ଢାକା: ବାଂଲାଦେଶ ଏବଂ ଭାରତୀୟ ଗୁପ୍ତଚର ସଂସ୍ଥାଗୁଡ଼ିକ ଜାଣିବାକୁ ପାଇଛନ୍ତି ଯେ, ଜମାତ-ଏ-ଇସଲାମି ପକ୍ଷରୁ ପ୍ରଧାନମନ୍ତ୍ରୀ ତାରିକ ରହମାନଙ୍କ ବିଏନପି ସରକାରକୁ କ୍ଷମତାଚ୍ୟୁତ କରିବାକୁ ଚେଷ୍ଟା କରାଯାଉଛି। ସେମାନଙ୍କର ଲକ୍ଷ୍ୟ ହେଉଛି ବିବାଦୀୟ ଜୁଲାଇ ଚାର୍ଟର ଉପରେ ଆଧାରିତ ଏକ ବିପ୍ଳବୀ ସରକାର ଗଠନ କରିବା, ଯାହା ବାଂଲାଦେଶରେ ଏକ ଶରିଆ-ଭିତ୍ତିକ ଇସଲାମିକ ରାଷ୍ଟ୍ର ପ୍ରତିଷ୍ଠା କରିବାକୁ ଲକ୍ଷ୍ୟ ରଖିଛି।
ମହମ୍ମଦ ୟୁନୁସଙ୍କ ନିକଟତର ଯୁବ ନେତାମାନଙ୍କ ଦ୍ୱାରା ଗଠିତ ନ୍ୟାସନାଲ ସିଟିଜେନ୍ସ ପାର୍ଟି(ଏନସିପି) ବର୍ତ୍ତମାନର ରାଷ୍ଟ୍ରପତି ମିର୍ଜା ଫଖରୁଲ ଇସଲାମ ଆଲମଗିରଙ୍କୁ ହଟାଇ ତାଙ୍କ ସ୍ଥାନରେ ୟୁନୁସଙ୍କୁ ରାଷ୍ଟ୍ରପତି କରିବା ପାଇଁ ଆନ୍ଦୋଳନର ନେତୃତ୍ୱ ନେବାକୁ ଯୋଜନା କରୁଥିବା ଜଣାପଡ଼ିଛି। ଏହାକୁ ନେଇ ଦିଲ୍ଲୀରେ ମଧ୍ୟ ଚର୍ଚ୍ଚା ଆରମ୍ଭ ହୋଇଛି। ରିପୋର୍ଟ ଅନୁଯାୟୀ ଭାରତର ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ସମ୍ପ୍ରତି ଢାକାକୁ ଏକ ଗୁପ୍ତ ଗସ୍ତ କରିଥିଲେ ଯେଉଁଥିରେ ସେ ତାରିକ ରହମାନଙ୍କ ସରକାରଙ୍କ ସହିତ ଏହି ପ୍ରସଙ୍ଗ ଉପରେ ଆଲୋଚନା କରିଥିଲେ।
ୟୁନୁସଙ୍କୁ ରାଷ୍ଟ୍ରପତି କରିବା ପାଇଁ ଆନ୍ଦୋଳନର ନେତୃତ୍ୱ ନେବାକୁ ଯୋଜନା
ଇସଲାମିକ ମେଣ୍ଟର ନେତାମାନେ ଏବଂ ସେମାନଙ୍କର ରଣନୈତିକ ଯୋଜନାରେ ସାମିଲ ଅବସରପ୍ରାପ୍ତ ସେନା ଅଧିକାରୀଙ୍କ ଏକ ଗୋଷ୍ଠୀ ବର୍ତ୍ତମାନର ବିଏନପି ସରକାର ଉପରେ କ୍ଷୁବ୍ଧ କାରଣ ସରକାର ଜୁଲାଇ ଚାର୍ଟରକୁ କାର୍ଯ୍ୟକାରୀ କରିବାକୁ ଏବଂ ଏକ ନୂତନ ଇସଲାମିକ ସମ୍ବିଧାନ ପ୍ରଣୟନ କରିବାକୁ ମନା କରୁଛନ୍ତି। ସେମାନେ ବିଶ୍ୱାସ କରୁଛନ୍ତି ଯେ, ଭାରତ ବିଏନପିକୁ ସମର୍ଥନ କରି ଆୱାମୀ ଲିଗ୍ ଭୋଟରଙ୍କ ସହାୟତାରେ ସେମାନଙ୍କର ବିଜୟ ସୁନିଶ୍ଚିତ କରାଇ କ୍ଷମତା ହାସଲ କରିବାର ସେମାନଙ୍କର ପ୍ରୟାସକୁ ବିଫଳ କରିଛି। ଏହି ଯୋଜନାକୁ ପାକିସ୍ତାନ, ତୁର୍କୀ ଏବଂ ଆମେରିକାର ‘ଡିପ୍ ଷ୍ଟେଟ’ର ଏକ ଅଂଶ ସମର୍ଥନ କରୁଛି।
ଡିପ୍ ଷ୍ଟେଟ୍ ହେଉଛି ସରକାରଙ୍କ ଭିତରେ କାର୍ଯ୍ୟ କରୁଥିବା ଏକ ଗୁପ୍ତ, ଅଣନିର୍ବାଚିତ ନେଟୱାର୍କ ଯାହା ନିର୍ବାଚିତ ନେତାଙ୍କ ନିୟନ୍ତ୍ରଣ ବାହାରେ, ପରଦା ପଛରେ କାର୍ଯ୍ୟ କରି ଦେଶର ନୀତି ଏବଂ ବ୍ୟବସ୍ଥାକୁ ପ୍ରଭାବିତ କରିଥାଏ। ବିବିସିର ପୂର୍ବତନ ସାମ୍ବାଦିକ ଏବଂ ବର୍ତ୍ତମାନ ମିଆଁମାରର ଶୀର୍ଷ ଗଣମାଧ୍ୟମ ଗୋଷ୍ଠୀ ମିଜିମାରର ବରିଷ୍ଠ ସମ୍ପାଦକ ସୁବିର ଭୌମିକ ଏକ ତଦନ୍ତ ରିପୋର୍ଟରେ ଏହା ପ୍ରକାଶ କରିଛନ୍ତି। ରିପୋର୍ଟ ଅନୁଯାୟୀ, ଲକ୍ଷ୍ୟ ହେଉଛି ତାରିକ ରହମାନଙ୍କ ସରକାରଙ୍କୁ କ୍ଷମତାରୁ ହଟାଇ ଦେଶରେ ଏକ ମୌଳିକ ଇସଲାମିକ ଶାସନ ପ୍ରତିଷ୍ଠା କରିବା। ଏହାର ମାଷ୍ଟରମାଇଣ୍ଡ ହେଉଛନ୍ତି ମହମ୍ମଦ ୟୁନୁସ୍।
ଦି ଫେଡେରାଲରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ପୂର୍ବତନ ବ୍ରିଗେଡିୟର ଅବଦୁଲ୍ଲାହିଲ ଅମାନ ଆଜମିଙ୍କ ନେତୃତ୍ୱରେ ଇସଲାମିକ ରଣନୀତିକାରମାନେ କ୍ଷମତା ଦଖଲ କରିବା ପାଇଁ ଦୁଇ ପର୍ଯ୍ୟାୟ ଯୋଜନା ପ୍ରସ୍ତୁତ କରିଛନ୍ତି। ଆଜମିଙ୍କ ଯୋଜନାର ପ୍ରଥମ ପର୍ଯ୍ୟାୟ ହେଉଛି ‘ଅପରେସନ ଦୋମୋନ’(ଦମନ)। ଏହାର ଉଦ୍ଦେଶ୍ୟ ହେଉଛି ଆୱାମୀ ଲିଗକୁ ସମାପ୍ତ କରିବା। କାରଣ ଦଳ ବହିଷ୍କୃତ ପ୍ରଧାନମନ୍ତ୍ରୀ ଶେଖ ହସିନାଙ୍କ ପ୍ରତ୍ୟାବର୍ତ୍ତନ ମାଧ୍ୟମରେ ପୁନର୍ବାର କ୍ଷମତା ହାସଲ କରିବାକୁ ଚେଷ୍ଟା କରୁଛି। ରିପୋର୍ଟ ଅନୁଯାୟୀ,ବାଂଲାଦେଶର ଶୀର୍ଷ ଗୁଇନ୍ଦା ଅଧିକାରୀମାନେ, ତାଙ୍କ ଦଳ ଏବଂ ତତ୍କାଳୀନ ଗୃହମନ୍ତ୍ରୀ ସଲାହୁଦ୍ଦିନଙ୍କ ସହିତ ଆଜମିଙ୍କ ଗୁପ୍ତ ଆଲୋଚନା ବିଷୟରେ ଜାଣିଥିବା ବରିଷ୍ଠ ସାମ୍ବାଦିକ ସୁବୀର ଭୌମିକଙ୍କୁ କହିଛନ୍ତି, ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ବାଂଲାଦେଶ ଫେରିବା ଘୋଷଣାକୁ ଦୃଷ୍ଟିରେ ରଖି ଆୱାମୀ ଲିଗକୁ ସମାପ୍ତ କରିବାର ଯୋଜନା ଗ୍ରହଣ କରାଯାଇଥିଲା। ଆୱାମୀ ଲିଗ ନିଷିଦ୍ଧ ରହିଛି, ତଥାପି ଦେଶର ସବୁଠାରୁ ବଡ଼ ଗଣଦଳ ରହିଛି। ସେମାନେ ଭୟ କରୁଛନ୍ତି, ଶେଖ ହାସିନା ପୁନର୍ବାର କ୍ଷମତା ହାସଲ କରିପାରନ୍ତି।
ଆୱାମୀ ଲିଗ୍ ସମର୍ଥନ ବନ୍ଦ କରିବାକୁ ଚାପ
୧୯୭୧ ଯୁଦ୍ଧ ସମୟରେ ଜମାତ-ଏ-ଇସଲାମିର ଆମୀର ଗୁଲାମ ଆଜମଙ୍କ ପୁଅ ବ୍ରିଗେଡିୟର ଆଜମୀ ଏହି କ୍ଷମତା ଦଖଲ ଯୋଜନା ପ୍ରସ୍ତୁତ କରିଛନ୍ତି। ଏହି ଯୋଜନାକୁ ଜମାତ-ଏ-ଇସଲାମି ଏବଂ ଅନ୍ୟାନ୍ୟ ଇସଲାମିକ ଦଳଗୁଡ଼ିକ ଏବଂ ପରେ ସେନା ମୁଖ୍ୟ ଜେନେରାଲ ୱାକାର-ଉଜ-ଜମାନ ନିଜେ ଅନୁମୋଦନ କରିଥିବା କୁହାଯାଉଛି। ଏହି ଯୋଜନାରେ ବାଂଲାଦେଶର ସମସ୍ତ ୬୪ ଜିଲ୍ଲାରେ ୧୫ ରୁ ୨୦ ସକ୍ରିୟ ଆୱାମୀ ଲିଗ୍ ନେତାଙ୍କୁ ବାଛିବା ପାଇଁ ଇସଲାମିକ ମୌଳବାଦୀମାନଙ୍କୁ ବ୍ୟବହାର କରାଯାଇଛି। ‘ଅପରେସନ ଦୋମୋନ’ର ତୃତୀୟ ଦିଗ ହେଉଛି ହିନ୍ଦୁମାନଙ୍କ ବିରୋଧରେ ଟାର୍ଗେଟ କିଲିଂ ଏବଂ ବଟି ଆଦାୟ। ଏହା ଭାରତର ବିଜେପି ସରକାରଙ୍କୁ ହସିନା ଏବଂ ଆୱାମୀ ଲିଗ୍ ସମର୍ଥନ ବନ୍ଦ କରିବାକୁ ଚାପ ପକାଇବା ପାଇଁ ଉଦ୍ଦିଷ୍ଟ ହେବ। ରିପୋର୍ଟ ଅନୁଯାୟୀ, ଅପରେସନ୍ ଦୋମୋନର ଏକ ଅଂଶ ଭାବରେ, ଗୋଷ୍ଠୀର ନେତା, ବାଂଲାଦେଶୀ ଗୁପ୍ତଚର ସଂସ୍ଥା ଡିଜିଏଫଆଇର ପୂର୍ବତନ ମୁଖ୍ୟ ରେଜାକୁଲ୍ ହାଇଦର ଚୌଧୁରୀ ସମ୍ପ୍ରତି ତୁର୍କୀ ଗସ୍ତ କରିଥିଲେ। ସେ ଇସଲାମିକ୍ ମିଲିସିଆ ପାଇଁ ଅସ୍ତ୍ରଶସ୍ତ୍ର ଚୁକ୍ତି ପାଇଁ ଆଲୋଚନା କରିବାକୁ ସେଠାକୁ ଯାଇଥିଲେ। ୮,୮୦୦ ମୌଳବାଦୀ ମନୋଭାବ ଥିବା ମୁସଲିମ୍ ଯୁବବର୍ଗଙ୍କୁ ପୂର୍ବରୁ ଚୟନ କରାଯାଇସାରିଛି ଏବଂ ସେମାନେ ଏକ ମାସ ଧରି ଯୁଦ୍ଧ ତାଲିମ ନେଉଛନ୍ତି।
ସୌଜନ୍ୟ ସମ୍ବାଦ
