Gen Z Fears Phone Calls: ଟେଲିଫୋବିଆ କଣ? ଫୋନ୍ କଲ୍ କରିବାକୁ କାହିଁକି ଡରୁଛନ୍ତି ଆଜିର ଯୁବପିଢ଼ି?

ଆଜିକାଲିର ଯୁବପିଢ଼ି ବା Gen Z ଘଣ୍ଟା ଘଣ୍ଟା ଧରି ମେସେଜ୍ କରିପାରିବେ, କିନ୍ତୁ ଗୋଟିଏ ଫୋନ୍ କଲ୍ କରିବାକୁ ହେଲେ ସେମାନଙ୍କର ଅବସ୍ଥା ଖରାପ ହୋଇଯାଏ । ଏହା କ’ଣ କେବଳ ଏକ ଅଭ୍ୟାସ, ନା ଏହା ପଛରେ ରହିଛି ‘ଟେଲିଫୋବିଆ’ ଭଳି କୌଣସି ମାନସିକ ସମସ୍ୟା? ଆସନ୍ତୁ ଜାଣିବା ଏହା କ’ଣ ଏବଂ ଏଥିରୁ କିପରି ମୁକ୍ତି ମିଳିବ।

୧. ଟେଲିଫୋବିଆ (Telephobia) କ’ଣ?

ଟେଲିଫୋବିଆ ହେଉଛି ଫୋନ୍‌ରେ କଥା ହେବାକୁ ନେଇ ସୃଷ୍ଟି ହେଉଥିବା ଭୟ କିମ୍ବା ଚିନ୍ତା। ଅନେକ ଲୋକ ଅଜଣା ବ୍ୟକ୍ତିଙ୍କ ସହ କଥା ହେବାକୁ ଡରିଥାନ୍ତି, ତ ଆଉ କେତେକ ସାମ୍ନାରେ ଥିବା ବ୍ୟକ୍ତି କ’ଣ ଭାବିବେ ସେହି ଚିନ୍ତାରେ ରହିଥାନ୍ତି। ତେଣୁ ସେମାନେ ଫୋନ୍ କରିବା ବଦଳରେ ମେସେଜ୍ କରିବାକୁ ବେଶୀ ପସନ୍ଦ କରନ୍ତି।

୨. Gen Z କାହିଁକି ମେସେଜ୍ କରିବାକୁ ପସନ୍ଦ କରନ୍ତି?

ମେସେଜ୍‌ର ସବୁଠାରୁ ବଡ଼ ସୁବିଧା ହେଉଛି ତତକ୍ଷଣାତ୍ ଉତ୍ତର ଦେବାର ଚାପ ନଥାଏ। ନିଜ ମନ ମୁତାବକ ସମୟ ନେଇ ସଠିକ୍ ଉତ୍ତର ଦେଇହୁଏ। ଏହି ପିଢ଼ି ଡିଜିଟାଲ୍ ଦୁନିଆରେ ବଢ଼ିଛନ୍ତି, ତେଣୁ ଚାଟିଂ କରିବା ସେମାନଙ୍କ ପାଇଁ ଅତ୍ୟନ୍ତ ସହଜ।

୩. ଫୋନ୍ କଲ୍ କାହିଁକି ଚିନ୍ତା ବଢ଼ାଏ?

କଲ୍ ସମୟରେ ସାମ୍ନାରେ ଥିବା ବ୍ୟକ୍ତିଙ୍କ ମୁହଁର ଭାବଭଙ୍ଗୀ ଦେଖିହୁଏ ନାହିଁ, ଯାହାଫଳରେ ସେ କ’ଣ ଭାବୁଛନ୍ତି ତାହା ବୁଝିବା କଷ୍ଟକର ହୋଇପଡ଼େ। ବହୁ ଯୁବକ-ଯୁବତୀ ଭୟ କରନ୍ତି ଯେ ସେମାନେ କିଛି ଭୁଲ୍ କହିବେ କିମ୍ବା ସାମ୍ନାରେ ଥିବା ବ୍ୟକ୍ତି ତାଙ୍କ କଥାକୁ ଭୁଲ୍ ବୁଝିବେ। ହଠାତ୍ ଆସୁଥିବା କଲ୍ ସେମାନଙ୍କୁ ପ୍ରସ୍ତୁତ ହେବାକୁ ସମୟ ଦିଏ ନାହିଁ, ଯାହା ଅସ୍ଥିରତା ସୃଷ୍ଟି କରେ।

୪. ମାନସିକ ସ୍ୱାସ୍ଥ୍ୟ ଉପରେ ପ୍ରଭାବ

ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ହେଲ୍ଥର ଗବେଷଣା ଅନୁଯାୟୀ, ଏହି ଭୟ ଚାପ, ନିଦ୍ରାହୀନତା ଏବଂ କାର୍ଯ୍ୟକ୍ଷେତ୍ରର ଚାପ ସହ ଜଡ଼ିତ। ଏହା ସିଧାସଳଖ ଜଣେ ବ୍ୟକ୍ତିଙ୍କ ମାନସିକ ସ୍ୱାସ୍ଥ୍ୟକୁ ପ୍ରଭାବିତ କରିଥାଏ।

୫. ଟେଲିଫୋବିଆରୁ ମୁକ୍ତି ପାଇବାର ଉପାୟ

ଯଦି ଆପଣ ମଧ୍ୟ ଏହି ସମସ୍ୟାର ସମ୍ମୁଖୀନ ହେଉଛନ୍ତି, ତେବେ ଏହି କିଛି ସରଳ ପଦକ୍ଷେପ ନିଅନ୍ତୁ । ବଡ଼ ବଡ଼ କଥାବାର୍ତ୍ତା ନୁହେଁ, ସାଙ୍ଗମାନଙ୍କ ସହ ଛୋଟ ଛୋଟ କଥା ହେବାରୁ ଆରମ୍ଭ କରନ୍ତୁ। କ’ଣ କହିବେ, ତାହା ପୂର୍ବରୁ ଏକ କାଗଜରେ ଲେଖି ରଖନ୍ତୁ। ଏହା ଆତ୍ମବିଶ୍ୱାସ ବଢ଼ାଇବ। ଫୋନ୍ କରିବା ପୂର୍ବରୁ ଗଭୀର ନିଶ୍ୱାସ ନେଇ ମନକୁ ଶାନ୍ତ କରନ୍ତୁ। ମନେ ରଖନ୍ତୁ, ପ୍ରତ୍ୟେକ କଲ୍ ପରଫେକ୍ଟ ହେବା ଆବଶ୍ୟକ ନାହିଁ। ଭୁଲ୍ ହେଲେ ମଧ୍ୟ ଚିନ୍ତା କରନ୍ତୁ ନାହିଁ।

ତେବେ, ଫୋନ୍ କଲ୍ ଏବଂ ଚାଟିଂ ଉଭୟ ନିଜସ୍ୱ ସ୍ଥାନରେ ଗୁରୁତ୍ୱପୂର୍ଣ୍ଣ। ସାମାଜିକ ସମ୍ପର୍କ ବଜାୟ ରଖିବା ପାଇଁ ଏହି ଭୟକୁ ଦୂର କରିବା ନିହାତି ଜରୁରୀ।

ସୌଜନ୍ୟ Prameya News7