World Photography Day: ଡାର୍କ ରୁମ୍ରୁ ଚା’ ଦୋକାନ, ଫଟୋଗ୍ରାଫର୍ଙ୍କ ୫ ଦଶନ୍ଧିର ଯାତ୍ରା
ବେଉସା ଛଡ଼ାଇନେଲା ସମୟ । ଡାର୍କରୁମ୍ରୁ ଚା’ଦୋକାନ । ଫଟୋଗ୍ରାଫର୍ଙ୍କ ୫ ଦଶନ୍ଧିର ଯାତ୍ରା । ଜାଣନ୍ତୁ ଫଟୋଗ୍ରାଫର ତୋଟା ରାଜୁ ଙ୍କ କାହାଣୀ ।
ବ୍ରହ୍ମପୁର, ୧୯/୮ : ସମୟ ବଦଳିଛି, ଫଟୋଗ୍ରାଫିର ଦୁନିଆ ବଦଳିଛି । ଏବେ ଡିଜିଟାଲ କ୍ୟାମେରା, ମୋବାଇଲ୍ ଓ ଆଧୁନିକ ଏଡିଟିଂର ଯୁଗ । ହେଲେ ଦିନେ ଏମିତି ଏକ ସମୟ ଥିଲା, ଯେତେବେଳେ ଗୋଟିଏ କଳାଧଳା ଫଟୋକୁ ଜୀବନ୍ତ ରୂପ ଦେବା ପାଇଁ ଦରକାର ପଡୁଥିଲା ଧୈର୍ଯ୍ୟ, ଦକ୍ଷତା ଓ ରସାୟନର ଜ୍ଞାନ । ସେହି ସମୟରେ ଲୋକଙ୍କ ସ୍ମୃତିକୁ ଜୀବନ୍ତ ରୂପ ଦେଉଥିବା ଲୋକ ଆଜି ଅଲୋଡ଼ା । ଏହିପରି ଜଣେ ବ୍ୟକ୍ତିତ୍ୱ ହେଉଛନ୍ତି ଶ୍ରୀକ୍ଷେତ୍ର ବିହାରରେ ରହୁଥିବା ତୋଟା ରାଜୁ । ବୟସ ୭୪ ପାର କଲାଣି । ଷ୍ଟୁଡ଼ିଓରୁ ଡାର୍କରୁମ୍ ହଟିଛି । ଯେଉଁ ହାତ ଦିନେ ଡାର୍କରୁମ୍ରେ ଚଳଚଞ୍ଚଳ ଥିଲା, ସେହି ହାତ ଏବେ ଗ୍ରାହକଙ୍କୁ ଚା’ ପରଷୁଛି ।
ସହରର ସର୍ବ ପୁରାତନ ଫଟୋ ଷ୍ଟୁଡିଓ ମଧ୍ୟରୁ ତୋଟା ଷ୍ଟୁଡିଓ ଅନ୍ୟତମ । ତୋଟା ରାଜୁ କୁହନ୍ତି, ବାପା ତୋଟା ଭେଙ୍କଟେଶ୍ୱର ରାଓ ଏହି ଷ୍ଟୁଡିଓ ତିଆରି କରିଥିଲେ । ସେ ୧୨ ବର୍ଷରୁ ସେଠାରେ ଫଟୋ ଉଠାଇବା, ଗ୍ଲାସ ପ୍ଲେଟରୁ ନେଗେଟିଭ୍ ପ୍ଲେଟ୍, ଡାର୍କ ରୁମରେ ନେଗେଟିଭ୍ ରିଲ୍ରୁ ଫଟୋ ଡେଭେଲପ୍ କାମ କରୁଥିଲେ । ଅନେକ ସମୟରେ ରିଲରେ କିଛିଟା ତ୍ରୁଟି ରହୁଥିଲା ।ତାହାକୁ ବ୍ଲେଡ୍, ପେନସିଲ୍ ଓ ଅନ୍ୟାନ୍ୟ ସାମଗ୍ରୀ ମାଧ୍ୟମରେ ସଜାଡୁଥିଲେ । ଏହି କାମ ପାଇଁ ପ୍ରତି ମାସରେ ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶର ଇଚ୍ଛାପୁର ଅଞ୍ଚଳରୁ ଅନେକ ଅର୍ଡର ମଧ୍ୟ ଆସୁଥିଲା। ଏବେ ଯୁଗ ବଦଳିଛି । ଡିଜିଟାଲ ଯୁଗ ଆସିବା ପରେ ପାରମ୍ପରିକ ଫଟୋ ପ୍ରୋସେସିଂର ଚାହିଦା କମିଗଲା । ଦୀର୍ଘ ୫୦ ବର୍ଷ ଧରି ଫଟୋଗ୍ରାଫି ସହ ନିଜକୁ ଜଡ଼ିତ ରଖିବା ପରେ ୨୦୧୨ ମସିହା ପରଠୁ ଏହାଠୁ ଦୂରେଇ ରହିଛନ୍ତି । ଆଜି ସେ ଏକ ଛୋଟ ଚା’ ଦୋକାନ କରି ଗୁଜରାଣ ମେଣ୍ଟାଉଛନ୍ତି । ଚା’ କପରୁ ଉଠୁଥିବା ଧୂଆଁ ଭିତରେ ତାଙ୍କ ଜୀବନର ପୁରୁଣା ଦିନଗୁଡିକୁ ସେ ଦେଖୁଥିବା କୁହନ୍ତି । ତାଙ୍କ ମନରେ ଆଜି ବି ବଞ୍ଚିଛି ସେହି ପୁରୁଣା ଫଟୋଗ୍ରାଫିର ଦିନ ।
ସୌଜନ୍ୟ ପ୍ରମେୟ
