Supreme Court: ଦୁଷ୍କର୍ମ ବୃଦ୍ଧିକୁ ନେଇ ଉଦ୍‌ବେଗ ପ୍ରକାଶ କଲେ ସୁପ୍ରିମ୍‌କୋର୍ଟ, ସାଧାରଣ ସ୍ଥାନ ମହିଳା ଓ ଶିଶୁଙ୍କ ପାଇଁ ବିପଜ୍ଜନକ ହେବା ଉଚିତ ନୁହେଁ

ଜଷ୍ଟିସ୍‌ ଜେ.ବି. ପାର୍ଦିୱାଲା ଓ କେ. ବିନୋଦ ଚନ୍ଦ୍ରନ୍‌ଙ୍କ ଖଣ୍ଡପୀଠ ଦିଲ୍ଲୀ-ଏନ୍‌ସିଆର୍‌ରେ ବାରମ୍ବାର ଘଟୁଥିବା ଯୌନ ଅପରାଧ ସମ୍ପର୍କିତ ଖବର ଉପରେ ଗୁରୁତ୍ୱ ଦେଇ କହିଛନ୍ତି ଯେ ଏହି ଘଟଣାଗୁଡ଼ିକ ଆଇନ ପ୍ରବର୍ତ୍ତନ ସଂସ୍ଥା ଓ ସାଧାରଣ ପ୍ରଶାସନର ବିଫଳତାକୁ ସ୍ପଷ୍ଟ କରୁଛି। ମାମଲାରେ ଦାୟିତ୍ୱ ନିର୍ଦ୍ଧାରଣ ଉପରେ ମଧ୍ୟ ଖଣ୍ଡପୀଠ ଗୁରୁତ୍ୱ ଦେଇଛନ୍ତି।

ଦିଲ୍ଲୀ-ଏନ୍‌ସିଆର୍‌ରେ ଘଟୁଛି ନିର୍ଭୟା କାଣ୍ଡ ପରି ଘଟଣା

ସୁପ୍ରିମ୍‌କୋର୍ଟ ଯେଉଁ ଘଟଣାଗୁଡ଼ିକୁ ନଜରକୁ ନେଇଛନ୍ତି, ସେଥିମଧ୍ୟରେ ଦକ୍ଷିଣ-ପୂର୍ବ ଦିଲ୍ଲୀର କାଲକାଜୀ ମନ୍ଦିର ନିକଟ ଆସ୍ଥା କୁଞ୍ଜ ପାର୍କରେ ୨୧ ସେପ୍ଟେମ୍ବରରେ ଜଣେ ୧୭ ବର୍ଷୀୟା ନାବାଳିକାଙ୍କୁ ତିନିଜଣ ଯୁବକ ପୁଲିସ ପରିଚୟ ଦେଇ ଦୁଷ୍କର୍ମ କରିଥିବା ଅଭିଯୋଗ ରହିଛି। ଏହି ମାମଲାରେ ଆସିଫ୍‌, ହେମନ୍ତ ଓ ମୁକେଶଙ୍କୁ ଗିରଫ କରାଯାଇଛି। ଏହାବ୍ୟତୀତ ଦିଲ୍ଲୀର ସ୍ୱରୂପ ନଗରରେ ଜଣେ ୧୬ ବର୍ଷୀୟା ନାବାଳିକାଙ୍କୁ ଗଣଦୁଷ୍କର୍ମ ପରେ ହତ୍ୟା କରାଯାଇଥିଲା।