ନୂଆଦିଲ୍ଲୀ: ବଲିଉଡ୍‌ର ଜଣାଶୁଣା ନିର୍ଦ୍ଦେଶକ ଅୟାନ ମୁଖାର୍ଜୀ- ସୋସିଆଲ ମିଡିଆ ଇନଫ୍ଲୁଏନ୍ସର ତଥା ‘ଟେମ୍ପଲ୍ ଗର୍ଲ’ ନମ୍ରତା ମୋହନଙ୍କ ସାକ୍ଷାତକାର ଏବେ ଚର୍ଚ୍ଚାର ବିଷୟ ପାଲଟିଛି। ନମ୍ରତା ଟିପ୍ସ ଓ ରହସ୍ୟମୟ କଥା ଶୁଣି ଅୟାନ ଏବେ ନିଜର ଆଗାମୀ ପ୍ରୋଜେକ୍ଟ ‘ବ୍ରହ୍ମାସ୍ତ୍ର ୨’ ଆରମ୍ଭ କରିବେ। କମବ୍ୟାକ କରିବେ ରଣବୀର କପୁର।ନମ୍ରତା ମୋହନ ନିଜ ଇନଷ୍ଟାଗ୍ରାମରେ ଅୟାନଙ୍କ ସହ ଏକ ଫଟୋ ସେୟାର କରିଛନ୍ତି। ଏଥିରେ ସେ ଲେଖିଛନ୍ତି ଯେ- ଏହା ଏକ ସୌଜନ୍ୟମୂଳକ ସାକ୍ଷାତକାର। କିନ୍ତୁ ଏହି ଆଲୋଚନା ଭାରତୀୟ ମନ୍ଦିର, ହିନ୍ଦୁ ପୁରାଣ ଏବଂ ଇତିହାସ ଆଡକୁ ଚାଲିଯାଇଥିଲା। ଅୟାନ ଭାରତୀୟ ସଭ୍ୟତାର କାହାଣୀକୁ ବହୁତ ଗମ୍ଭୀରତା ଓ ସ୍ପଷ୍ଟତା ସହ ପରଦାକୁ ଆଣିବାକୁ ଚେଷ୍ଟା କରୁଛନ୍ତି ବୋଲି ସେ ପ୍ରଶଂସା କରିଛନ୍ତି।

‘ବ୍ରହ୍ମାସ୍ତ୍ର ୨’ ପାଇଁ ମିଳିଲା ସଙ୍କେତ!

ଅୟାନ ମୁଖାର୍ଜୀ ସର୍ବଦା ପୁରାଣ ଏବଂ ଆଧୁନିକ ସିନେମାର ମିଶ୍ରଣରେ ଫିଲ୍ମ ତିଆରି କରିବା ପାଇଁ ଜଣାଶୁଣା। ବ୍ରହ୍ମାସ୍ତ୍ରର ପ୍ରଥମ ଭାଗରେ ମଧ୍ୟ ଏହା ଦେଖିବାକୁ ମିଳିଥିଲା। ଏବେ ଐତିହ୍ୟ ବିଶେଷଜ୍ଞ ନମ୍ରତାଙ୍କ ସହ ଏହି ଆଲୋଚନା ପରେ, ‘ବ୍ରହ୍ମାସ୍ତ୍ର ୨’ ରେ ଭାରତୀୟ ସଂସ୍କୃତିର କିଛି ନୂଆ ଝଲକ ଦେଖିବାକୁ ମିଳିପାରେ ବୋଲି ସିନେ ପ୍ରେମୀମାନେ ଆଶା ରଖିଛନ୍ତି। ଯଦିଓ ଏନେଇ କୌଣସି ଠୋସ୍ ସୂଚନା ମିଳିନାହିଁ, ତଥାପି ଏହି ଫଟୋ ସୋସିଆଲ ମିଡିଆରେ ବେଶ୍ ଭାଇରାଲ୍ ହେବାରେ ଲାଗିଛି।

କିଏ ଏହି ନମ୍ରତା ମୋହନ?

ଇନଷ୍ଟାଗ୍ରାମରେ ନମ୍ରତାଙ୍କର ୧୮ ଲକ୍ଷରୁ ଅଧିକ ଫଲୋଅର୍ସ ଅଛନ୍ତି। ସେ ସୋସିଆଲ ମିଡିଆରେ ଭାରତୀୟ ସଂସ୍କୃତି, ପ୍ରାଚୀନ ମନ୍ଦିରର ଇତିହାସ ଏବଂ ଐତିହ୍ୟ ଉପରେ କଣ୍ଟେଣ୍ଟ ତିଆରି କରି ବେଶ୍ ଲୋକପ୍ରିୟ ହୋଇଛନ୍ତି। ସେଥିପାଇଁ ସେ ଟେମ୍ପଲ ଗାର୍ଲ ଭାବେ ପରିଚିତ। ଏହା ପୂର୍ବରୁ ନମ୍ରତାଙ୍କର କର୍ପୋରେଟ୍ ପ୍ରଫେସନରେ ୧୪ ବର୍ଷରୁ ଅଧିକ ସମୟ ଧରି ଏକ ପ୍ରଭାବଶାଳୀ କ୍ୟାରିଅର୍ ଥିଲା। ସେ ଜେପି ମୋର୍ଗାନ୍, ସିଟିବ୍ୟାଙ୍କ ଏବଂ ସାମ୍ପ୍ରତିକ ଭାବରେ, ଆମାଜନ ସମେତ କିଛି ସମ୍ମାନିତ ସଂଗଠନରେ କାମ କରିଥିଲେ। ତଥାପି ତାଙ୍କ ଜୀବନ କିଛି ଅଭାବ ରହିଥିବା ଅନୁଭବ କରୁଥିଲେ। ସେ ଆମାଜନ, ୱାଲ୍ଟ ଡିଜନି ଏବଂ ଜେପି ମୋର୍ଗାନ ଭଳି ଶ୍ରେଷ୍ଠ ବହୁରାଷ୍ଟ୍ରୀୟ କମ୍ପାନୀରୁ ତାଙ୍କର ବିଶାଳ କ୍ୟାରିଅର ଛାଡି ମନ୍ଦିର କାହାଣୀ ଭିତରେ ହଜି ଯାଇଥିଲେ।

ସୌଜନ୍ୟ Prameya News7