Jantarmantar: ଯନ୍ତରମନ୍ତର ପ୍ରତିବାଦ ଉଦ୍ୟମକୁ ନେଇ ୨୦ରୁ ଅଧିକ ଏଫ୍ଆଇଆର୍
ଦିଲ୍ଲୀର ଯନ୍ତରମନ୍ତରଠାରେ ଶନିବାର ପ୍ରତିବାଦ କରିବାକୁ ଉଦ୍ୟମ ହୋଇଥିବା ଘଟଣାରେ ଦିଲ୍ଲୀ ପୁଲିସ ୨୦ରୁ ଅଧିକ ଏତଲା (ଏଫ୍ଆଇଆର୍) ରୁଜୁ କରିଛି। ପୁଲିସ କର୍ମଚାରୀଙ୍କ ଉପରେ ଆକ୍ରମଣ, ଆଇନଶୃଙ୍ଖଳା ପରିସ୍ଥିତି ସୃଷ୍ଟି ଏବଂ ସରକାରୀ କର୍ମଚାରୀଙ୍କ କାର୍ଯ୍ୟରେ ବାଧା ଦେବା ଅଭିଯୋଗରେ ଏହି ମାମଲା ରୁଜୁ ହୋଇଛି।
ନୂଆଦିଲ୍ଲୀ: ଦିଲ୍ଲୀର ଯନ୍ତରମନ୍ତରଠାରେ ଶନିବାର ପ୍ରତିବାଦ କରିବାକୁ ଉଦ୍ୟମ ହୋଇଥିବା ଘଟଣାରେ ଦିଲ୍ଲୀ ପୁଲିସ ୨୦ରୁ ଅଧିକ ଏତଲା (ଏଫ୍ଆଇଆର୍) ରୁଜୁ କରିଛି। ପୁଲିସ କର୍ମଚାରୀଙ୍କ ଉପରେ ଆକ୍ରମଣ, ଆଇନଶୃଙ୍ଖଳା ପରିସ୍ଥିତି ସୃଷ୍ଟି ଏବଂ ସରକାରୀ କର୍ମଚାରୀଙ୍କ କାର୍ଯ୍ୟରେ ବାଧା ଦେବା ଅଭିଯୋଗରେ ଏହି ମାମଲା ରୁଜୁ ହୋଇଛି। ରବିବାର ପ୍ରକାଶିତ ରିପୋର୍ଟ ଅନୁଯାୟୀ, ରାଜଧାନୀରେ ସୁରକ୍ଷା ବ୍ୟବସ୍ଥା କଡ଼ାକଡ଼ି ରହିଥିବାବେଳେ ଯନ୍ତରମନ୍ତର ଓ ଏହାର ଆଖପାଖ ଅଞ୍ଚଳରେ ଅଧିକ ସୁରକ୍ଷାକର୍ମୀ ମୁତୟନ କରାଯାଇଛି।
ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ କକ୍ରୋଚ୍ ଜନତା ପାର୍ଟି (ସିଜେପି) ଓ ଏହାକୁ ସମର୍ଥନ କରୁଥିବା ଛାତ୍ର ସଂଗଠନଗୁଡ଼ିକ ଶନିବାର ପ୍ରତିବାଦ ଡାକରା ଦେଇଥିଲେ। ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍ଆଇଆର୍) ପ୍ରକ୍ରିୟାରେ ଅନିୟମିତତା ହୋଇଥିବା ସେମାନେ ଅଭିଯୋଗ କରିଛନ୍ତି। ତେବେ ସୁରକ୍ଷାଗତ କାରଣ ଦର୍ଶାଇ ଦିଲ୍ଲୀ ପୁଲିସ ଏହି ପ୍ରତିବାଦକୁ ଅନୁମତି ଦେଇନଥିଲା। ପୁଲିସ ଅଧିକାରୀଙ୍କ କହିବା ଅନୁଯାୟୀ, ଯନ୍ତରମନ୍ତର ଏକ ସମ୍ବେଦନଶୀଳ ଅଞ୍ଚଳ। ଏହାର ନିକଟରେ ଗୁରୁତ୍ୱପୂର୍ଣ୍ଣ ସାମ୍ବିଧାନିକ ପ୍ରତିଷ୍ଠାନ ଓ ସରକାରୀ କାର୍ଯ୍ୟାଳୟ ରହିଛି। ତେଣୁ ଅନୁମତି ବିନା ସମାବେଶ କରିବା ଦ୍ୱାରା ଯାତାୟାତ ଓ ଆଇନଶୃଙ୍ଖଳା ପ୍ରଭାବିତ ହେବାର ଆଶଙ୍କା ଥିଲା। ଏହି କାରଣରୁ ଶୁକ୍ରବାରଠାରୁ ପୁଲିସ ପକ୍ଷରୁ କଡ଼ା ଚେତାବନୀ ଦିଆଯାଇଥିଲା। ଅନୁମତି ବିନା ଏକାଠି ହେବା, ସାଧାରଣ ଯାତାୟାତରେ ବାଧା ଦେବା କିମ୍ବା ହିଂସାରେ ସାମିଲ ହେବା ଘଟଣାରେ ଆଇନଗତ କାର୍ଯ୍ୟାନୁଷ୍ଠାନ ହେବ ବୋଲି ପୁଲିସ କହିଥିଲା।
ସୌଜନ୍ୟ ସମ୍ବାଦ
