ମୁମ୍ବାଇ,୨୯\୯ : ପାଣି ପାଇଁ ବିକ୍ରି ହେବ ଗାଁ । ମହାରାଷ୍ଟ୍ରର ସୋଲାପୁର ଜିଲ୍ଲାର ତୁଳସୀ ଗାଁରେ ଜଳାଭାବ ଯୋଗୁ ଚିନ୍ତିତ ଲୋକେ ଏହା କରିବାକୁ ଯାଉଛନ୍ତି । ଏଥିପାଇଁ ସେମାନେ ଗାଁରେ ଏକ ବୋର୍ଡ ଲଗାଇଛନ୍ତି । କେବଳ ଜଳ ଆଧାରରେ ଗାଁର ମୂଲ୍ୟ ସ୍ଥିର କରାଯାଇଛି । ଏ ଅନ୍ୟାୟ କେବେ ଯାଏ ସହ୍ୟ କରିବେ ବୋଲି ବୋର୍ଡରେ ଉଲ୍ଲେଖ ହୋଇଛି । ମହାରାଷ୍ଟ୍ରର ୨୬୫ ତହସିଲ ମରୁଡ଼ିଗ୍ରସ୍ତ ଘୋଷିତ ହୋଇଛି ।
ମାଢା ତହସିଲର ତୁଳସୀ ଗାଁର ଲୋକସଂଖ୍ୟା ୭୦୦୦ । ଗ୍ରାମବାସୀ ଦୀର୍ଘ ବର୍ଷ ଧରି ପାଣି ସମସ୍ୟାର ସମ୍ମୁଖୀନ ହେଉଛନ୍ତି । ଚାଷ ଜମି ଓ କୂଅ ଶୁଖିଲା ପଡ଼ିଛି । ଲୋକଙ୍କୁ ପାଣି ଟାଙ୍କି ଉପରେ ନିର୍ଭର କରିବାକୁ ପଡୁଛି । ଗାଁର ସରପଞ୍ଚ ଶରଦ ମୋରେଙ୍କ ଅନୁସାରେ, ଜଳ ସଙ୍କଟ ଯୋଗୁ ଗାଁର ପ୍ରାୟ ୩୫୦ ଯୁବକଙ୍କ ବିବାହ ହୋଇପାରୁନି । ରାଜ୍ୟ ସରକାର ଗତ ୨୬ ତାରିଖ ରାଜ୍ୟର ୩୫୮ ତହସିଲ ମଧ୍ୟରୁ ୨୬୫କୁ ମରୁଡ଼ିଗ୍ରସ୍ତ ଘୋଷଣା କରିଛନ୍ତି । ଏଥିସହ ଉପଷମ ପ୍ୟାକେଜ୍ ବି ଘୋଷଣା କରିଛନ୍ତି ।
ସୌଜନ୍ୟ ପ୍ରମେୟ
