ଦେଶ ବିଦେଶ

Population: ୨୦୭୦ ସୁଦ୍ଧା ଭାରତରେ ବିଶ୍ୱର ଦ୍ୱିତୀୟ ସର୍ବାଧିକ ମୁସଲିମ୍‌ ଜନସଂଖ୍ୟା!

ଆସନ୍ତା ୨୦୭୦ ସୁଦ୍ଧା ଭାରତ ବିଶ୍ୱର ଦ୍ୱିତୀୟ ସର୍ବାଧିକ ମୁସଲିମ୍‌ ଜନସଂଖ୍ୟା ବିଶିଷ୍ଟ ଦେଶରେ ପରିଣତ ହେବ। ଏହି ସମୟରେ ଭାରତରେ ମୁସଲିମ୍‌ଙ୍କ ସଂଖ୍ୟା ୩୩.୪ କୋଟିରେ ପହଞ୍ଚିବ। ଅନ୍ୟପକ୍ଷରେ ଦେଶର ମୋଟ ଜନସଂଖ୍ୟାରେ ହିନ୍ଦୁଙ୍କ ଅଂଶ...

ନୂଆଦିଲ୍ଲୀ: ଆସନ୍ତା ୨୦୭୦ ସୁଦ୍ଧା ଭାରତ ବିଶ୍ୱର ଦ୍ୱିତୀୟ ସର୍ବାଧିକ ମୁସଲିମ୍‌ ଜନସଂଖ୍ୟା ବିଶିଷ୍ଟ ଦେଶରେ ପରିଣତ ହେବ। ଏହି ସମୟରେ ଭାରତରେ ମୁସଲିମ୍‌ଙ୍କ ସଂଖ୍ୟା ୩୩.୪ କୋଟିରେ ପହଞ୍ଚିବ। ଅନ୍ୟପକ୍ଷରେ ଦେଶର ମୋଟ ଜନସଂଖ୍ୟାରେ ହିନ୍ଦୁଙ୍କ ଅଂଶ ୨୦୨୦ର ୭୯ ପ୍ରତିଶତରୁ ହ୍ରାସ ପାଇ ୭୬ ପ୍ରତିଶତ ହେବ। ଆମେରିକାର ପ୍ୟୁ ରିସର୍ଚ୍ଚ ସେଣ୍ଟର ପକ୍ଷରୁ ପ୍ରକାଶିତ ନୂଆ ଅଧ୍ୟୟନରେ ଏହି ଆକଳନ କରାଯାଇଛି। ତେବେ ଏହି ସମୟରେ ମଧ୍ୟ ଭାରତ ହିନ୍ଦୁ ବହୁଳ ଦେଶ ହୋଇ ରହିବ ବୋଲି ରିପୋର୍ଟରେ କୁହାଯାଇଛି।

ଅଧ୍ୟୟନ ଅନୁଯାୟୀ, ୨୦୨୦ରେ ଭାରତରେ ପ୍ରାୟ ୨୧.୩ କୋଟି ମୁସଲିମ୍‌ ଥିଲେ। ଏହା ବିଶ୍ୱର ତୃତୀୟ ସର୍ବାଧିକ ମୁସଲିମ୍‌ ଜନସଂଖ୍ୟା ଥିଲା। ସେତେବେଳେ ଇଣ୍ଡୋନେସିଆ ପ୍ରଥମ ଓ ପାକିସ୍ତାନ ଦ୍ୱିତୀୟ ସ୍ଥାନରେ ଥିଲେ। କିନ୍ତୁ ୨୦୭୦ ସୁଦ୍ଧା ପାକିସ୍ତାନରେ ମୁସଲିମ୍‌ଙ୍କ ସଂଖ୍ୟା ୪୬.୧ କୋଟିରେ ପହଞ୍ଚି ବିଶ୍ୱର ପ୍ରଥମ ସ୍ଥାନ ଅଧିକାର କରିବ। ଭାରତ ୩୩.୪ କୋଟି ମୁସଲିମ୍‌ଙ୍କ ସହ ଦ୍ୱିତୀୟ ସ୍ଥାନକୁ ଉଠିବ। ନାଇଜେରିଆ ୨୮.୨ କୋଟି ସହ ତୃତୀୟ ଏବଂ ଇଣ୍ଡୋନେସିଆ ୨୭.୪ କୋଟି ସହ ଚତୁର୍ଥ ସ୍ଥାନରେ ରହିବ। ବିଶ୍ୱର ମୋଟ ମୁସଲିମ୍‌ ଜନସଂଖ୍ୟାର ୯.୨ ପ୍ରତିଶତ ଭାରତରେ ରହିବେ।

ହିନ୍ଦୁଙ୍କ କ୍ଷେତ୍ରରେ ମଧ୍ୟ ଏହି ଅଧ୍ୟୟନ ଏକ ଗୁରୁତ୍ୱପୂର୍ଣ୍ଣ ଚିତ୍ର ଦେଇଛି। ୨୦୨୦ରେ ଭାରତରେ ପ୍ରାୟ ୧୧୧ କୋଟି ହିନ୍ଦୁ ଥିବାବେଳେ ୨୦୭୦ ସୁଦ୍ଧା ଏହି ସଂଖ୍ୟା ୧୨୯ କୋଟିରେ ପହଞ୍ଚିବ। ଅର୍ଥାତ୍‌ ହିନ୍ଦୁଙ୍କ ସଂଖ୍ୟା ପ୍ରାୟ ୧୭.୬ କୋଟି ବଢ଼ିବ। କିନ୍ତୁ ଦେଶର ମୋଟ ଜନସଂଖ୍ୟାରେ ସେମାନଙ୍କ ଅନୁପାତ ୭୯ ପ୍ରତିଶତରୁ ୭୬ ପ୍ରତିଶତକୁ ଖସିବ। ଏହାର ଅର୍ଥ ହିନ୍ଦୁଙ୍କ ସଂଖ୍ୟା ହ୍ରାସ ପାଇବ ନାହିଁ, ବରଂ ମୋଟ ଜନସଂଖ୍ୟାରେ ସେମାନଙ୍କ ଅଂଶ କମିବ।

ପ୍ୟୁ ରିସର୍ଚ୍ଚ ସେଣ୍ଟର ଏହି ପରିବର୍ତ୍ତନର ପ୍ରମୁଖ କାରଣ ଭାବେ ବିଭିନ୍ନ ଧର୍ମାବଲମ୍ବୀଙ୍କ ପ୍ରଜନନ ହାରକୁ ଦର୍ଶାଇଛି। ୨୦୨୦ରେ ଭାରତୀୟ ମୁସଲିମ୍‌ଙ୍କ ମଧ୍ୟମ ବୟସ ୨୪ ବର୍ଷ ଥିବାବେଳେ ହିନ୍ଦୁଙ୍କ କ୍ଷେତ୍ରରେ ଏହା ୨୯ ବର୍ଷ ଥିଲା। ୨୦୨୫ରୁ ୨୦୩୦ ମଧ୍ୟରେ ମୁସଲିମ୍‌ ମହିଳାଙ୍କ ହାରାହାରି ସନ୍ତାନ ସଂଖ୍ୟା ୨.୩ ଏବଂ ହିନ୍ଦୁ ମହିଳାଙ୍କ କ୍ଷେତ୍ରରେ ୧.୮ ରହିବ ବୋଲି ଆକଳନ କରାଯାଇଛି। ଏହି ଅଧ୍ୟୟନରେ ୨୦୧ଟି ଦେଶ ଓ ଅଞ୍ଚଳର ସାତଟି ଧର୍ମୀୟ ଗୋଷ୍ଠୀର ଜନସଂଖ୍ୟାଗତ ପରିବର୍ତ୍ତନକୁ ବିଶ୍ଳେଷଣ କରାଯାଇଛି। ଏହା ଜନଗଣନା ନୁହେଁ, ବରଂ ବର୍ତ୍ତମାନର ଜନସଂଖ୍ୟାଗତ ଧାରା ଜାରି ରହିଲେ ଭବିଷ୍ୟତରେ କି ପରିବର୍ତ୍ତନ ହୋଇପାରେ, ତାହାର ଏକ ଆକଳନ।

 

 

 

 

 

 

 

ସୌଜନ୍ୟ ସମ୍ବାଦ

Show More

Leave a Reply

Your email address will not be published. Required fields are marked *

Back to top button