ୱାଶିଂଟନ : ବ୍ରାଜିଲରେ ରାଷ୍ଟ୍ରପତି ନିର୍ବାଚନ ଚାଲିଥିବା ବେଳେ ଏହାକୁ ନେଇ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସାମାଜିକ ଗଣମାଧ୍ୟମରେ ଏକ ପୋଷ୍ଟ କରିଥିଲେ, ଯେଉଁଥିପାଇଁ ତାଙ୍କୁ ଉପହସିତ ହେବାକୁ ପଡ଼ିଛି। ସେ ଭୁଲବଶତଃ ପୋଷ୍ଟରେ ‘ବ୍ରାଜିଲ’ ବଦଳରେ ‘ଭାରତ’ ଲେଖିଦେଇଥିଲେ। ଏହି ଭୁଲ ସାମାଜିକ ଗଣମାଧ୍ୟମରେ ଆଲୋଚନାର ବିଷୟ ପାଲଟିଛି। ଟ୍ରମ୍ପ ପୂର୍ବରୁ ମଧ୍ୟ ଏଭଳି ଭୁଲ କରିଛନ୍ତି। ଉଲ୍ଲେଖନୀୟ ବିଷୟ ହେଉଛି, ଏହି ପୋଷ୍ଟ ମାଧ୍ୟମରେ ସେ ଆମେରିକାର ନିର୍ବାଚନ ପ୍ରକ୍ରିୟା ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି।
ସୋସିଆଲ ମିଡିଆ ପୋଷ୍ଟରେ ଥିବା ଭୁଲ ବ୍ୟତୀତ, ଟ୍ରମ୍ପ ଆମେରିକାର ନିର୍ବାଚନ ବ୍ୟବସ୍ଥାକୁ ମଧ୍ୟ ଟାର୍ଗେଟ କରିଥିଲେ। ‘ଟ୍ରୁଥ’ ପ୍ଲାଟଫର୍ମରେ ଶେୟାର କରିଥିବା ଏକ ପୋଷ୍ଟରେ ସେ ଲେଖିଥିଲେ, ‘ଭାରତର ରାଷ୍ଟ୍ରପତି ନିର୍ବାଚନର ପ୍ରଥମ ପର୍ଯ୍ୟାୟରେ ୧୨ କୋଟି ୫୦ ଲକ୍ଷ ଲୋକ ଭୋଟ ଦେଇଛନ୍ତି। ନିର୍ବାଚନ ଶେଷ ହେବାର କିଛି ସମୟ ମଧ୍ୟରେ ଫଳାଫଳ ପ୍ରକାଶ ପାଇବ। ଅନ୍ୟପକ୍ଷରେ ଡେଟ୍ରୋଇଟ, ଫିଲାଡେଲଫିଆ, କାଲିଫର୍ଣ୍ଣିଆ ଏବଂ ଆମେରିକାର ଅନ୍ୟାନ୍ୟ ସହର ଓ ରାଜ୍ୟ ଯେଉଁଠାରେ ଭୋଟ ହାର ଅତ୍ୟନ୍ତ କମ୍, ଫଳାଫଳ ଗଣନା କରିବାକୁ ପ୍ରାୟତଃ ସପ୍ତାହ ସମୟ ଲାଗିଥାଏ। ଆମେରିକାର ଭୋଟିଂ ବ୍ୟବସ୍ଥା ଦୁର୍ନୀତିଗ୍ରସ୍ତ ଅଟେ।’
ଉଲ୍ଲେଖନୀୟ ଯେ, ବ୍ରାଜିଲ ରାଷ୍ଟ୍ରପତି ନିର୍ବାଚନର ପ୍ରଥମ ପର୍ଯ୍ୟାୟରେ ୯୮.୮୧ ପ୍ରତିଶତ ଭୋଟ ଗଣତି ସରିବା ବେଳକୁ ବୋଲସୋନାରୋ ୪୭.୨୪ ପ୍ରତିଶତ ଏବଂ ଲୁଲା ୪୪.୯୧ ପ୍ରତିଶତ ଭୋଟ ହାସଲ କରିଥିଲେ। ଏହି ପ୍ରଥମ ପର୍ଯ୍ୟାୟରେ, ଦକ୍ଷିଣପନ୍ଥୀ ପ୍ରାର୍ଥୀ ବୋଲସୋନାରୋ ବର୍ତ୍ତମାନର ରାଷ୍ଟ୍ରପତି ଲୁଇଜ ଇନାସିଓ ଲୁଲା ଡା ସିଲଭାଙ୍କ ଠାରୁ ଆଗରେ ରହିଥିଲେ। ତଥାପି ସିଧାସଳଖ ବିଜୟ ପାଇଁ ଆବଶ୍ୟକ ୫୦ ପ୍ରତିଶତ ଭୋଟ ହାସଲ କରିବାରେ ସେ ବିଫଳ ହୋଇଥିଲେ।
ଉଭୟ ପ୍ରାର୍ଥୀଙ୍କ ମଧ୍ୟରେ ଦ୍ୱିତୀୟ ପର୍ଯ୍ୟାୟ ନିର୍ବାଚନୀ ମୁକାବିଲା ଅକ୍ଟୋବର ୨୫ରେ ଅନୁଷ୍ଠିତ ହେବ। ବ୍ରାଜିଲର ନିର୍ବାଚନ ବ୍ୟବସ୍ଥା ଅନୁଯାୟୀ, ପ୍ରଥମ ପର୍ଯ୍ୟାୟରେ ବିଜୟୀ ହେବା ପାଇଁ ଜଣେ ପ୍ରାର୍ଥୀଙ୍କୁ ମୋଟ ଭୋଟର ୫୦ ପ୍ରତିଶତରୁ ଅଧିକ ଭୋଟ ହାସଲ କରିବାକୁ ପଡ଼ିଥାଏ। ଯେହେତୁ କୌଣସି ପ୍ରାର୍ଥୀ ଏହି ସୀମା ଅତିକ୍ରମ କରିପାରିନାହାନ୍ତି, ତେଣୁ ସେମାନେ ବର୍ତ୍ତମାନ ଦ୍ୱିତୀୟ ପର୍ଯ୍ୟାୟରେ ପରସ୍ପରର ମୁକାବିଲା କରିବେ।
ସୌଜନ୍ୟ ସମାଜ
