ୱାସିଂଟନ: ଆମେରିକା ଓ ଇଣ୍ଡୋନେସିଆ ମଧ୍ୟରେ ଏକ ନୂତନ ପ୍ରତିରକ୍ଷା ସହଯୋଗ ଚୁକ୍ତି ଏହି ସପ୍ତାହ ଆରମ୍ଭରେ ଚୂଡ଼ାନ୍ତ ହୋଇଛି। ଏହି ଅବସରରେ ୱାସିଂଟନ ବର୍ତ୍ତମାନ ହର୍ମୁଜ ପରେ ଅନ୍ୟ ଏକ ରଣନୈତିକ ଚୋକ୍ପଏଣ୍ଟ ମଲକ୍କା ପ୍ରଣାଳୀ ଉପରେ ନଜର ରଖିଥିବା କୁହାଯାଉଛି।
ଏହି ଚୁକ୍ତିନାମା ଆମେରିକାର ସାମରିକ ବିମାନକୁ ଇଣ୍ଡୋନେସିଆ ବାୟୁସୀମାରେ ପ୍ରବେଶ ଅନୁମତି ଦେଇଛି। ଆନୁଷ୍ଠାନିକ ଭାବରେ ଗଭୀର ପ୍ରତିରକ୍ଷା ସହଯୋଗ ଭାବରେ ଏହାକୁ ଦେଖାଯାଉଥିବା ବେଳେ ଏହି ସମୟ ରଣନୈତିକ ପର୍ଯ୍ୟବେକ୍ଷକମାନଙ୍କ ମଧ୍ୟରେ କଳ୍ପନାଜଳ୍ପନା ସୃଷ୍ଟି କରିଛି। ଏହିପରି ପ୍ରବେଶ ଭାରତ ମହାସାଗରକୁ ପୂର୍ବ ଓ ଦକ୍ଷିଣପୂର୍ବ ଏସିଆ ସହିତ ସଂଯୋଗ କରୁଥିବା ଏକ ସଂକୀର୍ଣ୍ଣ କିନ୍ତୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ କରିଡର ମଲକ୍କା ପ୍ରଣାଳୀ ଉପରେ ନଜର ରଖିବା ପାଇଁ ଆମେରିକାର କ୍ଷମତାକୁ ବୃଦ୍ଧି କରିପାରେ।
ମଲକ୍କା ପ୍ରଣାଳୀ କେବଳ ଅନ୍ୟ ଏକ ଜାହାଜ ଚଳାଚଳ ମାର୍ଗ ନୁହେଁ, ଏହା ବିଶ୍ୱର ସବୁଠାରୁ ବ୍ୟସ୍ତବହୁଳ ସାମୁଦ୍ରିକ ଧମନୀ ମଧ୍ୟରୁ ଅନ୍ୟତମ। ବିଶ୍ୱ ବାଣିଜ୍ୟର ପ୍ରାୟ ୪୦ ପ୍ରତିଶତ ଏହି ସଂକୀର୍ଣ୍ଣ କରିଡର ଦେଇ ଯାଇଥାଏ। ଇଲେକ୍ଟ୍ରୋନିକ୍ସ ଓ ସେମିକଣ୍ଡକ୍ଟରଠାରୁ ଆରମ୍ଭ କରି କାର୍ ଓ ଶିଳ୍ପ ସାମଗ୍ରୀ ପର୍ଯ୍ୟନ୍ତ ବହୁ ପରିମାଣର ସାମଗ୍ରୀ ସହିତ ଏହା ବିଶ୍ୱ ତୈଳ ପ୍ରବାହର ପ୍ରାୟ ୩୦ ପ୍ରତିଶତ ବହନ କରେ।
ଏହା ମଲକ୍କାକୁ ହର୍ମୁଜଠାରୁ ମୌଳିକ ଭାବରେ ଭିନ୍ନ କରିଥାଏ। ତୈଳ ପରିବହନ ପାଇଁ ହର୍ମୁଜ କେନ୍ଦ୍ରବିନ୍ଦୁ ହୋଇଥିବାବେଳେ ମଲକ୍କା ଏକ ବ୍ୟାପକ ବାଣିଜ୍ୟିକ ଜୀବନରେଖା ଭାବରେ କାର୍ଯ୍ୟ କରେ। ଏହାର ଭୌଗୋଳିକ ସ୍ଥିତି ଏହାର ମହତ୍ତ୍ୱକୁ ଆହୁରି ବୃଦ୍ଧି କରିଥାଏ। ଫିଲିପ୍ ଚ୍ୟାନେଲରେ ଏହି ପ୍ରଣାଳୀ ପ୍ରାୟ ୩ କିମି ଚଉଡ଼ା, ଯାହା ହର୍ମୁଜ ଅପେକ୍ଷା ପ୍ରାୟ ନଅ ଗୁଣ ସଂକୀର୍ଣ୍ଣ। ଏହି ପ୍ରଣାଳୀ ଇଣ୍ଡୋନେସିଆ, ମାଲେସିଆ ଓ ସିଙ୍ଗାପୁର ଦ୍ୱାରା ମିଳିତ ଭାବରେ ପରିଚାଳିତ ଏବଂ ଭାରତ ମହାସାଗର ଓ ପ୍ରମୁଖ ପୂର୍ବ-ଏସୀୟ ଅର୍ଥନୀତି ମଧ୍ୟରେ ମୁଖ୍ୟ ସାମୁଦ୍ରିକ ସେତୁ ଭାବରେ କାର୍ଯ୍ୟ କରେ।
ସୌଜନ୍ୟ ସମ୍ବାଦ