Telangana CM: ଜୟ ଶ୍ରୀରାମ ବନାମ ହର ହର ମହାଦେବ: ରେବନ୍ତ ରେଡ୍ଡୀଙ୍କ ଆର୍ଯ୍ୟ-ଦ୍ରାବିଡ ମନ୍ତବ୍ୟ ନେଇ ରାଜନୈତିକ ଉଷ୍ମତା ବୃଦ୍ଧି

ନୂଆଦିଲ୍ଲୀ: ତେଲେଙ୍ଗାନା ମୁଖ୍ୟମନ୍ତ୍ରୀ ତଥା କଂଗ୍ରେସ ନେତା ଏ ରେବନ୍ତ ରେଡ୍ଡୀ ବିଜେପିକୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି,ଉତ୍ତର ଭାରତରେ ଦଳର ସଫଳତା ପଛରେ ଭଗବାନ ରାମଙ୍କ ସହ ଜଡିତ ଭାବନା ଏକ କାରଣ। ସେ ଅଭିଯୋଗ କରିଛନ୍ତି ଯେ, ବିଜେପି ଉତ୍ତର ଭାରତର ଲୋକଙ୍କ ଭାବନା ଏବଂ ବିଶ୍ୱାସ ସହିତ ଗଭୀର ଭାବରେ ଜଡିତ ଭଗବାନ ଶ୍ରୀରାମଙ୍କୁ ଚୋରି କରିଛି। ଦକ୍ଷିଣ ଭାରତରେ ଭଗବାନ ଶିବଙ୍କ ପୂଜା ଅଧିକ ପ୍ରଚଳିତ।

ଦିଲ୍ଲୀରେ ଏକ ଗଣମାଧ୍ୟମ ସଂଗଠନ ଦ୍ୱାରା ଆୟୋଜିତ ସମ୍ମିଳନୀରେ ରେବନ୍ତ ରେଡ୍ଡୀ କହିଛନ୍ତି, କଂଗ୍ରେସ ଦକ୍ଷିଣ ଭାରତରେ ସଫଳ ହୋଇଛି, କିନ୍ତୁ ଉତ୍ତର ଭାରତୀୟ ରାଜ୍ୟଗୁଡ଼ିକରେ ଆଶାନୁରୂପ ସଫଳତା ହାସଲ କରୁନାହିଁ। ସେ କହିଛନ୍ତି, ଆମେ ଦ୍ରାବିଡ଼। ଉତ୍ତରରେ ଲୋକମାନେ ଆର୍ଯ୍ୟ। ଆମେ ଶିବଙ୍କ ଭକ୍ତ, ଏବଂ ସେମାନେ ଭଗବାନ ଶ୍ରୀରାମଙ୍କ ଭକ୍ତ। ବିଜେପି ରାମଙ୍କୁ ଚୋରି କରିଛି। ଶ୍ରୀରାମ ଧନୀଙ୍କ ଭଗବାନ କିନ୍ତୁ ମହାଦେବ ଆମ ଭଳି ଗରିବଙ୍କ ଭଗବାନ। ଲୋକେ ଉଭୟଙ୍କୁ ପୂଜା କରନ୍ତି। ମାତ୍ର ବିଜେପି ଭଳି ଦଳ ଭଗବାନଙ୍କୁ ମଧ୍ୟ ଚୋରି କରି ନେଉଛି।

ବିଜେପି ମଞ୍ଚରୁ ପ୍ରାୟତଃ ଜୟ ଶ୍ରୀରାମ ସ୍ଲୋଗାନ ଶୁଣାଯାଏ: ଏ ରେବନ୍ତ ରେଡ୍ଡୀ

ରେବନ୍ତ ରେଡ୍ଡୀ ଭଗବାନ ରାମଙ୍କ ସମ୍ପର୍କରେ ବିଜେପିର ରାଜନୀତି ଉପରେ ପ୍ରଶ୍ନ ଉଠାଇ କହିଛନ୍ତି, ଯେ ଶ୍ରୀରାମ ଲୋକଙ୍କ ଭାବନା ଏବଂ ବିଶ୍ୱାସର ବିଷୟ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବିଜେପିକୁ ଟାର୍ଗେଟ କରି ତେଲେଙ୍ଗାନା ମୁଖ୍ୟମନ୍ତ୍ରୀ କହିଛନ୍ତି, ବିଜେପି ମଞ୍ଚରୁ ପ୍ରାୟତଃ ଜୟ ଶ୍ରୀରାମ ସ୍ଲୋଗାନ ଶୁଣାଯାଏ। ମାତ୍ର ହର ହର ମହାଦେବ ଶୁଣାଯାଇ ନଥାଏ। ଆମେ ହର ହର ମହାଦେବ କହିବା ବେଳେ ସେମାନେ ଏହାକୁ ପସନ୍ଦ କରନ୍ତି ନାହିଁ।

ରେବନ୍ତଙ୍କ ମନ୍ତବ୍ୟ ଏପରି ଏକ ସମୟରେ ଆସିଛି ଯେତେବେଳେ ଧାର୍ମିକ ପ୍ରତୀକ ଏବଂ ଏହାକୁ ଘେରି ରହିଥିବା ରାଜନୈତିକ ବିତର୍କ କଂଗ୍ରେସ ଏବଂ ବିଜେପି ମଧ୍ୟରେ ନିରନ୍ତର ଆଲୋଚନାର ବିଷୟ ପାଲଟିଛି। ଗତ କିଛି ବର୍ଷ ଧରି ରାମ ମନ୍ଦିର ଏବଂ ଭଗବାନ ଶ୍ରୀରାମଙ୍କ ସହ ଜଡିତ ପ୍ରସଙ୍ଗଗୁଡ଼ିକ ବିଜେପିର ରାଜନୈତିକ ଆଲୋଚନାର ଏକ ପ୍ରମୁଖ ଅଂଶ ହୋଇଆସିଛି। ଉତ୍ତର ଏବଂ ଦକ୍ଷିଣ ଭାରତର ରାଜନୈତିକ ଦୃଶ୍ୟପଟ ତୁଳନା କରି ରେଭନ୍ତ ରେଡ୍ଡୀ କହିଛନ୍ତି ଯେ ଦକ୍ଷିଣ ରାଜ୍ୟଗୁଡ଼ିକରେ କଂଗ୍ରେସ ଶକ୍ତିଶାଳୀ, ଯେତେବେଳେ ଉତ୍ତର ଭାରତରେ ବିଜେପି ସୁବିଧାରେ ରହିଛି। ସେ ଏହାର କାରଣ ଭାବରେ ଦୁଇ ଅଞ୍ଚଳର ଭିନ୍ନ ଧାର୍ମିକ ଏବଂ ସାଂସ୍କୃତିକ ଭାବନାକୁ ମଧ୍ୟ ଉଲ୍ଲେଖ କରିଛନ୍ତି।

ଶୁଣାଯାଇ ନଥାଏ ହର ହର ମହାଦେବ

ଏହା ସହିତ ଆର୍ଯ୍ୟ ଏବଂ ଦ୍ରାବିଡଙ୍କ ରାଜନୈତିକ ଏବଂ ସାଂସ୍କୃତିକ ପରିଚୟ ସମ୍ପର୍କରେ ତାଙ୍କର ମନ୍ତବ୍ୟ ନେଇ ରାଜନୈତିକ ଉଷ୍ମତା ବଢ଼ିବାରେ ଲାଗିଛି। ଉତ୍ତର ଏବଂ ଦକ୍ଷିଣ ଭାରତର ସାମାଜିକ ଏବଂ ରାଜନୈତିକ ପରିଚୟ ସମ୍ପର୍କରେ ଏପରି ବିତର୍କ ବହୁ ଦିନ ଧରି ଚାଲିଛି ଏବଂ ବିଭିନ୍ନ ରାଜନୈତିକ ଦଳର ନେତାମାନେ ଏହି ପ୍ରସଙ୍ଗରେ ଭିନ୍ନ ଭିନ୍ନ ମତ ରଖିଛନ୍ତି। ଏହି ସମ୍ମିଳନୀରେ ରେଭନ୍ତ ନିର୍ବାଚନ କମିସନଙ୍କ ସ୍ୱତନ୍ତ୍ର ସଘନ ସଂଶୋଧନ (ଏସଆଇଆର)ପ୍ରକ୍ରିୟା ସମ୍ପର୍କରେ ଦାବି କରିଛନ୍ତି ଯେ, ସ୍ୱାଧୀନତା ଆନ୍ଦୋଳନ ସମୟରେ ବ୍ରିଟିଶ ଶାସନ ବିରୋଧରେ ‘ସାଇମନ୍ ଗୋ ବ୍ୟାକ୍’ ଆନ୍ଦୋଳନ ପରି ଦେଶରେ ଏସଆଇଆର ବିରୋଧରେ ଏକ ଆନ୍ଦୋଳନ ଉଠିବାକୁ ଯାଉଛି।

ଦେଶର ଲୋକଙ୍କ ମଧ୍ୟରେ ଏସଆଇଆର ପ୍ରତି ଅସନ୍ତୋଷ ବଢୁଛି। ଭବିଷ୍ୟତରେ ଏହା ବିରୋଧରେ ଏକ ବଡ଼ ଧରଣର ଆନ୍ଦୋଳନ ହୋଇପାରେ। ରେବନ୍ତଙ୍କ ମନ୍ତବ୍ୟ ବିଜେପି ଏବଂ କଂଗ୍ରେସ ମଧ୍ୟରେ ଭଗବାନ ଶ୍ରୀରାମ ଏବଂ ଶିବଙ୍କୁ ନେଇ ରାଜନୈତିକ ବିତର୍କକୁ ତୀବ୍ର କରିବାର ସମ୍ଭାବନା ଥିବାବେଳେ,ଏସଆଇଆର ସମ୍ପର୍କରେ ତାଙ୍କର ଦାବି ନିର୍ବାଚନ ପ୍ରକ୍ରିୟା ଏବଂ ଭୋଟର ତାଲିକା ସଂଶୋଧନ ଉପରେ ଚାଲିଥିବା ବିତର୍କକୁ ପୁଣି ଥରେ ସରଗରମ କରିଛି।

ସୌଜନ୍ୟ ସମ୍ବାଦ