ନୂଆଦିଲ୍ଲୀ: ସିଆରପିଏଫ କନଷ୍ଟେବଲ (ଟେକ୍ନିକାଲ୍, ଟ୍ରେଡସମ୍ୟାନ୍ ଏବଂ ପାୟନିୟର୍) ପଦବି ପାଇଁ ଏକ ବଡ଼ ନିଯୁକ୍ତି ଅଭିଯାନ ଘୋଷଣା କରିଛି। ଏହି ନିଯୁକ୍ତି ଅଭିଯାନରେ ମୋଟ ୯,୧୯୫ ପଦବି ପୁରଣ କରାଯିବ। ସରକାରୀ ଚାକିରି ପାଇଁ ପ୍ରସ୍ତୁତ ହେଉଥିବା ପ୍ରାର୍ଥୀଙ୍କ ପାଇଁ ଏହା ଏକ ଭଲ ସୁଯୋଗ ଥିବା କୁହାଯାଉଛି। ଆବେଦନ ପ୍ରକ୍ରିୟା ଅନଲାଇନରେ ହେବ। ଯାହାକି  ୨୦୨୬ ଏପ୍ରିଲ ୨୦ ତାରିଖରୁ ଆରମ୍ଭ ହୋଇ ମଇ ୧୯ ପର୍ଯ୍ୟନ୍ତ ଚାଲିବ।

ଏହି ନିଯୁକ୍ତି ପାଇଁ ଆବେଦନ କରିବା ପାଇଁ ଇଚ୍ଛୁକ ଥିବା ପ୍ରାର୍ଥୀମାନେ ଅତି କମରେ ଦଶମ ଶ୍ରେଣୀ ପାସ କରିଥିବା ଆବଶ୍ୟକ। ଡ୍ରାଇଭର ଏବଂ ମେକାନିକ୍ ଭଳି କିଛି ପଦବି ପାଇଁ, ଆଇଟିଆଇ ପ୍ରମାଣପତ୍ର କିମ୍ବା ସମ୍ପୃକ୍ତ ଟ୍ରେଡସମ୍ୟାନ ପଦବି ପାଇଁ ପ୍ରାର୍ଥୀଙ୍କୁ ନିଜ କାମର  ଦକ୍ଷତା ଥିବା ଆବଶ୍ୟକ। ଡ୍ରାଇଭର ପଦବି ପାଇଁ ପ୍ରାର୍ଥୀଙ୍କ ବୟସ ୨୧ ରୁ ୨୭ ବର୍ଷ ମଧ୍ୟରେ ହେବା ଆବଶ୍ୟକ। ଅନ୍ୟ ସମସ୍ତ ପଦବି ପାଇଁ ବୟସ ସୀମା ୧୮ ରୁ ୨୩ ବର୍ଷ ଧାର୍ଯ୍ୟ କରାଯାଇଛି। ଏସସି/ଏସଟି ଭଳି ସଂରକ୍ଷିତ ବର୍ଗଗୁଡ଼ିକୁ ପାଇଁ ୫ ବର୍ଷ ଏବଂ ଓବିସିମାନଙ୍କୁ ୩ ବର୍ଷ ପାଇଁ ବୟସ ଛାଡ଼ କରାଯାଇଛି। ପୂର୍ବତନ ସୈନିକମାନେ ମଧ୍ୟ ନିୟମ ଅନୁଯାୟୀ ବୟସ ଛାଡ଼ ପାଇବେ।

ପୁରୁଷ ପ୍ରାର୍ଥୀଙ୍କ ଉଚ୍ଚତା ସର୍ବନିମ୍ନ ୧୭୦ ସେମି ଏବଂ ମହିଳା ପ୍ରାର୍ଥୀଙ୍କ ଉଚ୍ଚତା ୧୫୭ ସେମି ରହିବା ଆବଶ୍ୟକ। କିଛି ପଦବି ପାଇଁ ପୁରୁଷମାନଙ୍କୁ ୨୪ ମିନିଟରେ ୫ କିଲୋମିଟର ଦୌଡ଼ ଶେଷ କରିବାକୁ ପଡିବ। ସେହିପରି ମହିଳାମାନଙ୍କୁ ୮.୫ ମିନିଟ୍ରେ ୧.୬ କିଲୋମିଟର ଦୌଡ଼ ଶେଷ କରିବାକୁ ପଡିବ।ଏହି ନିଯୁକ୍ତି ପାଇଁ ଜେନେରାଲ, ଓବିସି ଏବଂ ଇଡବ୍ଲୁଏସ୍ ବର୍ଗର ପୁରୁଷ ପ୍ରାର୍ଥୀମାନଙ୍କୁ ଆବେଦନ ଫିସ୍ ୧୦୦ଟଙ୍କା ଦେବାକୁ ପଡିବ। ତଥାପି, ଏସସି, ଏସଟି, ସମସ୍ତ ମହିଳା ପ୍ରାର୍ଥୀ ଏବଂ ପୂର୍ବତନ ସୈନିକଙ୍କ ପାଇଁ ଆବେଦନ ଶୁଳ୍କ ସମ୍ପୂର୍ଣ୍ଣ ମାଗଣା।

ଆବେଦନ କରିବା ପାଇଁ, ପ୍ରାର୍ଥୀମାନଙ୍କୁ ପ୍ରଥମେ ସିଆରପିଏଫର ଅଫିସିଆଲ୍ ୱେବସାଇଟ୍, rect.crpf.gov.in ଯାଇ ଆବେଦନ ଫର୍ମ ପୂରଣ କରିବାକୁ ପଡିବ। ଫର୍ମ ପୂରଣ କରିବା ସମୟରେ, ସମସ୍ତ ଆବଶ୍ୟକୀୟ ସୂଚନା ଠିକ୍ ଭାବରେ ପୁରଣ କରିବାକୁ ହେବ। ଡକ୍ୟୁମେଣ୍ଟଗୁଡ଼ିକ ଅପଲୋଡ୍ ପରେ ଆବେଦନ ଶୁଳ୍କ ଦେଇ ଫର୍ମ ଦାଖଲ କରନ୍ତୁ ଏବଂ ପ୍ରିଣ୍ଟଆଉଟ୍ ନିଜ ପାଖରେ ସାଇତି ରଖନ୍ତୁ।

ସୌଜନ୍ୟ ସମ୍ବାଦ