ବେରୁଟ: ଲେବାନନରେ ହିଜବୁଲ୍ଲା ବିରୋଧରେ ଇସ୍ରାଏଲସାମରିକ କାର୍ଯ୍ୟାନୁଷ୍ଠାନକୁ ଜୋରଦାର୍ କରିଛି। ଇସ୍ରାଏଲୀ ବାୟୁସେନା ୭୦ ରୁ ଅଧିକ ହିଜବୁଲ୍ଲା ସାମରିକ ଘାଟିକୁ ସିଧାସଳଖ ଟାର୍ଗେଟ କରି ବୋମାମାଡ଼ କରିଛି। ଏହି ଏୟାର ଷ୍ଟ୍ରାଇକ୍ରେ ପ୍ରାୟ ୮୫ ଗୋଳାବାରୁଦ ବ୍ୟବହାର କରାଯାଇଥିଲା। ଏହି ଆକ୍ରମଣ ସମଗ୍ର ଅଞ୍ଚଳକୁ ଧ୍ୱଂସ କରିଦେଇଛି। ଇସ୍ରାଏଲ ପ୍ରତିରକ୍ଷା ବାହିନୀ ରିପୋର୍ଟ କରିଛି ଯେ, ସୋର ଅଞ୍ଚଳରେ ଥିବା ୧୦ଟି ହିଜବୁଲ୍ଲା କମାଣ୍ଡ ସେଣ୍ଟର ଧ୍ୱଂସ ପାଇଛି, ଅନେକ ଅସ୍ତ୍ରଶସ୍ତ୍ର ଡିପୋ ଏବଂ ଅନ୍ୟାନ୍ୟ ଭିତ୍ତିଭୂମି ନଷ୍ଟ ହୋଇଯାଇଛି। ଇସ୍ରାଏଲୀ ସେନା ଦାବି କରିଛି ଯେ ଏହି ବଡ଼ ଆକ୍ରମଣରେ ଅନେକ ଆତଙ୍କବାଦୀ ମଧ୍ୟ ନିହତ ହୋଇଛନ୍ତି। ଲେବାନନରେ ଏହି ଭୟଙ୍କର ସାମରିକ ଅଭିଯାନରେ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଇସ୍ରାଏଲ ଲେବାନନର ବେକା ଉପତ୍ୟକା ଏବଂ ଅନ୍ୟାନ୍ୟ ଅଞ୍ଚଳରେ ହିଜବୁଲ୍ଲାର ଶିବିର ଗୁଡ଼ିକ ଉପରେ ପ୍ରବଳ ବୋମାମାଡ଼ କରିଛି। ସମ୍ବାଦ ସରବରାହ ସଂସ୍ଥାଗୁଡ଼ିକ ଅନୁସାରେ, ଏହି ସଦ୍ୟତମ ବିମାନ ଆକ୍ରମଣରେ ସାତ ଜଣ ଲୋକଙ୍କର ମୃତ୍ୟୁ ହୋଇଛି। ଅନେକ ସାଧାରଣ ନାଗରିକ ଗୁରୁତର ଆହତ ହୋଇଛନ୍ତି।
ଉଦ୍ଦେଶ୍ୟ: ହିଜବୁଲ୍ଲାର ସାମରିକ ଶକ୍ତିକୁ ସମ୍ପୂର୍ଣ୍ଣ ନଷ୍ଟ
ଇସ୍ରାଏଲୀ ସେନା ଏହାର ସରକାରୀ ବିବୃତିରେ ଦାବି କରିଛି ଯେ, ଆତଙ୍କବାଦୀମାନଙ୍କୁ ଟାର୍ଗେଟ କରାଯାଇଥିଲା। ଆକ୍ରମଣ ସମୟରେ ମୋଟରସାଇକେଲରେ ଯାତ୍ରା କରୁଥିବା ହିଜବୁଲ୍ଲା ଆତଙ୍କବାଦୀମାନେ ମଧ୍ୟ ନିହତ ହୋଇଥିଲେ। ଇସ୍ରାଏଲର ପ୍ରାଥମିକ ଉଦ୍ଦେଶ୍ୟ ହେଉଛି ହିଜବୁଲ୍ଲାର ସାମରିକ ଶକ୍ତିକୁ ସମ୍ପୂର୍ଣ୍ଣ ଭାବରେ ନଷ୍ଟ କରିବା। ଲେବାନନ ଉପରେ ଏହି ବଡ଼ ଆକ୍ରମଣ ପରେ, ହିଜବୁଲ୍ଲାର ପ୍ରତିଶୋଧର ଆଶଙ୍କା ନେଇ ଇସ୍ରାଏଲରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ଇସ୍ରାଏଲର ହୋମ୍ ଫ୍ରଣ୍ଟ୍ କମାଣ୍ଡ ଉତ୍ତର ଇସ୍ରାଏଲର ସୀମାବର୍ତ୍ତୀ ଅଞ୍ଚଳଗୁଡ଼ିକରେ କଠୋର କଟକଣା ଲାଗୁ କରିଛି। ଏହି ଅଞ୍ଚଳରେ ରହୁଥିବା ସାଧାରଣ ନାଗରିକଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ କର୍ତ୍ତୃପକ୍ଷଙ୍କୁ ହାଇ ଆଲର୍ଟରେ ରଖାଯାଇଛି। ସୁରକ୍ଷା ଦୃଷ୍ଟିରୁ ଉତ୍ତର ଇସ୍ରାଏଲର ସ୍ଥାନୀୟ କର୍ତ୍ତୃପକ୍ଷ ସମସ୍ତ ସ୍କୁଲକୁ ସମ୍ପୂର୍ଣ୍ଣ ବନ୍ଦ କରିଦେଇଛନ୍ତି। ବାହ୍ୟ କାର୍ଯ୍ୟକ୍ରମଗୁଡ଼ିକରେ ସର୍ବାଧିକ ୫୦ ଜଣ ସାମିଲ ହେବାକୁ କୁହାଯାଇଛି। ସେହିପରି ଘର ଭିତର ସମାବେଶରେ ୨୦୦ ଲୋକଙ୍କୁ ସାମିଲ ହେବାକୁ ଅନୁମତି ପ୍ରଦାନ କରାଯାଇଛି।
ସୌଜନ୍ୟ ସମ୍ବାଦ