SI recruitment exam scam: ଏସ୍‌ଆଇ ନିଯୁକ୍ତି ପରୀକ୍ଷା କେଳେଙ୍କାରୀ: ୯ ସ୍ଥାନରେ ଇଡି ଚଢ଼ଉ, କୋଟି କୋଟି ଟଙ୍କା କାରବାରର ଖୋଳତାଡ଼

ଓଡ଼ିଶା ପୁଲିସରେ ଏସ୍‌ଆଇ ଓ ଅନ୍ୟ ସମକକ୍ଷ ପଦବିରେ ମୋଟ ୯୩୩ ପଦବିରେ ନିଯୁକ୍ତି ପାଇଁ ପରୀକ୍ଷା ଆୟୋଜନ କରାଯାଇଥିଲା। ଏଥିରେ ୬୦୯ଟି ପୁଲିସ ଏସ୍‌ଆଇ ପଦ ସମେତ ସଶସ୍ତ୍ର (ଆର୍ମଡ୍‌) ଏସ୍‌ଆଇ, ଫାୟାର ଷ୍ଟେସନ୍‌ ଅଫିସର ଓ ଆସିଷ୍ଟାଣ୍ଟ ଜେଲର୍‌ ପଦ ରହିଥିଲା। ଓଡ଼ିଶା ପୁଲିସ ନିଯୁକ୍ତି ବୋର୍ଡ (ଓପିଆର୍‌ବି) ପକ୍ଷରୁ କେନ୍ଦ୍ରୀୟ ସରକାରୀ ଉଦ୍ୟୋଗ ଆଇଟିଆଇ ଲିମିଟେଡ୍‌କୁ ପରୀକ୍ଷା ପରିଚାଳନା ଦାୟିତ୍ବ ଦିଆଯାଇଥିଲା। କିନ୍ତୁ ପରବର୍ତ୍ତୀ ସମୟରେ ଏହି କାମ ସିଲିକନ୍‌ ଟେକ୍‌ ଲ୍ୟାବ୍‌ ଏବଂ ପଞ୍ଚ ସଫ୍ଟ ଟେକ୍ନୋଲୋଜି ଭଳି ଘରୋଇ ସଂସ୍ଥାକୁ ହସ୍ତାନ୍ତର କରାଯାଇଥିଲା। ପ୍ରଶ୍ନପତ୍ର ପ୍ରସ୍ତୁତି, ମୁଦ୍ରଣ ଓ ପରୀକ୍ଷା ପରିଚାଳନାରେ ସ୍ବଚ୍ଛତାକୁ ନେଇ ଏହି ସଂସ୍ଥାଗୁଡ଼ିକର ଭୂମିକା ସନ୍ଦେହ ଘେରକୁ ଆସିଥିଲା। ୨୦୨୫ ମାର୍ଚ୍ଚରେ ପରୀକ୍ଷା ଆୟୋଜନକୁ ନେଇ ବିବାଦ ପରେ ଏହା ଅକ୍ଟୋବର ୫ ଓ ୬ ତାରିଖକୁ ପୁନଃଧାର୍ଯ୍ୟ ହୋଇଥିଲା। ମାତ୍ର ପରୀକ୍ଷା ପୂର୍ବରୁ ପ୍ରଶ୍ନପତ୍ର ଯୋଗାଇବା ନାଁରେ ପ୍ରାର୍ଥୀଙ୍କଠାରୁ ଟଙ୍କା ଆଦାୟ ଏବଂ ଅନ୍ୟାନ୍ୟ ଅନିୟମିତତା ଧରାପଡ଼ିଥିଲା। ଫଳରେ ସେପ୍ଟେମ୍ବର ୩୦ ତାରିଖରେ ନିଯୁକ୍ତି ପରୀକ୍ଷାକୁ ରାଜ୍ୟ ସରକାର ବାତିଲ କରିଥିଲେ।