Mahatma Gandhi: ଆଜି ଜନ୍ମଦିନ: ମହାତ୍ମା ଗାନ୍ଧୀ

ଆଜି ହେଉଛି ଜାତିର ପିତା ମହାତ୍ମା ଗାନ୍ଧୀଙ୍କ ଜୟନ୍ତୀ। ୧୮୬୯ ମସିହା ଆଜିର ଦିନରେ ଗୁଜରାଟର ପୋରବନ୍ଦରଠାରେ ସେ ଜନ୍ମ ହୋଇଥିଲେ। ତାଙ୍କର ପୂରା ନାମ ମୋହନଦାସ କରମଚାନ୍ଦ ଗାନ୍ଧୀ। ବ୍ରିଟିସ୍‌ ଉପନିବେଶ ଶାସନ ବିରୋଧୀ ଭାରତୀୟ ସ୍ବାଧୀନତା ସଂଗ୍ରାମର ସେ ମୁଖ୍ୟ ନେତା ଭାବେ ବିବେଚିତ। ଅହିଂସା ଓ ସତ୍ୟାଗ୍ରହକୁ ଗୁରୁତ୍ବାରୋପ କରୁଥିବା ହିନ୍ଦୁ ଓ ଜୈନ ଧର୍ମର ଶିକ୍ଷା ଦ୍ବାରା ଗାନ୍ଧୀ ଖୁବ୍‌ ପ୍ରଭାବିତ ହୋଇଥିଲେ। ଇଂଲଣ୍ଡରେ ସେ ଆଇନ ଶିକ୍ଷା ଶେଷ କରି ଦକ୍ଷିଣ ଆଫ୍ରିକାରେ ଓକିଲାତି ଆରମ୍ଭ କରିଥିଲେ। ସେଠାରେ ସେ ବର୍ଣ୍ଣବୈଷମ୍ୟର ଭେଦଭାବକୁ ଅଙ୍ଗେ ନିଭାଇଥିଲେ, ଯାହା ସାମାଜିକ ନ୍ୟାୟ ପ୍ରତି ନିଜକୁ ଉତ୍ସର୍ଗ କରିବା ପାଇଁ ତାଙ୍କୁ ଉତ୍‌ପ୍ରେରିତ କରିଥିଲା।

ସେ ଭାରତ ଫେରିବା ପରେ ଦେଶରେ ଜାରି ରହିଥିବା ସ୍ବାଧୀନତା ସଂଗ୍ରାମ ତୀବ୍ର ରୂପ ନେଇଥିଲା। ଭାରତୀୟ ଜାତୀୟ କଂଗ୍ରେସର ଆଦର୍ଶ ଓ ରଣନୀତିକୁ ରୂପରେଖ ଦେବାରେ ତାଙ୍କର ପ୍ରମୁଖ ଭୂମିକା ଥିଲା। ବ୍ରିଟିସ ଅତ୍ୟାଚାରର ମୁକାବିଲା କରିବା ପାଇଁ ସେ ଅହିଂସାତ୍ମକ ପ୍ରତିରୋଧ ଓ ଆଇନ ଅମାନ୍ୟକୁ ପ୍ରମୁଖ ଅସ୍ତ୍ର ଭାବେ ବ୍ୟବହାର କରୁଥିଲେ। ୧୯୩୦ର ଲବଣ ସତ୍ୟାଗ୍ରହରେ ପ୍ରଦର୍ଶିତ ଅହିଂସାର ଶକ୍ତି ସାରା ବିଶ୍ବର ଦୃଷ୍ଟି ଆକର୍ଷଣ କରିଥିଲା ଏବଂ ସେ ସ୍ବାଧୀନତା ସଂଗ୍ରାମର ପଥ ପ୍ରଦର୍ଶକ ସାଜିଥିଲେ। ଗାନ୍ଧୀଜୀଙ୍କ ସଂଘର୍ଷର ଫଳସ୍ବରୂପ ଆମେ ପରାଧୀନତାର ଶିକୁଳିରୁ ମୁକ୍ତ ହୋଇପାରିଛେ। ୧୯୪୮ ମସିହା ଜାନୁଆରି ୩୦ ତାରିଖରେ ଏକ ପ୍ରାର୍ଥନା ସଭାରେ ଆତତାୟୀ ଗୁଳିରେ ଏହି ଦେଶପ୍ରାଣଙ୍କର ପରଲୋକ ଘଟିଥିଲା। ଗାନ୍ଧୀ ଜୟନ୍ତୀର ତାତ୍ପର୍ଯ୍ୟ କେବଳ ତାଙ୍କ ଜନ୍ମଦିନ ପାଳନରେ ନିହିତ ନାହିଁ, ବରଂ ଏହା ସାମାଜିକ ନ୍ୟାୟ ଓ ଶାନ୍ତି ଉପରେ ତାଙ୍କର ଅବିଚଳିତ ପ୍ରତିବଦ୍ଧତାକୁ ସ୍ବୀକୃତି ପ୍ରଦାନ କରିଥାଏ। ମିଳିତ ଜାତିସଂଘର ସାଧାରଣ ସଭାର ଅନୁମୋଦନକ୍ରମେ ୨୦୦୭ ମସିହାରୁ ପ୍ରତି ବର୍ଷ ଗାନ୍ଧୀ ଜୟନ୍ତୀକୁ ଆନ୍ତର୍ଜାତିକ ଅହିଂସା ଦିବସ ରୂପେ ପାଳନ କରାଯାଉଛି।

ସୌଜନ୍ୟ ସମ୍ବାଦ