Javed Akhtar: ସ୍ମିତ ମଚ୍ଛାରଙ୍କ ସାହସକୁ ପ୍ରଶଂସା, ମହାବୀର ଚକ୍ର ଦେବାକୁ ଦାବି

ନୂଆଦିଲ୍ଲୀ: ଅଭିନେତ୍ରୀ ରବୀନା ଟଣ୍ଡନ ଓ ସୋନମ କପୁରଙ୍କ ସମେତ ଅନେକ ଭାରତୀୟ ସେଲିବ୍ରିଟି ଫ୍ଲାଇଦୁବାଇର ଏକ ବିମାନରେ ଘଟିଥିବା ଘଟଣା ସମୟରେ ଭାରତୀୟ ପାଇଲଟ୍ କ୍ୟାପ୍ଟେନ୍ ସ୍ମିତ ମଚ୍ଛାରଙ୍କ ସାହସ ଓ ଉପସ୍ଥିତ ବୁଦ୍ଧିର ପ୍ରଶଂସା କରିଛନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ କହିଛନ୍ତି ଯେ, ସ୍ମିତଙ୍କ କାର୍ଯ୍ୟ ଯୋଗୁଁ ଏକ ବଡ଼ ଦୁର୍ଘଟଣା ଟଳିଯାଇଛି। ଏବେ ଜାଭେଦ ଅଖତର ମଧ୍ୟ ସ୍ମିତଙ୍କୁ ଖୋଲାଖୋଲି ପ୍ରଶଂସା କରିବା ସହ ତାଙ୍କୁ ମହାବୀର ଚକ୍ର ଦିଆଯିବା ଉଚିତ ବୋଲି କହିଛନ୍ତି।ରବୀନା ଟଣ୍ଡନ ନିଜ ଇନ୍‌ଷ୍ଟାଗ୍ରାମ ଷ୍ଟୋରିରେ ଅନେକ ପୋଷ୍ଟ ସେୟାର କରି ସ୍ମିତ ମଚ୍ଛାରଙ୍କ ସାହସିକତା ଏବଂ ବିମାନରେ ଥିବା ଯାତ୍ରୀମାନଙ୍କ ଜୀବନ ରକ୍ଷାରେ ତାଙ୍କ ଭୂମିକାକୁ ପ୍ରଶଂସା କରିଛନ୍ତି।

ଜାଭେଦ ଅଖତର କହିଲେ—ମହାବୀର ଚକ୍ର ମିଳୁ

ଜାଭେଦ ଅଖତର ଲେଖିଛନ୍ତି, ‘ସ୍ମିତ ମଚ୍ଛାରଙ୍କୁ ସଲାମ!! ନିଃସନ୍ଦେହରେ ସେ ମହାବୀର ଚକ୍ର ଭଳି ସମ୍ମାନ ପାଇବାର ଅଧିକାରୀ।’
ସମିତା ଶେଟ୍ଟୀ ଏବଂ ରିଦ୍ଧିମା କପୁର ସାହନୀଙ୍କ ସମେତ ଅନେକ ପ୍ରସିଦ୍ଧ ବ୍ୟକ୍ତି ମଧ୍ୟ ଭାରତୀୟ ପାଇଲଟଙ୍କ ସାହସିକତାର ପ୍ରଶଂସା କରିଛନ୍ତି। ଏହି ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଭିଡିଓ କଲ୍‌ ମାଧ୍ୟମରେ କ୍ୟାପ୍ଟେନ୍ ସ୍ମିତ ମଚ୍ଛାରଙ୍କ ସହ କଥା ହୋଇଥିଲେ।
ତେଲ ଆଭିଭ୍‌ ଯାଉଥିବା ଫ୍ଲାଇଦୁବାଇର ଏକ ବିମାନରେ ତାଙ୍କ କୋ-ପାଇଲଟ୍‌ ତାଙ୍କ ଉପରେ ଛୁରୀରେ ଆକ୍ରମଣ କରିଥିବା ଅଭିଯୋଗ ହୋଇଛି।

କଥାବାର୍ତ୍ତା ସମୟରେ ସ୍ମିତ ମଚ୍ଛାର ଭାବପ୍ରବଣ ହୋଇଯାଇଥିଲେ। ସେ ମୋଦୀଙ୍କୁ କହିଥିଲେ ଯେ, ତାଙ୍କ ସହ କଥା ହେବା ତାଙ୍କ ପାଇଁ ଏକ ବିଶେଷ ମୁହୂର୍ତ୍ତ। ସେ ପ୍ରଧାନମନ୍ତ୍ରୀଙ୍କୁ ନିଜର ସବୁଠାରୁ ବଡ଼ ଆଦର୍ଶ ବୋଲି ମଧ୍ୟ କହିଥିଲେ।ଭିଡିଓ କଲ୍‌ ସମୟରେ ସ୍ମିତ ମଚ୍ଛାର ମୋଦୀଙ୍କୁ କହିଥିଲେ ଯେ, ସେ ଯେତେବେଳେ କୌଣସି କଠିନ ପରିସ୍ଥିତିରେ ପଡ଼ନ୍ତି, ସେତେବେଳେ ହନୁମାନ ଚାଳିଶା ପାଠ କରନ୍ତି। ଫ୍ଲାଇଦୁବାଇ ବିମାନରେ ସଙ୍କଟର ସେହି କଠିନ ସମୟରେ ମଧ୍ୟ ସେ ହନୁମାନ ଚାଳିଶା ପଢ଼ୁଥିଲେ ।

ସୌଜନ୍ୟ ସମ୍ବାଦ