁଇଟି ସନ୍ତାନ (ଅକିରା ନନ୍ଦନ ଏବଂ ଆଧ୍ୟା) ଅଛନ୍ତି ଏବଂ ୨୦୧୨ରେ ସେମାନଙ୍କର ମଧ୍ୟ ଛାଡ଼ପତ୍ର ହୋଇଥିଲା।

ସୌଜନ୍ୟ ସମ୍ବାଦ