CJP ଆନ୍ଦୋଳନ ଭିତରେ କେନ୍ଦ୍ର ସରକାରଙ୍କ ଠାରେ ବଡ଼ ଦାବି କଲେ ମୁଖ୍ୟମନ୍ତ୍ରୀ ବିଜୟ: NEET ପରୀକ୍ଷାକୁ…
ନୂଆଦିଲ୍ଲୀ,୨୨।୭: କକ୍ରୋଚ ଜନତା ପାର୍ଟି (CJP)ର ପ୍ରଦର୍ଶନ ଏବଂ ବିବାଦ ଭିତରେ ତମିଲନାଡୁ ମୁଖ୍ୟମନ୍ତ୍ରୀ ବିଜୟ ଥଲାପତି କେନ୍ଦ୍ର ସରକାରଙ୍କ ନିକଟରେ ଏକ ବଡ଼ ଦାବି ରଖିଛନ୍ତି। ସେ ଦାବି କରିଛନ୍ତି ଯେ NEET ପରୀକ୍ଷାକୁ ସମ୍ପୂର୍ଣ୍ଣ ଭାବରେ ବାତିଲ କରାଯାଉ। ଏହାସହ ସିଏମ ବିଜୟ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଧାରଣା ସମୟରେ ଅଟକ ରଖାଯିବା ଘଟଣାକୁ ନେଇ ମଧ୍ୟ ନିଜର ପ୍ରତିକ୍ରିୟା ରଖିଛନ୍ତି।
ବିଜୟଙ୍କ ଦଳ ‘ଟିଭିକେ’ (TVK) ‘ଏକ୍ସ’ରେ ଏକ ପୋଷ୍ଟ କରି ଲେଖିଛି, ‘NEET ପରୀକ୍ଷା ଲାଗୁ ହେବା ପରଠାରୁ କେବଳ ଏହାର ବିଶ୍ୱସନୀୟତା କ୍ଷୁଣ୍ଣ ହୋଇନାହିଁ, ବରଂ ଛାତ୍ରୀଛାତ୍ରମାନେ ମାନସିକ ଚାପର ସମ୍ମୁଖୀନ ହେଉଛନ୍ତି ଏବଂ ସେମାନଙ୍କ ଭବିଷ୍ୟତର ସ୍ବପ୍ନଗୁଡ଼ିକ ଏକ ବଡ଼ ପ୍ରଶ୍ନବାଚୀରେ ପରିଣତ ହୋଇଛି।’ ଟିଭିକେ ପକ୍ଷରୁ କୁହାଯାଇଛି ଯେ NEET ପରୀକ୍ଷା କାରଣରୁ ପ୍ରତିବର୍ଷ ଛାତ୍ରୀଛାତ୍ରଙ୍କୁ ହେଉଥିବା କ୍ଷତି କମିବାର ନାଁ ନେଉନାହିଁ। ଏହି କାରଣରୁ ଆମେ କେନ୍ଦ୍ର ସରକାରଙ୍କ ନିକଟରେ NEET ପରୀକ୍ଷାକୁ ସମ୍ପୂର୍ଣ୍ଣ ରୂପେ ସମାପ୍ତ କରିବା ପାଇଁ ଦୃଢ଼ ଦାବି କରୁଛୁ।
ପ୍ରଧାନମନ୍ତ୍ରୀ ଆବାସ ବାହାରେ ଧାରଣାରେ ବସିଥିବା ରାହୁଲ ଗାନ୍ଧୀ, ମଲ୍ଲିକାର୍ଜୁନ ଖାର୍ଗେ ଏବଂ ପ୍ରିୟଙ୍କା ଗାନ୍ଧୀଙ୍କ ସମେତ ବଡ଼ ବଡ଼ ନେତାଙ୍କୁ ଅଟକ ରଖାଯିବା ଘଟଣାକୁ ନେଇ ‘ଟିଭିକେ’ (TVK) କହିଛି ଯେ ରାଜଧାନୀରେ ଏଭଳି ଗଣତନ୍ତ୍ରର ଦମନ ଅତ୍ୟନ୍ତ ନିନ୍ଦନୀୟ।
ଟିଭିକେ ପକ୍ଷରୁ ଲେଖାଯାଇଛି, ‘ଦିଲ୍ଲୀରେ ଯୁବବର୍ଗଙ୍କ ଅହିଂସକ ପ୍ରଦର୍ଶନର ସମର୍ଥନରେ ଓହ୍ଲାଇଥିବା ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଦିଲ୍ଲୀ ପୋଲିସ ଦ୍ୱାରା ଘୋଷାଡ଼ି ନେବା ଗଣତାନ୍ତ୍ରିକ ଅଧିକାର ଉପରେ ଏକ ଖୋଲା ଆକ୍ରମଣ। ଏହା ଅତ୍ୟନ୍ତ ନିନ୍ଦନୀୟ ଅଟେ।’
ସୌଜନ୍ୟ ଧରିତ୍ରୀ
