ତେହେରାନ: ଇରାନର ସର୍ବୋଚ୍ଚ ନେତା ଆୟାତୋଲ୍ଲା ମୋଜତାବା ଖେମିନି ତାଙ୍କ ଟେଲିଗ୍ରାମ ଚ୍ୟାନେଲରେ କହିଛନ୍ତି ଯେ, ଉପସାଗରୀୟ ଶକ୍ତିଗୁଡ଼ିକ ଆଉ ଆମେରିକାର ଘାଟି ପାଇଁ ଢାଲ ଭାବରେ କାର୍ଯ୍ୟ କରିବେ ନାହିଁ ଏବଂ ଏହି ଅଞ୍ଚଳରେ ଆମେରିକା ପାଇଁ ଆଉ କୌଣସି ନିରାପଦ ଆଶ୍ରୟସ୍ଥଳ ରହିବ ନାହିଁ। ଏସବୁ ଘାଟିଗୁଡ଼ିକୁ ଧ୍ବଂସ କରାଯିବ ଏହି ବିବୃତି ଏପରି ଆସିଛି ଯେତେବେଳେ ତେହେରାନ ଏବଂ ୱାସିଂଟନ ସେମାନଙ୍କର ତିନି ମାସ ଧରି ଚାଲିଥିବା ଯୁଦ୍ଧର ଅନ୍ତ ପାଇଁ ଏକ ଢାଞ୍ଚା ଉପରେ ଆଲୋଚନା କରୁଛନ୍ତି, ଏହି ସମୟରେ ଇରାନ ମଧ୍ୟପ୍ରାଚ୍ୟରେ ଅନେକ ଆମେରିକୀୟ ଘାଟି ଉପରେ ଆକ୍ରମଣ କରିଛି।

ଇରାନର ୫୮ ବର୍ଷୀୟ ନୂତନ ସର୍ବୋଚ୍ଚ ନେତା ମୋଜତାବା ମାର୍ଚ୍ଚ ୮ ତାରିଖରୁ ସାଧାରଣରେ ଦେଖାଯାଇନାହାନ୍ତି ଏବଂ ତାଙ୍କର ବିବୃତି ପ୍ରାୟତଃ ଲେଖିତ ଭାବେ ଆସୁଛି। ଏଥର ମଧ୍ୟ ସେ ଏକ ଲିଖିତ ବିବୃତି ଜାରି କରିଛନ୍ତି। ମୋଜତାବାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ବହୁତ କଳ୍ପନାଜଳ୍ପନା ଚାଲିଛି। ଅନେକ ରିପୋର୍ଟ ଦାବି କରୁଛି ଯେ ତାଙ୍କର ଗୋଡରେ ଗମ୍ଭୀର ଆଘାତ ଲାଗିଛି। ତଥାପି, ସେ ଭିଡିଓ କନଫରେନ୍ସିଂ ମାଧ୍ୟମରେ ଇରାନୀ ଅଧିକାରୀଙ୍କ ସହ ବୈଠକ ଜାରି ରଖିଛନ୍ତି ଏବଂ ଏକ ଗୁପ୍ତ ସ୍ଥାନରେ ଲୁଚି ରହିଛନ୍ତି। ଦକ୍ଷିଣ ଇରାନରେ ଆମେରିକାର ସେନା କ୍ଷେପଣାସ୍ତ୍ର ଘାଟି ଏବଂ ମାଇନ୍ ବିଛାଉଥିବା ଡଙ୍ଗା ଉପରେ ଆକ୍ରମଣ କରିବାର କିଛି ଘଣ୍ଟା ପରେ ତାଙ୍କର ବିବୃତି ଆସିଛି। ସେ ଦେଶର ସଶସ୍ତ୍ର ବାହିନୀକୁ ପ୍ରଶଂସା କରି ଆମେରିକାକୁ ‘ମହାନ ସୈତାନ’ ଏବଂ ଇସ୍ରାଏଲକୁ ‘ଆମେରିକାର ପ୍ରଶିକ୍ଷିତ ପୋଷାଜୀବ’ ବୋଲି କହି କଟାକ୍ଷ କରିଛନ୍ତି।

ମୋଜତାବା ଚେତାବନୀ ଦେଇ କହିଛନ୍ତି, ଇସ୍ରାଏଲ ନିଜର ଶେଷ ହେବା ସମୟରେ ପହଞ୍ଚିଛି। ଆଗାମୀ ୨୫ ବର୍ଷ ମଧ୍ୟରେ ଏହି ଦେଶ ନିଜର ଅସ୍ତିତ୍ୱ ହରାଇବ। ଆମେରିକାର ବିଶ୍ୱ ପ୍ରଭାବ ଦିନକୁ ଦିନ ହ୍ରାସ ପାଉଛି। ସେ କହିଛନ୍ତି, ସାଉଦି ଆରବ, ୟୁଏଇ ଏବଂ କାତାର ଭଳି ପଡ଼ୋଶୀ ଦେଶଗୁଡ଼ିକୁ ଇରାନ ଏକ ସ୍ପଷ୍ଟ ବାର୍ତ୍ତା ପଠାଉଛି ଯେ ଯଦି ସେମାନେ ସେମାନଙ୍କ ଦେଶରେ ଥିବା ଆମେରିକୀୟ ସାମରିକ ଘାଟିଗୁଡ଼ିକୁ ଇରାନ ବିରୋଧରେ ବ୍ୟବହାର କରିବାକୁ ଦିଅନ୍ତି, ତେବେ ଇରାନ ସେମାନଙ୍କୁ ଛାଡ଼ିବ ନାହିଁ। ମୋଜତାବା କହିଛନ୍ତି ଯେ ମଧ୍ୟପ୍ରାଚ୍ୟରେ ଆମେରିକାର ପୂର୍ବ ପ୍ରାଧାନ୍ୟ ଏବେ ସବୁଦିନ ପାଇଁ ଶେଷ ହୋଇଯାଇଛି ଏବଂ ଆମେରିକା ଚାହିଁଲେ ମଧ୍ୟ ସେହି ପୁରୁଣା ଯୁଗକୁ ଫେରାଇ ଆଣିପାରିବ ନାହିଁ। ଏଥିପାଇଁ ସେ ଏକ ଚକ ବ୍ୟବହାର କରିଛନ୍ତି ଯାହାର ଅର୍ଥ ହେଉଛି ସମୟର ଚକ ପଛକୁ ଫେରିବ ନାହିଁ ଏବଂ ଗୋଟିଏ ଦିନ ମଧ୍ୟପ୍ରାଚ୍ୟରୁ ଆମେରିକାର ପ୍ରାଧାନ୍ୟ ସବୁଦିନ ପାଇଁ ଶେଷ ହୋଇଯିବ। ମୋଜତାବା କହିଛନ୍ତି ଯେ ଆମେରିକାର ଦୁଷ୍କର୍ମ ପାଇଁ କୌଣସି ସୁରକ୍ଷିତ ଆଶ୍ରୟସ୍ଥଳ ରହିବ ନାହିଁ। ସମୟର ଚକ ପଛକୁ ଫେରିବ ନାହିଁ ଏବଂ ଏହି ଅଞ୍ଚଳର ଦେଶ ଏବଂ ଭୂମି ଆଉ ଆମେରିକୀୟ ଘାଟି ପାଇଁ ଢାଲ ଭାବରେ କାର୍ଯ୍ୟ କରିବ ନାହିଁ।

ସମୟର ଚକ ପଛକୁ ଫେରିବ ନାହିଁ

ଇରାନୀ ନେତା ଦେଶର ସାମରିକ ବାହିନୀର ପ୍ରଶଂସା କରି ଲେଖିଛନ୍ତି, ଭଗବାନଙ୍କ ଉପରେ ଭରସା ରଖି ଏବଂ ସ୍ଥଳ, ଆକାଶ ଏବଂ ସମୁଦ୍ରରେ କ୍ଷେପଣାସ୍ତ୍ର ଏବଂ ଡ୍ରୋନ୍ ବ୍ୟବହାର କରି ଆମେରିକା ଏବଂ ଏହାର ପାଳିତ ଜାୟୋନିଷ୍ଟ ଶାସନ ଉପରେ ଅସ୍ତ୍ର ବର୍ଷା କର। ଦୁର୍ବଳ ଜାୟୋନିଷ୍ଟ ଶାସନ ଏବଂ ଇସ୍ରାଏଲ ନାମକ କର୍କଟ ରୋଗର ଟ୍ୟୁମର ମଧ୍ୟ ସେମାନଙ୍କର ବିନାଶର ଶେଷ ପର୍ଯ୍ୟାୟରେ ପହଞ୍ଚିଛି ବୋଲି ସେ କହିଛନ୍ତି।

ସୌଜନ୍ୟ ସମ୍ବାଦ