ୱାସିଂଟନ:ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ବନ୍ଦ କରିବା ପାଇଁ ଦ୍ୱିତୀୟ ପର୍ଯ୍ୟାୟ ଆଲୋଚନା ସମ୍ପର୍କରେ କଳ୍ପନାଜଳ୍ପନା ଚାଲିଛି। ପାକିସ୍ତାନ ଏବଂ ଇଜିପ୍ଟର ପ୍ରୟାସ ଯୋଗୁଁ ଇସଲାମାବାଦରେ ଅନୁଷ୍ଠିତ ପ୍ରଥମ ବୈଠକ କୌଣସି ନିଷ୍କର୍ଷ ବିନା ଶେଷ ହୋଇଥିଲା। ଏହି ସମୟରେ, ଭାରତରେ ଆମେରିକାର ରାଷ୍ଟ୍ରଦୂତ ଏବଂ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଜଣେ ଘନିଷ୍ଠ ବ୍ୟକ୍ତି ସର୍ଗିଓ ଗୋର୍ ଯୁଦ୍ଧ ବନ୍ଦ କରିବାରେ ଭାରତର ଭୂମିକା ବିଷୟରେ ଏକ ଗୁରୁତ୍ୱପୂର୍ଣ୍ଣ ବିବୃତି ଦେଇଛନ୍ତି। ସେ କହିଛନ୍ତି, ମଧ୍ୟପ୍ରାଚ୍ୟରେ ଶାନ୍ତି ପ୍ରୟାସରେ ଭାରତର ଅଂଶଗ୍ରହଣକୁ ଆମେରିକା ସ୍ୱାଗତ କରିବ। ସତ କହିବାକୁ ଗଲେ, ଏହା ଭାରତ ପାଇଁ ଏକ ପ୍ରଶ୍ନ। ମୁଁ ଭାବୁଛି ସମଗ୍ର ବିଶ୍ୱ ଶାନ୍ତି ପ୍ରକ୍ରିୟାରେ ଏକ ଭୂମିକା ଗ୍ରହଣ କରିପାରିବ, ଏବଂ ଏଥିରେ ଭାରତ ମଧ୍ୟ ଅନ୍ତର୍ଭୁକ୍ତ ରହିଛି। ତେବେ ଭାରତକୁ ନିଷ୍ପତ୍ତି ନେବାକୁ ପଡିବ ଯେ, କ””ଣ କରିବାକୁ ହେବ ବୋଲି ସେ କହିଛନ୍ତି। ଟ୍ରମ୍ପ ଏହି ସଂଘର୍ଷର ଅନ୍ତ କରିବାରେ କିଏ ସାହାଯ୍ୟ କରିପାରିବ ସେ ବିଷୟରେ କୌଣସି ଭେଦଭାବ କରୁନାହାନ୍ତି। ଏହି ପ୍ରକ୍ରିୟାରେ ସାମିଲ ହେବାକୁ ଚାହୁଁଥିବା ସମସ୍ତଙ୍କୁ ସେ ସ୍ୱାଗତ କରୁଛନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ରାଷ୍ଟ୍ରପତି ଟ୍ରମ୍ପଙ୍କ ମଧ୍ୟରେ ହୋଇଥିବା ୪୦ ମିନିଟର ଆଲୋଚନା ବିଷୟରେ ସେ କହିଛନ୍ତି, ଟ୍ରମ୍ପଙ୍କ ଗସ୍ତ ପୂର୍ବରୁ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଆସନ୍ତା ମାସରେ ଭାରତ ଗସ୍ତରେ ଆସିବେ। ଇରାନ ସମ୍ପର୍କରେ ଆମେରିକୀୟ ରାଷ୍ଟ୍ରଦୂତ କହିଛନ୍ତି,ତେଲ ଏବଂ ଗ୍ୟାସ୍ ମୂଲ୍ୟ ବୃଦ୍ଧିର କେବଳ ଗୋଟିଏ କାରଣ ଅଛି, ଏବଂ ତାହା ହେଉଛି ଇରାନ ଏହି ଅଞ୍ଚଳକୁ ନିଜ ନିୟନ୍ତ୍ରଣରେ ରଖିଛି। ସେ କହିଛନ୍ତି,ଆମେରିକା ଏହି ଜଳପଥ ଖୋଲିବାକୁ ଚାହୁଁଛି, ଏବଂ ମୁଁ ଭାବୁଛି ଏହା ଭାରତ ସମେତ ସମଗ୍ର ବିଶ୍ୱକୁ ଲାଭ ଦେବ। ଗୋର୍ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଏବଂ ରାଷ୍ଟ୍ରପତି ଟ୍ରମ୍ପ ଇରାନ ବନ୍ଦରଗୁଡ଼ିକର ଆମେରିକାର ଅବରୋଧ ବିଷୟରେ ମଧ୍ୟ ଆଲୋଚନା କରିଛନ୍ତି। ଇସଲାମାବାଦରେ ଆଲୋଚନା ବିଫଳ ହେବା ପରେ ଇରାନ ଏବଂ ଆମେରିକା ମଧ୍ୟରେ ନୂତନ ଆଲୋଚନାର ସମ୍ଭାବନା ବିଷୟରେ ପ୍ରଶ୍ନର ଉତ୍ତର ଦେବାକୁ ସେ ମନା କରିଦେଇଛନ୍ତି। ଭବିଷ୍ୟତର କୌଣସି ଆଲୋଚନା ଘୋଷଣା କରିବା ମୋର କାମ ନୁହେଁ। ସେମାନେ ଅବରୋଧ ଏବଂ ହର୍ମୁଜ୍ ପ୍ରଣାଳୀ ଯଥାଶୀଘ୍ର ପୁନର୍ବାର ଖୋଲିବାର ଗୁରୁତ୍ୱ ଉପରେ ଆଲୋଚନା କରିଥିଲେ। ସତ କହିବାକୁ ଗଲେ ସମଗ୍ର ବିଶ୍ୱ ଏଥିପାଇଁ କଷ୍ଟ ପାଉଛି। ବିଶ୍ୱର ଯେକୌଣସି ସ୍ଥାନରେ ଆଲୋକ ଲିଭାଇବାର ଅଧିକାର କାହିଁକି ଗୋଟିଏ ଦେଶ ପାଖରେ ରହିବ? ଏହା ଅନ୍ୟାୟ। ଏହା ବନ୍ଦ ହେବା ଉଚିତ। ଏହା ନିଶ୍ଚିତ କରିବାକୁ ଆମେରିକା ଦୃଢ଼ ସଂକଳ୍ପର ସହିତ ଆଗକୁ ବଢୁଥିବା ସେ କହିଛନ୍ତି।

ସୌଜନ୍ୟ ସମ୍ବାଦ