Ajit Doval: ‘ଅପରେସନ୍ ସିନ୍ଦୂର’କୁ ନେଇ ଅଜିତ ଡୋଭାଲଙ୍କ ବଡ଼ ଖୁଲାସା, ପାତାଳରୁ ବି ଖୋଜି ମାରିବାକୁ ନିର୍ଦ୍ଦେଶ ଦେଇଥିଲେ ପ୍ରଧାନମନ୍ତ୍ରୀ

୨୨ ଏପ୍ରିଲ ୨୦୨୫ ସକାଳେ ପହଲଗାମର ବୈସରଣ ଅଞ୍ଚଳରେ ହଠାତ ଗୁଳିବର୍ଷା ଆରମ୍ଭ ହୋଇଥିଲା, ଯେଉଁଠାରେ ଆତଙ୍କବାଦୀମାନେ ନିରୀହ ପର୍ଯ୍ୟଟକମାନଙ୍କୁ ଘେରିଯାଇ ଧର୍ମ ପଚାରି ଗୁଳି ଚଳାଇଥିଲେ । ଏହି ଭୟାବହ ଆକ୍ରମଣରେ ୨୬ ଜଣ ନିରୀହ ପର୍ଯ୍ୟଟକ ପ୍ରାଣ ହରାଇଥିଲେ, ଯେଉଁଥିରେ ଜଣେ ବିଦେଶୀ ନାଗରିକ ମଧ୍ୟ ସାମିଲ ଥିଲେ ଏବଂ ଏହି ଘଟଣା ସମଗ୍ର ଦେଶକୁ ଦୋହଲାଇ ଦେଇଥିଲା । ଅପରପକ୍ଷରେ, ଆକ୍ରମଣର ଖବର ପାଇବା ମାତ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାଉଦି ଆରବ ଗସ୍ତ ଅଧାରୁ ଛାଡ଼ି ସିଧାସଳଖ ଦିଲ୍ଲୀ ଫେରିଆସିଥିଲେ ।

ଦିଲ୍ଲୀରେ ପହଞ୍ଚିବା ପରେ ସେ ଉଚ୍ଚସ୍ତରୀୟ ଅଧିକାରୀମାନଙ୍କ ସହ ତୁରନ୍ତ ଏକ ବୈଠକ କରି ସମସ୍ତ ଅପରାଧୀଙ୍କୁ ଚିହ୍ନଟ କରିବାକୁ କହିଥିଲେ । କାର୍ଯ୍ୟାନୁଷ୍ଠାନ ପୂର୍ବରୁ ଗୁପ୍ତଚର ସୂଚନା ସଂଗ୍ରହ କରାଯାଇ ଲକ୍ଷ୍ୟ ସ୍ଥିର କରାଯାଇଥିଲା, ଯଦ୍ଦ୍ୱାରା ନାଗରିକ ଓ ସାମରିକ କ୍ଷୟକ୍ଷତି କମ୍ ରଖାଯାଇପାରିବ । ସୂଚନାଯୋଗ୍ୟ, ପହଲଗାମ ଆକ୍ରମଣ ପାଇଁ ଆତଙ୍କୀ ସଂଗଠନ ‘ଦ ରେଜିଷ୍ଟାନ୍ସ ଫ୍ରଣ୍ଟ’ (ଟିଆର୍‌ଏଫ) ନିଜକୁ ଦାୟୀ କରିଥିଲା। ଏହାର ଜବାବ ଦେବା ପାଇଁ ‘ଅପରେସନ୍ ସିନ୍ଦୂର’ ଯୋଜନା ପ୍ରସ୍ତୁତ କରାଯାଇ ସେନାର ତିନୋଟି ଯାକ ବାହିନୀକୁ ଆଲର୍ଟ ମୋଡ୍‌ରେ ରଖାଯାଇଥିଲା । ଗୁପ୍ତଚର ସୂଚନା ଆଧାରରେ ୯ ଟି ବଡ଼ ଆତଙ୍କବାଦୀ ଶିବିର ଚୟନ କରାଯାଇଥିଲା, ଯେଉଁଥିମଧ୍ୟରୁ ୫ ଟି ପ୍ରତିଷ୍ଠାନ ପାକିସ୍ତାନ ଅଧିକୃତ କାଶ୍ମୀରରେ ଏବଂ ୪ଟି ପ୍ରତିଷ୍ଠାନ ସିଧାସଳଖ ପାକିସ୍ତାନ ଭିତରେ ଥିଲା।