Malegaon: ମାଲେଗାଓଁ ବିସ୍ଫୋରଣ ମାମଲା: ସମସ୍ତ ୪ ଅଭିଯୁକ୍ତ ଦୋଷମୁକ୍ତ

ସୂଚନାଯୋଗ୍ୟ, ୨୦୦୬ ସେପ୍ଟେମ୍ବର ୮ ତାରିଖରେ ନାସିକ ଜିଲ୍ଲାର ମାଲେଗାଓଁ ସହରରେ ଚାରିଟି ବୋମା ବିସ୍ଫୋରଣ ଘଟିଥିଲା। ଏଥିମଧ୍ୟରୁ ହାମିଦିଆ ମସଜିଦ ଓ ବଡା କବରସ୍ତାନ ପରିସର ଭିତରେ ଶୁକ୍ରବାର ନମାଜ ପରେ ୩ଟି ଓ ମୁଶାୱାରତ ଚୌକରେ ଚତୁର୍ଥ ବୋମା ବିସ୍ଫୋରଣ ହୋଇଥିଲା। ଏହି ବିସ୍ଫୋରଣରେ ୩୧ ଜଣଙ୍କ ମୃତ୍ୟୁ ଘଟିଥିଲା ଓ ୩୧୨ ଜଣ ଆହତ ହୋଇଥିଲେ। ବିସ୍ଫୋରଣ ପରେ ମହାରା‌ଷ୍ଟ୍ର ଏଟିଏସ୍‌ ୯ ଜଣ ମୁସଲମାନଙ୍କୁ ଗିରଫ କରିଥିଲା। ପରେ ଜାତୀୟ ତଦନ୍ତ ଏଜେନ୍ସି (ଏନ୍‌ଆଇଏ) ମାମଲାର ତଦନ୍ତ କରି ବିସ୍ଫୋରଣରେ ଦକ୍ଷିଣପନ୍ଥୀ ବା ହିନ୍ଦୁ ଉଗ୍ରବାଦୀଙ୍କ ହାତ ଥିବା ଦାବି କରିଥିଲା। ଏହି ଘଟଣା ପାଇଁ ସେତେବେଳର ବିଜେପି ସାଂସଦ ପ୍ରଜ୍ଞା ସିଂହ ଠାକୁର ଏବଂ ସେବାରେ ଥିବା ସେନାର ଲେଫଟନାଣ୍ଟ କର୍ଣ୍ଣେଲ ପ୍ରସାଦ ପୁରୋହିତଙ୍କୁ ଦାୟୀ କରାଯାଇଥିଲା। ଏମାନଙ୍କ ସହ ମୋଟ ୭ ଜଣ ହିନ୍ଦୁ ଉଗ୍ରବାଦୀ ଏହି ଘଟଣାରେ ଅଭିଯୁକ୍ତ ବୋଲି କୁହାଯାଇଥଲା। ପୂର୍ବରୁ ଠାକୁର ଓ ପୁରୋହିତଙ୍କ ସହ ତିନିଜଣଙ୍କୁ ଦୋଷମୁକ୍ତ କରାଯାଇଥିଲା। ନଅ ଜଣ ମସୁଲମାନ ଅଭିଯୁକ୍ତଙ୍କୁ ସ୍ବତନ୍ତ୍ର ଅଦାଲତ ଦ୍ୱାରା ପୂର୍ବରୁ ହିଁ ଦୋଷମୁକ୍ତ କରାଯାଇଥିଲା। ଗତବର୍ଷ ସେପ୍ଟେମ୍ବର ମାସରେ ସ୍ବତନ୍ତ୍ର ଅଦାଲତ ଅବଶିଷ୍ଟ ଚାରି ଅଭିଯୁକ୍ତଙ୍କ ବିରୋଧରେ ଚାର୍ଜଫ୍ରେମ୍ କରିଥିଲେ, ଯାହାକୁ ଚ୍ୟାଲେଂଜ୍ କରି ସେମାନେ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଅଭିଯୁକ୍ତ ତାଙ୍କ ଆବେଦନରେ ଦାବି କରିଥିଲେ ଯେ ଜାତୀୟ ତଦନ୍ତ ଏଜେନ୍ସି (ଏନ୍‌ଆଇଏ) ସେମାନଙ୍କ ବିରୋଧରେ କୌଣସି ପ୍ରମାଣ ଉପସ୍ଥାପନରେ ବିଫଳ ହୋଇଛି।