ପୁଣେ: ପୁଣେ ଲୋହାଗଡ଼ ଦୁର୍ଗ ହତ୍ୟା ମାମଲାରେ ଅଭିଯୁକ୍ତ ସିୟା ଗୋୟଲ ଗୋଟିଏ ପରେ ଗୋଟିଏ ଚାଞ୍ଚଲ୍ୟକର ଖୁଲାସା କରୁଛନ୍ତି। କଷ୍ଟୁଡିରେ ପଚରାଉଚରା ବେଳେ ଶୁକ୍ରବାର ସିୟା ପୁଣେ ରୁରାଲ ପୁଲିସ ନିକଟରେ ଆଉ ଏକ ବଡ଼ ଖୁଲାସା କରିଛନ୍ତି। ସେ କହିଛନ୍ତି ଯେ ମୋ ପରିବାରକୁ ବିବାହ ନେଇ ମନା କରିବା ଅପେକ୍ଷା କେତନଙ୍କୁ ହତ୍ୟା କରିବା ମୋ ପାଇଁ ଅଧିକ ସହଜ ଥିଲା।

ପୋଲିସର ସୂଚନାନୁସାରେ, ସିୟା କେତନଙ୍କୁ ପସନ୍ଦ କରୁନଥିଲେ କାରଣ ସେ ଏକ ‘ୱିଗ୍’ (ନକଲି କେଶ) ବ୍ୟବହାର କରୁଥିଲେ। ଯେତେବେଳେ ତାଙ୍କୁ ପଚରାଗଲା ଯେ ସେ କାହିଁକି ପରିବାରକୁ ଏ ବିଷୟରେ ଜଣାଇଲେ ନାହିଁ, ସେ କହିଲେ ଯେ ସେ ପରିବାରକୁ ଦୁଃଖ ଦେବାକୁ ଚାହୁଁ ନଥିଲେ। ତେଣୁ, ସେ ଲୋହାଗଡ଼ ଦୁର୍ଗରୁ କେତନଙ୍କୁ ଗଭୀର ଖାଲକୁ ଠେଲି ହତ୍ୟା କରିବାକୁ ଉଚିତ୍ ମନେ କରିଥିଲେ।

ଅନ୍ୟପଟେ, କେତନଙ୍କ ପିତା ବିଶାଲ ଅଗ୍ରୱାଲ କହିଛନ୍ତି ଯେ ତାଙ୍କ ପୁଅ ଯେ କେଶ ପ୍ୟାଚ୍ ବ୍ୟବହାର କରୁଥିଲେ, ସେ ବିଷୟରେ ସିୟା ଓ ତାଙ୍କ ପରିବାରକୁ ବିବାହ ପୂର୍ବରୁ ଅବଗତ କରାଯାଇଥିଲା। ସେ କହିଛନ୍ତି, “କେବଳ ଏକ ୱିଗ୍ ପିନ୍ଧିଥିବାରୁ କାହାକୁ ମାରିଦେବା କେବେ ବି କାରଣ ହୋଇପାରେ ନାହିଁ।”

ତଦନ୍ତରୁ ଜଣାପଡିଛି ଯେ, ସିୟାଙ୍କ ଅନ୍ୟ ଜଣେ ଅଭିଯୁକ୍ତ ଚେତନ ଚୌଧୁରୀଙ୍କ ସହ ସମ୍ପର୍କ ଥିଲା। ସିୟାଙ୍କ ପରିବାର ଏ ବିଷୟରେ ଜାଣିବା ପରେ, ସମ୍ଭବତଃ ଆର୍ଥିକ ସ୍ଥିତିକୁ ଦୃଷ୍ଟିରେ ରଖି ସେମାନେ ଜବରଦସ୍ତି କେତନଙ୍କ ସହ ତାଙ୍କ ବିବାହ ସ୍ଥିର କରିଥିଲେ। ବର୍ତ୍ତମାନ ପୋଲିସ ସିୟାଙ୍କ ଭାଇ ସାହିଲ ଗୋୟଲଙ୍କୁ ମଧ୍ୟ ପଚରାଉଚରା କରୁଛି ଏବଂ ସମ୍ପୂର୍ଣ୍ଣ ଘଟଣାର ତଦନ୍ତ ଜାରି ରଖିଛି।

ସୌଜନ୍ୟ Prameya News7