ନୂଆଦିଲ୍ଲୀ,୨୬ା୯: ୨୦୨୨ରୁ ୨୦୨୬ ମଧ୍ୟରେ ପାର୍ଲାମେଣ୍ଟ କିମ୍ବା ରାଜ୍ୟ ବିଧାନସଭା ନିର୍ବାଚନ ଜିତିବା ପରେ ୧୧୧ ଏମ୍ପି ଏବଂ ବିଧାୟକ ଦଳ ବଦାଇଛନ୍ତି। ସର୍ବାଧିକ ଦଳବଦଳ ନାଗାଲାଣ୍ଡ ଏବଂ ପଶ୍ଚିମବଙ୍ଗରେ ହୋଇଥିବା ଆସୋସିଏଶନ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍) ଏବଂ ନ୍ୟାଶନାଲ ଇଲେକ୍ଶନ ଓ୍ବାଚ୍ ବିଶ୍ଳେଷଣରୁ ଜଣାପଡ଼ିଛି। ୨୬ ଲୋକ ସଭା ସଦସ୍ୟ, ୭ ରାଜ୍ୟ ସଭା ସଦସ୍ୟ ଏବଂ ୭୮ ବିଧାୟକ ଦଳ ବଦଳାଇଛନ୍ତି। ନାଗଲାଣ୍ଡରେ ସର୍ବାଧିକ ୩୨ ବିଧାୟକ ଦଳ ବଦଳାଇଥିବା ଜଣାପଡ଼ିଛି। ଏନ୍ଡିପିପିରୁ ନିର୍ବାଚିତ ୨୫ ବିଧାୟକ ଦଳ ବଦଳାଇଥିବାବେଳେ ୩୨ ଜଣ ଏନ୍ପିଏଫ୍ରେ ଯୋଗ ଦେଇଛନ୍ତି।
ପଶ୍ଚିମବଙ୍ଗରେ ୨୦ ଲୋକ ସଭା ସଦସ୍ୟ ତୃଣମୂଳ କଂଗ୍ରେସ ଟିକେଟରେ ନିର୍ବାଚିତ ହେବା ପରେ ନ୍ୟାଶନାଲିଷ୍ଟ ସିଟିଜେନ୍ସ ପାର୍ଟି ଅଫ୍ ଇଣ୍ଡିଆ (ଏନ୍ସିପିଆଇ)ରେ ସାମିଲ ହୋଇଛନ୍ତି। ସେହିପରି ତେଲଙ୍ଗାନାର ୯ ବିଧାୟକ ବିଆର୍ଏସ୍ ଟିକେଟରେ ନିର୍ବାଚନ ଜିତିବା ପରେ ଦଳ ବଦଳାଇଛନ୍ତି। ସେଥିରୁ ସର୍ବାଧିକ ବିଧାୟକ କଂଗ୍ରେସରେ ମିଶିଥିବା ଜଣାପଡ଼ିଛି। ସେହିପରି ଗୋଆରେ ୮ଟି ମାମଲା ଘଟିଛି, ଯେଉଁଠି କଂଗ୍ରେସ ବିଧାୟକମାନେ ଭାଜପାରେ ଯୋଗ ଦେଇଛନ୍ତି। ପଞ୍ଜାବରେ ୬ ଜଣ ରାଜ୍ୟ ସଭା ସଦସ୍ୟ ଏବଂ ୨ ବିଧାୟକ ଦଳବଦଳ କରିଛନ୍ତି।
ଶିବସେନା (ୟୁବିଟି) ଟିକେଟରେ ଜିତିଥିବା ୬ ଲୋକ ସଭା ସଦସ୍ୟ ଏକନାଥ ଶିନ୍ଦେଙ୍କ ଶିବସେନାରେ ଯୋଗଦେଇଛନ୍ତି। ମେଘାଳୟରେ ୬ ବିଧାୟକ, ମଣିପୁରରେ ୫, ଅରୁଣାଚଳ ପ୍ରଦେଶ ଓ ଗୁଜରାଟରେ ୪ ଜଣ ଲେଖାଏ ବିଧାୟକ ଦଳବଦଳ କରିଛନ୍ତି। ହିମାଚଳପ୍ରଦେଶ ଓ ରାଜସ୍ଥାନରେ ୨ ଜଣ ଲେଖାଏ, କର୍ନାଟକ, ମଧ୍ୟପ୍ରଦେଶ, ସିକିମ୍ ଓ ଉତ୍ତରପ୍ରଦେଶରେ ଜଣେ ଲେଖାଏ ବିଧାୟକ ଦଳ ବଦଳାଇଥିବାବେଳେ ଦିଲ୍ଲୀର ଜଣେ ରାଜ୍ୟ ସଭା ସଦସ୍ୟ ଦଳ ପରିବର୍ତ୍ତନ କରିଛନ୍ତି।
ଦଳୀୟ ଦୃଷ୍ଟିରୁ ଦେଖିଲେ ଏନ୍ଡିପିପିରୁ ସର୍ବାଧିକ ୨୫ ଜଣ ଦଳ ଛାଡ଼ିଥିବାବେଳେ ଟିଏମ୍ସିରୁ ୨୦, କଂଗ୍ରେସରୁ ୧୯, ବିଆର୍ଏସ୍ରୁ ୯, ଆମ୍ ଆଦ୍ମୀ ପାର୍ଟି (ଆପ୍) ଏବଂ ଏନ୍ସିପିରୁ ୭ ଜଣ ଲେଖାଏ, ଶିବସେନା (ୟୁବିଟି)ରୁ ୬, ଜେଡିୟୁରୁ ୫ ଏବଂ ଏନ୍ପିପିରୁ ୪ ଜଣ ଦଳ ଛାଡ଼ିଛନ୍ତି। ଏନ୍ପିଏଫ୍ରେ ସର୍ବାଧିକ ୩୨ ବିଧାୟକ ଯୋଗ ଦେଇଛନ୍ତି। ଏହା ପଛକୁ ଭାଜପାରେ ୨୯ ଏବଂ ଏନ୍ସିପିଆଇରେ ୨୦ ଜଣ ଆଇନ ପ୍ରଣେତା ମିଶିଛନ୍ତି। କଂଗ୍ରେସରେ ୯ ଜଣ, ଶିବସେନାରେ ୮, ଏନ୍ପିପିରେ ୬ ଏବଂ ଅରୁଣାଚଳର ପିପୁଲ୍ସ ପାର୍ଟିରେ ୪ ଜଣଙ୍କ ମିଶ୍ରଣ ହୋଇଛି।
ସୌଜନ୍ୟ ଧରିତ୍ରୀ
