ନୂଆଦିଲ୍ଲୀ/ପାନିପତ: ଭାରତର ପ୍ରଧାନ ବିଚାରପତି (ସିଜେଆଇ) ସୂର୍ଯ୍ୟକାନ୍ତଙ୍କ ଏକ ବିବାଦୀୟ ମନ୍ତବ୍ୟକୁ କେନ୍ଦ୍ର କରି ସାରା ଦେଶର ଯୁବପିଢ଼ିଙ୍କ ମଧ୍ୟରେ ସୃଷ୍ଟି ହୋଇଥିବା ତୀବ୍ର ଆକ୍ରୋଶ ଭିତରୁ ଜନ୍ମ ନେଇଥିବା ଅନଲାଇନ୍ ବ୍ୟଙ୍ଗାତ୍ମକ ସଂଗଠନ ‘କୋକରୋଚ୍ ଜନତା ପାର୍ଟି’ (ସିଜେପି) ଏବେ ଏକ ପ୍ରକୃତ ରାଜନୈତିକ ଦଳର ରୂପ ନେବାକୁ ଯାଉଛି। ହରିୟାଣାର ପାନିପତର ଜଣେ ଓକିଲ ସୁଧୀର ଜାଖର ନିଜକୁ ଏହି ଦଳର ଜାତୀୟ ଆହ୍ୱାନକାରୀ ଦର୍ଶାଇ ଦଳର ନାମ ଓ ”କୋକରୋଚ୍” ଲୋଗୋ ସହ ଭାରତୀୟ ନିର୍ବାଚନ କମିଶନ (ଇସିଆଇ) ଙ୍କ ନିକଟରେ ଆନୁଷ୍ଠାନିକ ପଞ୍ଜୀକରଣ ପାଇଁ ମଙ୍ଗଳବାର ଆବେଦନ କରିଛନ୍ତି, ଯାହାକୁ ନେଇ ଜାତୀୟ ରାଜନୀତିରେ ହଲଚଲ ସୃଷ୍ଟି ହୋଇଛି। ପ୍ରତିନିଧିତ୍ୱ ଆକ୍ଟର ଧାରା ‘୨୯ଏ’ ଅନୁଯାୟୀ କରାଯାଇଥିବା ଏହି ଆବେଦନ ଯଦି ଗ୍ରହଣ ହୁଏ, ତେବେ ଆମେରିକାରେ ରହୁଥିବା ଏହାର ମୂଳ ପ୍ରତିଷ୍ଠାତା ଅଭିଜିତ ଦୀପକେଙ୍କ ବଦଳରେ ସୁଧୀର ଜାଖର ଏହି ଦଳର ସମସ୍ତ ଅଫିସିଆଲ୍ ସୋସିଆଲ ମିଡିଆ ହ୍ୟାଣ୍ଡେଲ୍ସ ଉପରେ ନିଜର ଆଇନଗତ ଦାବି ଉପସ୍ଥାପନ କରିପାରିବେ।
