ପାଟନା,୨୬।୯: ବିହାର ବିଧାନ ପରିଷଦ ନିର୍ବାଚନ ପୂର୍ବରୁ ପ୍ରଶାନ୍ତ କିଶୋରଙ୍କ ଦଳ ଜନ ସୁରଜକୁ ଝଟକା ଲାଗିଛି। ତିରହୁତ ଶିକ୍ଷକ ନିର୍ବାଚନମଣ୍ଡଳୀ ପାଇଁ ଦଳର ପ୍ରାର୍ଥୀ ଘୋଷଣା ହେବାର ମାତ୍ର ୨୪ ଘଣ୍ଟା ମଧ୍ୟରେ ଶିକ୍ଷକ ନେତା ଭୂଷଣ ଝା ଜନ ସୁରାଜ ଛାଡ଼ିବାକୁ ଘୋଷଣା କରିଛନ୍ତି। ସେ ଏବେ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିବେ ବୋଲି କହିଛନ୍ତି। ଭୂଷଣ ଝାଙ୍କ ଏହି ନିଷ୍ପତ୍ତି ପରେ ତିରହୁତ ଶିକ୍ଷକ ଆସନକୁ ନେଇ ଜନ ସୁରାଜକୁ ନୂଆ ପ୍ରାର୍ଥୀ ଖୋଜିବାକୁ ପଡ଼ିବ।
ଜନ ସୁରଜ ଛାଡ଼ିବା ଘୋଷଣା କରି ଭୂଷଣ ଝା ଏକାଧିକ ଅଭିଯୋଗ ଆଣିଛନ୍ତି। ତାଙ୍କ କହିବା ଅନୁସାରେ, ସମୀକ୍ଷା ବୈଠକରେ ସେ ନିଜର ମତ ରଖୁଥିବା ସମୟରେ ତାଙ୍କ ସହ ଥିବା ଶିକ୍ଷକମାନଙ୍କୁ ରେକର୍ଡିଂ କରିବାକୁ ରୋକାଯାଇଥିଲା। ଏହାସହ ଦଳ ପକ୍ଷରୁ ଧାର୍ଯ୍ୟ କରାଯାଇଥିବା କଥା ହିଁ କହିବାକୁ ତାଙ୍କୁ କୁହାଯାଇଥିବା ସେ ଅଭିଯୋଗ କରିଛନ୍ତି। ଏହି ଘଟଣା ତାଙ୍କୁ ଆପତ୍ତିଜନକ ଲାଗିଥିବା ଏବଂ ସାଥୀ ଶିକ୍ଷକମାନଙ୍କ ପରାମର୍ଶ ପରେ ସେ ଜନ ସୁରଜ ଛାଡ଼ି ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିବା ନିଷ୍ପତ୍ତି ନେଇଥିବା କହିଛନ୍ତି।
ସୂଚନା ଅନୁସାରେ, ସେପ୍ଟେମ୍ବର ୨୫ ତାରିଖରେ ମୁଜଫରପୁରର ମାଡ଼ିପୁରସ୍ଥିତ ଏକ ହୋଟେଲରେ ଏହି ସମୀକ୍ଷା ବୈଠକ ହୋଇଥିଲା। ବୈଠକରେ ପ୍ରଶାନ୍ତ କିଶୋର ମଧ୍ୟ ଉପସ୍ଥିତ ଥିଲେ। ଏହା ପରେ ହିଁ ଭୂଷଣ ଦଳ ଛାଡ଼ି ସ୍ବାଧୀନ ଭାବେ ନିର୍ବାଚନ ଲଢ଼ିବା ଘୋଷଣା କରିଥିଲେ। ତେବେ ବୈଠକରେ ହୋଇଥିବା ଘଟଣା ନେଇ ଭୂଷଣ ଯେଉଁ ଅଭିଯୋଗ କରିଛନ୍ତି, ସେଗୁଡ଼ିକ ତାଙ୍କ ନିଜସ୍ବ ଦାବି। ଏହି ଅଭିଯୋଗ ଉପରେ ଜନ ସୁରଜ ପକ୍ଷରୁ ଦିଆଯାଇଥିବା ପ୍ରତିକ୍ରିୟା ମିଳିଲେ ଘଟଣାର ଅନ୍ୟ ପକ୍ଷ ମଧ୍ୟ ସ୍ପଷ୍ଟ ହେବ।
ବିହାର ବିଧାନ ପରିଷଦର ୮ଟି ଆସନ ପାଇଁ ଅକ୍ଟୋବର ୨୩ରେ ନିର୍ବାଚନ ହେବାକୁ ଥିବାବେଳେ ଅକ୍ଟୋବର ୨୭ରେ ଭୋଟ ଗଣତି ହେବ। ଜନ ସୁରଜ ପୂର୍ବରୁ ୫ଟି ଆସନ ପାଇଁ ପ୍ରାର୍ଥୀ ଘୋଷଣା କରିଥିଲା। ଏହାପରେ ଗୁରୁବାର ଆଉ ୩ଟି ଆସନ ପାଇଁ ପ୍ରାର୍ଥୀଙ୍କ ନାମ ଘୋଷଣା କରାଯାଇଥିଲା। ତିରହୁତ ଶିକ୍ଷକ ନିର୍ବାଚନମଣ୍ଡଳୀର ପ୍ରାର୍ଥୀ ଭାବେ ଭୂଷଣଙ୍କ ନାମ ଘୋଷଣା ପରେ ଏବେ ତାଙ୍କ ଦଳ ଛାଡ଼ିବା ଘଟଣା ଜନ ସୁରଜ ପାଇଁ ନୂଆ ସମୀକରଣ ସୃଷ୍ଟି କରିଛି।
ସୌଜନ୍ୟ ଧରିତ୍ରୀ
