ପ୍ରଧାନମନ୍ତ୍ରୀ ମୋଦୀଙ୍କ ଅପିଲ୍ ପରେ ବଡ଼ ହ୍ରାସ: ସୁନା ୧୩,୦୦୦ ଟଙ୍କା ଏବଂ ରୁପା ୪୬,୦୦୦ ଟଙ୍କାରୁ ଅଧିକ ଶସ୍ତା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ମାସରେ ଦେଶବାସୀଙ୍କୁ କିଛି ଗୁରୁତ୍ୱପୂର୍ଣ୍ଣ ନିବେଦନ କରିଥିଲେ । ଆସନ୍ତା ଏକ ବର୍ଷ ଯାଏଁ ସୁନା ନ କିଣିବା ଠାରୁ ଦୂରେଇ ରହିବା ଲାଗି ପ୍ରଧାନମନ୍ତ୍ରୀ ଅପିଲ୍ କରିଥିଲେ । ପିଏମ୍ ମୋଦୀଙ୍କ ଏହି ଅପିଲ୍ ପରଠାରୁ ସୁନା ଏବଂ ରୁପା ମୂଲ୍ୟରେ ବଡ଼ ଧରଣର ହ୍ରାସ ଦେଖିବାକୁ ମିଳିଛି ।

ଇଣ୍ଡିଅନ ବୁଲିୟନ ଆସୋସିଏସନର ଡାଟା ଅନୁସାରେ, ମେ ୧୦ରେ ପ୍ରଧାନମନ୍ତ୍ରୀ ମୋଦୀ ଏହି ଅପିଲ୍ କରିଥିଲେ, ସେତେବେଳେ ୨୪ କ୍ୟାରେଟ୍ ସୁନାର ୧୦ ଗ୍ରାମ ମୂଲ୍ୟ ୧,୫୩,୧୪୦ ଟଙ୍କା ଥିଲା । ସେହିପରି ରୁପା କିଲୋ ପିଛା ୨,୬୨,୩୫୦ ଟଙ୍କା ଥିଲା । ବର୍ତ୍ତମାନ, ଜୁନ୍ ୨୮ ସୁଦ୍ଧା ସୁନା ୧୩,୨୬୭ ଟଙ୍କା ହ୍ରାସ ପାଇ ପ୍ରତି ୧୦ ଗ୍ରାମ ୧,୩୯,୮୭୩ ଟଙ୍କାରେ ପହଞ୍ଚିଛି । ସେହିପରି ରୁପା ୪୫,୮୦୯ ଟଙ୍କା ହ୍ରାସ ପାଇ ପ୍ରତି କିଲୋଗ୍ରାମ ୨,୧୬,୫୪୧ ଟଙ୍କାରେ ପହଞ୍ଚିଛି ।

ପଶ୍ଚିମ ଏସିଆରେ ବଢ଼ୁଥିବା ଉତ୍ତେଜନା ଏବଂ ଭାରତର ବର୍ଦ୍ଧିତ ଆମଦାନୀ ବିଲ୍ ଉଲ୍ଲେଖ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶବାସୀଙ୍କୁ ଅଣ-ଅତ୍ୟାବଶ୍ୟକୀୟ କ୍ରୟ ସ୍ଥଗିତ ରଖିବାକୁ ଅପିଲ୍ କରିଥିଲେ । ସେ କହିଥିଲେ ଯେ ସୁନା କିଣିବା ଏବଂ ବିଦେଶ ଯାତ୍ରା ଭଳି ଅଣ-ଅତ୍ୟାବଶ୍ୟକ ଜିନିଷ ଉପରେ ଖର୍ଚ୍ଚକୁ ଗୋଟିଏ ବର୍ଷ ପାଇଁ ଏଡାଇବା ଦ୍ଵାରା ଦେଶର ବୈଦେଶିକ ମୁଦ୍ରା ସଞ୍ଚୟ ହୋଇପାରିବ ।

ଭାରତ ବିଶ୍ୱର ସବୁଠାରୁ ବଡ଼ ସୁନା କ୍ରେତା ଏବଂ ଆମଦାନୀକାରୀ ଦେଶମାନଙ୍କ ମଧ୍ୟରୁ ଗୋଟିଏ । ଏହାର ସୁନା ଆବଶ୍ୟକତାର ଏକ ବଡ଼ ଅଂଶ ବିଦେଶରୁ ଆମଦାନୀ କରେ । ଯେତେବେଳେ ସୁନା ଆମଦାନୀ ବୃଦ୍ଧି ପାଏ, ସେତେବେଳେ ଅଧିକ ଡଲାର ଦେବାକୁ ପଡ଼େ । ଏହା ବାଣିଜ୍ୟ ନିଅଣ୍ଟ ବୃଦ୍ଧି କରିବା ସହ ବିଦେଶୀ ମୁଦ୍ରା ଭଣ୍ଡାର ଉପରେ ଚାପ ପକାଇଥାଏ ।

ପ୍ରଧାନମନ୍ତ୍ରୀଙ୍କ ନିବେଦନର କିଛି ଦିନ ପରେ, ସରକାର ସୀମା ଶୁଳ୍କ ଏବଂ କୃଷି ଭିତ୍ତିଭୂମି ଏବଂ ବିକାଶ ସେସ୍ (AIDC) ବୃଦ୍ଧି କରି ସୁନା ଏବଂ ରୁପା ଉପରେ ଆମଦାନୀ ଶୁଳ୍କକୁ ୬%ରୁ ୧୫%କୁ ବୃଦ୍ଧି କରିଥିଲେ । ମନିକଣ୍ଟ୍ରୋଲ ରିପୋର୍ଟ ଅନୁସାରେ, ଆମଦାନୀ ଶୁଳ୍କ ବୃଦ୍ଧି ନିକଟ ଭବିଷ୍ୟତରେ ସୁନା ଚାହିଦାକୁ ହ୍ରାସ କରିପାରେ । ସୁନା ଆମଦାନୀ ମଧ୍ୟ ୧୦%ରୁ ୧୫% ହ୍ରାସ ପାଇବାର ଆଶା କରାଯାଉଛି ।

ସୌଜନ୍ୟ Prameya News7