ରାତିସାରା ଫୋନ୍ ଚାର୍ଜ କଲେ ବ୍ୟାଟେରୀ ଖରାପ ହୁଏ କି? ଜାଣନ୍ତୁ କ’ଣ କହୁଛି ସ୍ମାର୍ଟ ଚାର୍ଜିଂ ଟେକ୍ନୋଲୋଜି

ନୂଆଦିଲ୍ଲୀ,୩୦/୦୯: ରାତିରେ ଶୋଇବା ପୂର୍ବରୁ ଫୋନ୍ ଦେଖିଲେ ବ୍ୟାଟେରୀ ମାତ୍ର ୨୦ରୁ ୩୦ ପ୍ରତିଶତ ରହିଛି। ଏହାପରେ ଫୋନକୁ ଚାର୍ଜରରେ ଲଗାଇ ଶୋଇପଡ଼ିବା ଏବେ ଅଧିକାଂଶ ଲୋକଙ୍କ ଦୈନନ୍ଦିନ ଅଭ୍ୟାସ। ସକାଳେ ଉଠିବା ବେଳକୁ ଫୋନ୍ ୧୦୦ ପ୍ରତିଶତ ଚାର୍ଜ ହୋଇଯାଇଥାଏ। କିନ୍ତୁ ଏଭଳି ରାତିସାରା ଫୋନ୍ ଚାର୍ଜ କରିବା ଦ୍ୱାରା କ’ଣ ବ୍ୟାଟେରୀ ଖରାପ ହୋଇଯାଏ? ପୂର୍ବରୁ ଫୋନକୁ ରାତିସାରା ଚାର୍ଜରରେ ଲଗାଇ ନ ରଖିବାକୁ ପରାମର୍ଶ ଦିଆଯାଉଥିଲା। ଏପରିକି ବ୍ୟାଟେରୀକୁ ୧୦୦ ପ୍ରତିଶତ ପର୍ଯ୍ୟନ୍ତ ଚାର୍ଜ ନକରି ୨୦ରୁ ୮୦ ପ୍ରତିଶତ ମଧ୍ୟରେ ରଖିବା ଭଲ ବୋଲି କୁହାଯାଉଥିଲା। ଏହା ପଛରେ ଲିଥିୟମ୍-ଆୟନ୍ ବ୍ୟାଟେରୀର ରାସାୟନିକ ପ୍ରକ୍ରିୟା ମୁଖ୍ୟ କାରଣ। ବାରମ୍ବାର ବ୍ୟାଟେରୀକୁ ସମ୍ପୂର୍ଣ୍ଣ ୦ ପ୍ରତିଶତ ପର୍ଯ୍ୟନ୍ତ ଖାଲି କରି ପୁଣି ୧୦୦ ପ୍ରତିଶତ ଚାର୍ଜ କରିବା ଦ୍ୱାରା ସମୟ ସହିତ ବ୍ୟାଟେରୀର କ୍ଷମତା କମିପାରେ। ତେବେ ଆଧୁନିକ ସ୍ମାର୍ଟଫୋନରେ ଚାର୍ଜିଂ ନିୟନ୍ତ୍ରଣ ପାଇଁ ଅନେକ ନୂଆ ଟେକ୍ନୋଲୋଜି ଆସିଛି।

ରାତିସାରା ଚାର୍ଜ କଲେ ଫୋନ୍ ନିଜେ ନିୟନ୍ତ୍ରଣ କରୁଛି ଚାର୍ଜିଂ:

ଆଜିକାଲିର ଅଧିକାଂଶ ସ୍ମାର୍ଟଫୋନ୍ ଚାର୍ଜିଂକୁ ନିଜେ ନିୟନ୍ତ୍ରଣ କରିପାରୁଛି। ଉଦାହରଣ ସ୍ୱରୂପ, ଆଇଫୋନ୍‌ରେ ‘Optimized Battery Charging’ ସୁବିଧା ରହିଛି। ଏହା ବ୍ୟବହାରକାରୀଙ୍କ ଦୈନନ୍ଦିନ ଚାର୍ଜିଂ ଅଭ୍ୟାସକୁ ବୁଝି ଦୀର୍ଘ ସମୟ ଫୋନ୍ ଚାର୍ଜରରେ ଲାଗି ରହିଲେ ଚାର୍ଜିଂର ଗତିକୁ ନିୟନ୍ତ୍ରଣ କରିଥାଏ। ଗୁଗଲ୍ ପିକ୍ସେଲ୍ ଫୋନରେ ମଧ୍ୟ ‘Adaptive Charging’ ଭଳି ସୁବିଧା ରହିଛି। ଏହା ବ୍ୟବହାରକାରୀଙ୍କ ଚାର୍ଜିଂ ଅଭ୍ୟାସକୁ ବୁଝି ରାତିରେ ଚାର୍ଜିଂକୁ ଧୀର କରିପାରେ, ଯାହାଦ୍ୱାରା ସାଧାରଣତଃ ଫୋନ୍ ଚାର୍ଜରରୁ ବାହାର କରିବା ସମୟ ପାଖାପାଖି ବ୍ୟାଟେରୀ ୧୦୦ ପ୍ରତିଶତରେ ପହଞ୍ଚିଥାଏ।ସାମସଙ୍ଗ୍ ଫୋନରେ ମଧ୍ୟ ବ୍ୟାଟେରୀ ସୁରକ୍ଷା ପାଇଁ ବିଭିନ୍ନ ଚାର୍ଜିଂ କଣ୍ଟ୍ରୋଲ୍ ସୁବିଧା ଦିଆଯାଇଛି। ଏହା ଦ୍ୱାରା ରାତିରେ ଦୀର୍ଘ ସମୟ ଧରି ୧୦୦ ପ୍ରତିଶତ ଚାର୍ଜରେ ବ୍ୟାଟେରୀକୁ ରଖିବାର ପ୍ରଭାବ କମାଇବାରେ ସହାୟତା ମିଳିପାରେ।

ସୌଜନ୍ୟ ପ୍ରମେୟ