ନୂଆଦିଲ୍ଲୀ,୨୬।୯: ଦିଲ୍ଲୀର ଦୀନ ଦୟାଲ ଉପାଧ୍ୟାୟ ପାର୍କରେ ଆୟୋଜିତ ‘ଭଜନ କ୍ଲବିଂ’ କାର୍ଯ୍ୟକ୍ରମରେ ସାମିଲ ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ୧୧୦ତମ ଜୟନ୍ତୀ ଅବସରରେ ଏହି ସ୍ବତନ୍ତ୍ର ଭକ୍ତି ସଙ୍ଗୀତ କାର୍ଯ୍ୟକ୍ରମ ଆୟୋଜନ କରାଯାଇଥିଲା। କାର୍ଯ୍ୟକ୍ରମ ସମୟରେ ପ୍ରଧାନମନ୍ତ୍ରୀ ଦର୍ଶକଙ୍କ ମଧ୍ୟରେ ବସି ଭଜନ ଶୁଣିଥିଲେ। ଶିଳ୍ପୀମାନଙ୍କ ସହ ସେ ତାଳି ବଜାଇବା ସହ ରାମ ଭଜନରେ ସ୍ବର ମିଳାଇଥିବା ଦେଖିବାକୁ ମିଳିଥିଲା। ଭଗବାନ ରାମଙ୍କୁ ସମର୍ପିତ ଏକ ଭଜନ ସମୟରେ ମୋଦୀ ଡଫଲି ଭଳି ଏକ ଛୋଟ ବାଦ୍ୟଯନ୍ତ୍ର ମଧ୍ୟ ବଜାଇଥିଲେ।
କାର୍ଯ୍ୟକ୍ରମରେ ବହୁ ସଂଖ୍ୟାରେ ଯୁବତୀଯୁବକ ଉପସ୍ଥିତ ଥିଲେ। ସେମାନେ ତାଳି ବଜାଇବା ସହ ଗାୟକମାନଙ୍କ ସହ ଭଜନ ଗାଇଥିଲେ। କାର୍ଯ୍ୟକ୍ରମ ସ୍ଥଳରେ ପହଞ୍ଚିବା ସମୟରେ ପ୍ରଧାନମନ୍ତ୍ରୀ ମଧ୍ୟ ଉପସ୍ଥିତ ଲୋକଙ୍କୁ ହାତ ହଲାଇ ଅଭିବାଦନ ଜଣାଇଥିଲେ। ଏହାପୂର୍ବରୁ ମୋଦି ପଣ୍ଡିତ ଦୀନଦୟାଲ ଉପାଧ୍ୟାୟଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ। ଏହି ଅବସରରେ ସେ ଦୀନଦୟାଲ ଉପାଧ୍ୟାୟଙ୍କ ‘ଅନ୍ତ୍ୟୋଦୟ’ ଦର୍ଶନ ସମ୍ପର୍କରେ ମଧ୍ୟ ଆଲୋଚନା କରିଥିଲେ।
‘ଭଜନ କ୍ଲବିଂ’ ହେଉଛି ଭକ୍ତି ସଙ୍ଗୀତକୁ କନ୍ସର୍ଟ ଭଳି ପରିବେଶରେ ପରିବେଷଣ କରିବାର ଏକ ନୂଆ ଧାରା। ଏଥିରେ ବିଶେଷ କରି ଯୁବପିଢ଼ି ଏକାଠି ହୋଇ ଭଜନ ଗାଇବା ଓ ଶୁଣିବାରେ ସାମିଲ ହୁଅନ୍ତି। ଏଭଳି କାର୍ଯ୍ୟକ୍ରମରେ ଲାଇଭ ବ୍ୟାଣ୍ଡ, ଆଧୁନିକ ସାଉଣ୍ଡ ସିଷ୍ଟମ, ଲାଇଟିଂ ଏବଂ କନ୍ସର୍ଟ ଭଳି ପରିବେଶ ରହିଥାଏ। ଯୁବପିଢ଼ି ଭଜନ ଗାଇବା ସହ ତାଳି ବଜାଇ ଓ ନାଚି ଏହି ଭକ୍ତି ସଙ୍ଗୀତର ଆନନ୍ଦ ନେଇଥାନ୍ତି। ପାରମ୍ପରିକ ଭଜନ ଓ କୀର୍ତ୍ତନକୁ ଆଧୁନିକ ସଙ୍ଗୀତ ଶୈଳୀରେ ପରିବେଷଣ କରାଯାଉଥିବାରୁ ‘ଭଜନ କ୍ଲବିଂ’ ବିଶେଷ କରି ଯୁବ ଓ Gen Z ପିଢ଼ି ମଧ୍ୟରେ ଚର୍ଚ୍ଚାରେ ରହିଛି।
ପ୍ରଧାନମନ୍ତ୍ରୀ ମୋଦି ଚଳିତ ବର୍ଷ ଆରମ୍ଭରେ ତାଙ୍କ ମାସିକ ରେଡିଓ କାର୍ଯ୍ୟକ୍ରମ ‘ମନ କି ବାତ୍’ରେ ‘ଭଜନ କ୍ଲବିଂ’ ଟ୍ରେଣ୍ଡ ବିଷୟରେ ଉଲ୍ଲେଖ କରିଥିଲେ। ଯୁବପିଢ଼ିଙ୍କ ମଧ୍ୟରେ ଏଭଳି କାର୍ଯ୍ୟକ୍ରମ ପ୍ରତି ବଢ଼ୁଥିବା ଆଗ୍ରହ ଆଧ୍ୟାତ୍ମିକତା, ସଂସ୍କୃତି ଓ ଆଧୁନିକତାର ଏକ ମିଶ୍ରଣ ବୋଲି ସେ କହିଥିଲେ। ସେ ଭଜନ କ୍ଲବିଂର ପରିବେଶକୁ ଗ୍ଲୋବାଲ କନ୍ସର୍ଟ ସହ ମଧ୍ୟ ତୁଳନା କରିଥିଲେ। ଏହାପରଠାରୁ ଦେଶର ବିଭିନ୍ନ ସହରରେ ଯୁବପିଢ଼ିଙ୍କୁ ନେଇ ଆୟୋଜିତ ଭଜନ କାର୍ଯ୍ୟକ୍ରମରେ ଏହି ଧାରା ଦେଖିବାକୁ ମିଳୁଛି।
ସୌଜନ୍ୟ ଧରିତ୍ରୀ
