ଏଗ୍ରିଷ୍ଟାକ୍ ଉଚ୍ଛେଦ ନେଇ ଲିଖିତ ନିର୍ଦ୍ଦେଶ ଦିଅ: ସରକାରଙ୍କଠାରେ ସଂଯୁକ୍ତ କୃଷକ ସଙ୍ଗଠନର ଦାବି
ବରଗଡ଼,୧୪।୮(ପ୍ରେମାନନ୍ଦ ଖମାରୀ):ଧାନ ସଂଗ୍ରହ ପ୍ରକ୍ରିୟାରେ ରାଜ୍ୟ ସରକାର ପ୍ରତିବର୍ଷ ଗୋଟିଏ ପରେ ଗୋଟିଏ ନୂଆଁ କଟକଣା ଆଣୁଛନ୍ତି। ଧାନ କିଣାବିକାରେ ସ୍ବଚ୍ଛତା ଆଣିବା ଲକ୍ଷ୍ୟ ନେଇ ସେଭଳି କଟକଣା ଅଣାଯାଉଥିବା ସରକାରଙ୍କ ପକ୍ଷରୁ ସଫେଇ ଦିଆଯାଉଛି। ଅନ୍ୟପଟେ ଧାନ ସଂଗ୍ରହ ପ୍ରକ୍ରିୟାକୁ ସଂକୁଚିତ କରିବା ନେଇ ସରକାର ସେଭଳି କଟକଣା ଆଣୁଛନ୍ତି ବୋଲି ଅଭିଯୋଗ କରି ଚାଷୀ ସଙ୍ଗଠନଗୁଡ଼ିକ ଆରମ୍ଭରୁ ଏହାକୁ ବିରୋଧ କରି ଚାଲିଛନ୍ତି। ଏଗ୍ରିଷ୍ଟାକ୍ ଆଇଡ଼ିକୁ ନେଇ ଏଥର ଧାନବିକ୍ରି ପଞ୍ଜୀକରଣ ଆରମ୍ଭରୁ ବିବାଦୀୟ ସ୍ଥିତି ଉପୁଜିଛି। ଏହାକୁ ନେଇ ସବୁଠି ବିରୋଧ ତେଜି ଉଠିବା ପରେ ଧାନବିକ୍ରି ପଞ୍ଜୀକରଣ ସହିତ ଏଗ୍ରିଷ୍ଟାକ୍ର କୌଣସି ସମ୍ପର୍କ ନାହିଁ ବୋଲି ରାଜ୍ୟ ସରକାରଙ୍କ ପକ୍ଷରୁ ସଫେଇ ଦିଆଯାଇଛି। ମାତ୍ର ଚାଷୀ ସଙ୍ଗଠନଗୁଡ଼ିକ ଏହାକୁ ସହଜରେ ଗ୍ରହଣ କରିପାରି ନାହାନ୍ତି ଏବଂ ଏନେଇ ସରକାରଙ୍କ ପକ୍ଷରୁ ସମସ୍ତ ପ୍ରାଥମିକ କୃଷି ସମବାୟ ସମିତି(ପାକ୍ସ) ଗୁଡ଼ିକୁ ତୁରନ୍ତ ଲିଖିତ ନିର୍ଦ୍ଦେଶ ଦିଅନ୍ତୁ ବୋଲି ବରଗଡ଼ ଜିଲା ସଂଯୁକ୍ତ କୃଷକ ସଙ୍ଗଠନ ଦାବି କରିଛି।
ବରଗଡ଼ ଅଗ୍ରଗାମୀ ଯୁବକ ସଂଘ ପରିସରରେ ଅନୁଷ୍ଠିତ ଖବରଦାତା ସମ୍ମିଳନୀରେ ସଙ୍ଗଠନର କର୍ମକର୍ତ୍ତାମାନେ କହିଥିଲେ, ଚଳିତବର୍ଷ ଧାନବିକ୍ରି ପଞ୍ଜୀକରଣରେ ଅନେକ ଅସଙ୍ଗତି, ତ୍ରୁଟି, ଅନାବଶ୍ୟକ କାଗଜପତ୍ର ସାଙ୍ଗକୁ ଅସମ୍ଭବ ପ୍ରମାଣପତ୍ର ମଗାଯାଉଛି। ଏହାକୁ ବିରୋଧକରି ସଂଯୁକ୍ତ କୃଷକ ସଙ୍ଗଠନ ଗତ ୧୦ତାରିଖ ବରଗଡ଼ ଏସ୍ପିଙ୍କ କାର୍ଯ୍ୟାଳୟ, ପଦ୍ମପୁର ଏସ୍ଡ଼ିପିଓଙ୍କ କାର୍ଯ୍ୟାଳୟ ଏବଂ ଅତାବିରା ଥାନା ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲା। ହଜାର ହଜାର ଚାଷୀ ଗିରଫ ହୋଇଥିଲେ। ଏହି ଆନ୍ଦୋଳନର ଚାପରେ ପଶ୍ଚିମଓଡ଼ିଶାର ବିଧାୟକମାନେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ରଙ୍କୁ ସମସ୍ୟା ଉପରେ ଅବଗତ କରିଥିଲେ। ଏହାପରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ପାତ୍ର ଧାନବିକ୍ରି ଓ ଏଗ୍ରିଷ୍ଟାକ୍ ମଧ୍ୟରେ କିଛି ସମ୍ପର୍କ ନାହିଁ। ଏଗ୍ରିଷ୍ଟାକ୍ ଆଇଡ଼ି ନ ଦେଲେ ମଧ୍ୟ ଧାନବିକ୍ରି ପଞ୍ଜୀକରଣ ହୋଇ ପାରିବ ଏବଂ ଚାଷୀମାନଙ୍କୁ ଧାନବିକ୍ରି ଟୋକନ୍ ମିଳିବ। ଏହା ସହିତ ଧାନବିକ୍ରି ପଞ୍ଜୀକରଣ ଆବେଦନରୁ ଏଗ୍ରିଷ୍ଟାକ୍ ଆଇଡ଼ି କଲମକୁ ହଟାଇ ଦିଆଯାଇଛି ଏବଂ ଭାଗଚାଷୀମାନଙ୍କ ପାଇଁ ମୋବାଇଲ୍ ଇ-କେୱାଇସି ପୋର୍ଟାଲ କରାଯିବ ବୋଲି କହିଥିଲେ।
କିନ୍ତୁ ଏବେ ମଧ୍ୟ ବିଭିନ୍ନ ପାକ୍ସରେ ଧାନବିକ୍ରି ପଞ୍ଜୀକରଣ ପାଇଁ ଚାଷୀମାନଙ୍କୁ ଏଗ୍ରିଷ୍ଟାକ୍ ଆଇଡ଼ି ମଗାଯାଉଛି। ଫଳରେ ଚାଷୀମାନେ ଧାନବିକ୍ରି ପଞ୍ଜୀକରଣରୁ ବଞ୍ଚିତ ହେଉଛନ୍ତି ବୋଲି ଅଭିଯୋଗ ହୋଇଛି। ଏହି ଦୃଷ୍ଟିରୁ ଧାନବିକ୍ରି ପଞ୍ଜୀକରଣରୁ ଏଗ୍ରିଷ୍ଟାକ୍ ଉଚ୍ଛେଦ ନେଇ ଖାଦ୍ୟ ଯୋଗାଣ ଓ ଖାଉଟୀ କଲ୍ୟାଣ ମନ୍ତ୍ରୀ ଗଣମାଧ୍ୟମ ତଥା ପ୍ରେସ ବିବୃତିରେ ଯେଉଁ ମନ୍ତବ୍ୟ ଦେଇଛନ୍ତି, ସେ ନେଇ ସମସ୍ତ ପାକ୍ସକୁ ତୁରନ୍ତ ଲିଖିତ ନିର୍ଦ୍ଦେଶ ଦିଆଯାଉ ବୋଲି ସଂଯୁକ୍ତ କୃଷକ ସଙ୍ଗଠନ ଦାବି କରିଛି। ନଚେତ୍ ଆଗକୁ ଧାନବିକ୍ରି ପଞ୍ଜୀକରଣ କିମ୍ବା ଧାନବିକ୍ରି ସମସ୍ୟା ଲାଗି ରହିଲେ ଦୁର୍ବାର ଆନ୍ଦୋଳନ ହେବ ବୋଲି ସଙ୍ଗଠନ ପକ୍ଷରୁ ସୂଚନା ଦିଆଯାଇଛି। ଖବରଦାତା ସମ୍ମିଳନୀରେ ସଂଯୁକ୍ତ କୃଷକ ସଙ୍ଗଠର ଉପଦେଷ୍ଟା ରମେଶ ମହାପାତ୍ର, ଅଜିତ ଶତପଥୀ, ଧନପତି ପ୍ରଧାନ, କାରଣ ସାହୁ, ପ୍ରକାଶ ମେହେର, ସୁଦାମ ପାତ୍ର, ଈଶାନ୍ତ ଭୋଇ, ରବିଶଙ୍କର ପ୍ରଧାନ, ସୁରେଶ ନିକାଣ୍ଟି, ଅମିୟ ଗର୍ତ୍ତିଆ, ପବିତ୍ର ବାଗ, କାହ୍ନୁଚରଣ ମେହେର ପ୍ରମୁଖ ମଞ୍ଚାସୀନ ଥିଲେ।
ସୌଜନ୍ୟ ଧରିତ୍ରୀ
