ୱାସିଂଟନ: ଗୁରୁବାର ରାତିରେ ପାକିସ୍ତାନରେ ଆମେରିକା-ଇରାନ ଅସ୍ତ୍ରବିରତି ଆଲୋଚନା ସହ ଜଡିତ ଘଟଣାକ୍ରମ ଉପରେ ସମସ୍ତଙ୍କ ନଜର ଥିଲା, ଯେତେବେଳେ ମେଲାନିଆ ଟ୍ରମ୍ପ ଘୋଷଣା କଲେ, ମୋର ଏପଷ୍ଟିନଙ୍କ ସହ କେବେ ବନ୍ଧୁତା ନ ଥିଲା। ଯେତେବେଳେ ହ୍ୱାଇଟ୍ ହାଉସ୍ କହିଲା ଯେ, ମେଲାନିଆ ଟ୍ରମ୍ପ ଏକ ଘୋଷଣା କରିବେ, ସେତେବେଳେ ଏହା କ’ଣ ତାହା କେହି ଜାଣି ନ ଥିଲେ। ଆଶ୍ଚର୍ଯ୍ୟର କଥା, ଡୋନାଲ୍ଡ ଟ୍ରମ୍ପ ମଧ୍ୟ ଜାଣି ନ ଥିଲେ।
ଆମେରିକାର ପ୍ରଥମ ମହିଳା ସ୍ୱର୍ଗତ ଯୌନ ଅପରାଧୀ ଜେଫ୍ରି ଏପଷ୍ଟିନଙ୍କ ସହ କୌଣସି ସମ୍ପର୍କକୁ ଅସ୍ୱୀକାର କରିଛନ୍ତି। ସେ ଏକ ବିରଳ ଓ ଅପ୍ରତ୍ୟାଶିତ ସର୍ବସାଧାରଣ ବିବୃତିରେ କହିଛନ୍ତି, ମୁଁ ଏପଷ୍ଟିନଙ୍କ ଶିକାର ନୁହେଁ। ସ୍ପଷ୍ଟ ଭାବରେ କହିବାକୁ ଗଲେ, ଏପଷ୍ଟିନ କିମ୍ବା ତାଙ୍କ ସହଯୋଗୀ ମ୍ୟାକ୍ସୱେଲଙ୍କ ସହ ମୋର କେବେ ବି ସମ୍ପର୍କ ନ ଥିଲା। ମୁଁ ଏପଷ୍ଟିନଙ୍କ ସହ କେବେବି ବନ୍ଧୁତା କରିନାହିଁ। ଡୋନାଲ୍ଡ ଓ ମୋତେ ସମୟ ସମୟରେ ଏପଷ୍ଟିନଙ୍କ ପରି ସମାନ ପାର୍ଟିକୁ ନିମନ୍ତ୍ରଣ କରାଯାଇଥିଲା। ଏପଷ୍ଟିନ ମୋତେ ଡୋନାଲ୍ଡ ଟ୍ରମ୍ପଙ୍କ ସହ ପରିଚିତ କରାଇ ନ ଥିଲେ। ମୁଁ ଆକସ୍ମିକ ଭାବରେ ମୋ ସ୍ୱାମୀଙ୍କୁ ଭେଟିଥିଲି। ମେଲାନିଆ ଏତିକିରେ ଅଟକି ନ ଥିଲେ। ସେ ଏପରିକି ଉଲ୍ଲେଖ କରିଛନ୍ତି ଯେ ସେ କେବେବି ଏପଷ୍ଟିନଙ୍କ କୁଖ୍ୟାତ ବିମାନରେ ଯାଇ ନ ଥିଲେ ଏବଂ ତାଙ୍କ ବ୍ୟକ୍ତିଗତ ଦ୍ୱୀପ ପରିଦର୍ଶନ କରିନଥିଲେ। ଏପଷ୍ଟିନଙ୍କ ପୀଡିତଙ୍କ ପ୍ରତି ଦୁର୍ବ୍ୟବହାର ବିଷୟରେ ତାଙ୍କର କୌଣସି ଜ୍ଞାନ ନ ଥିଲା।
୨୦୦୫ରେ ବର୍ତ୍ତମାନର ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ବିବାହ କରିଥିବା ମେଲାନିଆ କହିଛନ୍ତି ଯେ, ସେ କେବଳ ଏପଷ୍ଟିନଙ୍କ ସହଯୋଗୀ ତଥା ପୂର୍ବତନ ଗାର୍ଲଫ୍ରେଣ୍ଡ ଗିସଲେନ ମ୍ୟାକ୍ସୱେଲଙ୍କ ସହ ସାମୟିକ ଯୋଗାଯୋଗ କରିଥିଲେ ଏବଂ ୨୦୦୨ରେ ମ୍ୟାକ୍ସୱେଲଙ୍କୁ ପଠାଇଥିବା ଏକ ଇମେଲକୁ ଏକ କାଜୁଆଲ୍ ଚିଠି ବୋଲି ବର୍ଣ୍ଣନା କରିଥିଲେ। ବିମାନ, ଦ୍ୱୀପ ଓ ଇମେଲଗୁଡିକର ସଚେତନ ଉଲ୍ଲେଖ କିଛି ନିର୍ଦ୍ଦିଷ୍ଟ ଅଭିଯୋଗକୁ ଅସ୍ୱୀକାର କରିବାକୁ ଏକ ପ୍ରୟାସ ପରି ମନେ ହେଉଥିଲା। କିନ୍ତୁ ଏପଷ୍ଟିନଙ୍କ ସହ ମେଲାନିଆଙ୍କ ସମ୍ପର୍କକୁ ନେଇ କୌଣସି ଗୁଜବ ନ ଥିଲା। କୌଣସି ନୂତନ ଅଭିଯୋଗ ଆସିନାହିଁ। ସମସ୍ତଙ୍କୁ ଆଶ୍ଚର୍ଯ୍ୟ କରି ମେଲାନିଆଙ୍କ ସ୍ୱାମୀ ତଥା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ ସେ ଏକ ବିବୃତି ଦେବାକୁ ଯାଉଛନ୍ତି ବୋଲି ସେ ଜାଣି ନ ଥିଲେ।
ମେଲାନିଆଙ୍କ ଆଶ୍ଚର୍ଯ୍ୟଜନକ ଅଭିଭାଷଣ ଗଣମାଧ୍ୟମ ସମେତ ସମସ୍ତଙ୍କୁ ଚକିତ କରିଦେଇଥିଲା। ସେମାନେ ଏହାକୁ କୌଣସି ସାମ୍ପ୍ରତିକ ଘଟଣା ସହିତ ସଂଯୋଗ କରିପାରିଲେ ନାହିଁ କାରଣ ଏପଷ୍ଟିନଙ୍କ ସହ ମେଲାନିଆଙ୍କ ସମ୍ପର୍କକୁ ନେଇ କୌଣସି ଗୁଜବ ନ ଥିଲା। ତା’ ସତ୍ତ୍ବେ ସେ ଏହା ଉପରେ ବିବୃତି ଦେବାର ଅର୍ଥ କ’ଣ ହୋଇପାରେ? କିଛି ଲୋକ ଅନୁମାନ କରୁଛନ୍ତି ଯେ, ହୁଏତ ଏପରି କିଛି ଅଭିଯୋଗ ଆସିବାର ଆଶଙ୍କା ଥିବା ଜାଣି ମେଲାନିଆ ଆଗରୁ ସ୍ପଷ୍ଟୀକରଣ ଦେଇଛନ୍ତି। ଆଉ କିଛି ମନେ କରୁଛନ୍ତି ଯେ, ଏପଷ୍ଟିନ ଫାଇଲରୁ ଧ୍ୟାନ ହଟାଇବା ପାଇଁ ବୋଧହୁଏ ଟ୍ରମ୍ପ ଇରାନ ଆକ୍ରମଣ କରିଥିଲେ ଏବଂ ବର୍ତ୍ତମାନ ଇରାନ ଯୁଦ୍ଧ ପ୍ରସଙ୍ଗରୁ ଧ୍ୟାନ ହଟାଇବା ପାଇଁ ମେଲାନିଆ ଏପଷ୍ଟିନ ପ୍ରସଙ୍ଗ ଉଠାଇଛନ୍ତି।
ସୌଜନ୍ୟ Prameya News7
